Proverbios 21
21
1Tayta Diospa makinpiqa
reypa ima ruway munasqanpas mayu hinam,
Diosmi maymi munasqanman pusan.
2Runapaqqa imaña ruwasqanpas
allinpaqmi rikchakapun
ichaqa Tayta Diosmi
runapa ruwasqankunata juzganqa.
3Sacrificiokuna qonamantapas aswanqa,
allin arreglotawan allin kawsakuytam.
Tayta Diosqa munan.
4Hatun tukuywan,
yachayniyuqpaq hapikuruyqa,
hinaspa mana allin ruwaypi kawsayqa hucham.
5Allinta tantearispa imapas ruwasqaqa apuyachikunmi,
mana allinta tantearispa ruwasqam ichaqa wakchayachikun.
6Llullakuywan huñusqa qori-qollqeqa
wañuy maskaqkunapa yanqa munayllanmi.
7Mana allin ruwaq runataqa
mana allin ruwayllanmi tuñirachinqa,
allin kaqkuna ruwayta mana munasqanrayku.
8Mana allin runapa ñanninqa qewi-qewi hinaspa sasallañam,
mana pantaspa kawsakuqpa ruwayninmi ichaqa allin.
9Peleollapi puriq warmiwan hatun wasipi yachanamantaqa,
altos kuchupi yachakuymi aswan allinqa.
10Mana allin runaqa
mana allin ruwayllatam munan,
chayna runaqa
runamasintapas manam llakipayanchu.
11Burlakuq runata castigaptikiqa
mana yuyayniyuqpas yuyaytam haypan,
yachayniyuqta qaqchaptikiqa
aswan yachayniyuqmi rikurinqa.
12Chuya Diosqa
mana allin runapa wasintam qawan,
chayraykum mana allin runataqa tuñichin.
13Wakchakunapa qayakuyninta
mana uyariq runaqa,
yanapakuyta mañakuspapas manam uyarisqachu kanqa.
14Pakasqallapi qosqa regaloqa piñakuytapas tanichinmi,
pakasqallapi qosqa regaloqa llumpay rabiakuytapas tanichinmi.
15Allin arreglo ruwayqa
allin ruwaq runatam kusichin,
mana allinta ruwaqkunatam ichaqa tuñichin.
16Yachaypa ñanninmanta sapaqchakuruq runaqa
wañuqkunapa kasqanpim tukurunqa.
17Aychan kusichiyman qokuruq runaqa
wakchayaypim tukunqa.
Upyakuykunata, perfumekunata kuyaq runaqa,
manam haykapipas apuyanqachu.
18Mana allin runaqa
allin runapa rantinpim ñakarinqa,
iskay uya runañataqmi
allin kawsakuq runapa rantinpi ñakarinqa.
19Rabiosa warmiwan yachaymantaqa
chunniqpi yachakuymi aswan allinqa.
20Yachayniyuq runapa wasinpiqa
qori-qollqewan aceitem tarikun,
mana yachayniyuq runam ichaqa
kapuqninkunatapas yanqachan.
21Allin kawsakuytawan kuyapayakuq kayta maskaqqa
ancha reqsisqa kaytawan allin ruwayta hinaspa kawsakuytam tarinqa.
22Yachayniyuq runaqa
allin nanachikusqa llaqtatapas vencerunmi,
hapipakunanku perqankunatapas tuñirachinmi.
23Imam rimasqanta cuidakuq runaqa
sasachakuykunamantam librakunqa.
24Burlakuspa qari tukuqtaqa
“hatun tukuq, qara uya, mana penqakuq” nispam sutichanku.
25Qella runaqa tukuy imayuq kaytam munan,
ichaqa manam llamkayta munanchu.
26Qella runaqa hukpa kaqtam imatapas munan,
Allin ruwaq runam ichaqa
imallantapas qokuykun.
27Mana allin runakunapa ofrendanqa millakuypaqmi,
mana allin sonqonwan qosqankurayku.
28Mana allin testigoqa chinkachisqam kanqa,
cheqap testigom ichaqa uyarisqa kanqa.
29Mana allin runaqa
sonqontam rumiyachin,
allin ruwaq runam ichaqa
ñanninkunata allichakun.
30Diospa qayllanpiqa
yachaypas, yachayniyuq kaypas,
allin tanteoyuq kaypas
mana serviqmi.
31Guerraman rinapaqmi caballotaqa alistanku,
ichaqa Diosllam vencechiqqa.
Chuya Qellqa Revisión @ Sociedad Bíblica Peruana, 2012