Isaías 54
54
Diospa wiñaypaq kuyakuyninmanta
1 #
Gl 4.27. Tayta Diosmi kaynata nin:
¡Mana wachakuq qolluq warmi, llumpayta kusikuy!
¡Mana wachakuq warmi, qaparispa takiy!
Qosanpa saqesqan warmiqa, qosayuq warmimantapas achka wawasapam kanqa.
2Ama iskayrayaspa yachanayki carpata hatunyachiy,
yachasqayki carpapa toldonta mastariy;
waskankunatapas masyachiy,
estacankunatapas allinniqta takay.
3Alleqmanpas ichoqmanpas mastarikunkim,
miraynikikunam achka nacionta hapikuykunqaku,
purmachisqa llaqtakunapim yachakunqaku.
4Ama manchakuychu, manam penqaypichu kanki,
ama pinqakuychu manam kamisqachu kanki;
warma kaspa penqaypi kasqaykitapas qonqankiñam,
viuda kaspayki kamisqa kasqaykitapas manam yuyarinkiñachu.
5Unanchaqniki qosaykim kani,
Tukuy Atiyniyuq Tayta Diosmi kani,
Israelpa libraqnin Chuya Diosmi kani,
kay pachapa Diosninwan sutichasqam kani.
6Qosan saqeruptin llakisqa sonqoyuq warmita hinam,
sipasllaraq kayninpi qosanpa saqesqan warmita hinam,
Tayta Dios qayasurqanki, hinaspam nisunki:
7“Manam unaypaqchu saqerurqayki,
ichaqa llumpay kuyakuywanmi kaqllamanta kuskanchakusun.
8Pisi piñakuyniypim ratollapaq qanmanta pakakururqani,
ichaqa wiñaypaq kuyakuyniywanmi llakipayarqayki”.
Librasuqniki Tayta Diosmi chaynata nin.
9 #
Gn 9.8-17. Sinchita parachimusqay tiempopim Noeyman juraspay nirqani,
kay pachata yakuwan manaña tuytuchinaypaq.
Chaynatam kunanpas qanman jurayki,
qampaqqa manañam huktawanqa piñakusaqñachu,
nitaqmi qaqchasqaykiñachu.
10Orqokuna suchuruptinpas,
moqokuna maymi kasqanmanta asuriptinpas,
kuyakuyniymi ichaqa qanmanta mana rakikunqachu,
hawka kanapaq pacto ruwasqaypas manam tukunqachu.
Llakipayasuqniki Tayta Diosmi chaynata nin.
Musoq Jerusalén llaqtamanta
11¡Llakipayaypaq pisipasqa,
mana pipa consuelasqan Jerusalén llaqta!
Carbunclo rumipim cimientoykikunata churasaq,
zafiro rumipim cimientoykikunata hatarichisaq.
12 #
Ap 21.18-21. Rubí rumikunamantam torrekikunatapas perqarusaq,
carbunclo rumiwanmi punkuykikunatapas ruwarusaq,
muyuriqnikipi perqaykikunatapas
suma-sumaq rumikunamantam ruwarusaq.
13 #
Jn 6.45. Churikikunatapas ñoqa Tayta Diosmi yachachisaq,
paykunaqa hawkayaypim mana tukuyta kawsakunqaku.
14Allinkuna ruwasqaykim kallpanchasunki,
ñakariymantapas karupim tarikunki,
manchakuypas manañam hukmanyachisunkiñachu.
15Sichum pipas contraykipi hatarimuspanqa
manam ñoqapa yanapasqaychu hatarimunqa.
Pitapas contraykipi hatarimuqtaqa vencenkipunim.
16Herrerotaqa ñoqam unancharqani,
sansata pukuspa tukuy rikchaq armakunata ruwananpaq.
Tuñichispa purmachiqtapas ñoqataqmi unancharqani.
17Contraykipi armakuna ruwasqankupas manam imanasunkichu,
juzgadopi acusasuqnikikunatapas upallachinkim.
Tukuy chaykunam serviqniykunapa herencian kanqa,
ñoqawanmi tukuy imapi vencenqaku.
Tayta Diosmi chaynata nin.
Chuya Qellqa Revisión @ Sociedad Bíblica Peruana, 2012