Isaías 42
42
Tayta Diospa serviqninmanta
1 #
Mt 3.17; 17.5; Mr 1.11; Lc 3.22; 9.35. Kayqaya akllakusqay serviqniyqa,
ñoqam payta kallpanchasaq,
payraykum kusisqa kachkani.
Espirituytam payman huntani,
mana pimanpas sayapakuspam nacionkunata kamachinqa.
2Manam payqa qayaykachakunqachu,
nisyumantaqa manam qaparinqachu,
callekunapiqa vozninpas manam uyarikunqachu.
3Chitqasqa soqosllatapas manam pakinqachu,
wañunayachkaqña rataq mecherotapas manam wañuchinqachu,
cheqapwanmi lliwpaq allinkunallata ruwanqa.
4 #
Mt 12.18-21. Payqa manam pisipanqachu,
nitaqmi hukmanyanqachu,
nacionkunapi allin arreglota ruwanankama.
Lamar qochapa patanpi nacionkunapas
yachachikuynintam suyanqaku.
5 #
Hch 17.24-25. Cielokunata unanchaspa mastariq Tayta Diosmi kani,
allpa pachata unanchaqmi kani,
allpapi wiñaqkunatam mirachirqani,
allpa pachapi kawsaq runakunamanmi espirituyta qorqani.
Chaykuna ruwaq kaspaymi serviqniyta kaynata nini:
6 #
Is 49.6; Lc 2.32; Hch 13.47; 26.23. Ñoqa Tayta Diosmi qayarqayki,
makikimantam hapisqayki,
waqaychaspaymi runakunawan pacto ruwasqay kanaykipaq churasqayki,
nacionkunata kanchanaykipaqmi churasqayki.
7Ñawsakunapa ñawinta kichanaykipaq,
carcelpi kaqkunata hurqonaykipaq,
tutayay calabozopi tiyaqkunata hurqonaykipaq, nispa.
8Ñoqam kani Tayta Dios, chaymi sutiy.
Hukkuna hatunchanankutaqa manam munanichu,
ñoqallatam yupaychawanankuqa,
manam idolokunatachu.
9Ñawpaqmantaraq rimasqaykunam cumplikurunña,
kunanñataqmi musoq kaqkunataña willasqaykichik;
manaraq rikurimuchkaptinmi willasqaykichikña.
Tayta Diosta yupaychanamanta
10Tukuy hinastinpi kaqkuna,
lamar qochanta illaqkuna,
lamar qochapi kawsaqkuna,
lamar qochapa patanpi lliw nacionkuna,
Tayta Diospaq musoq takita takiychik.
11Chunniqpi llaqtakuna,
Cedarpa yachanan llaqtakuna,
kusikuywan qapariychik;
Sela lawpi yachaqkuna kusikuymanta takiychik,
orqokunapa puntanmanta qapariychik.
12Tayta Diosta hatunchaychik,
hatunchasqa kasqanta lamar qochapa patankunapi willakuychik.
13Tayta Diosqa hatun piñakuywan peleaq soldado hinaraqmi lloqsinqa,
qaparispanmi guerrapi peleananpaq qayaykachakunqa,
enemigonkunata venceruspanmi munaychakunqa.
14Tayta Diosmi nin:
Unayñam upallalla karqani,
mana imata rimarispaymi aguantakuykurqani,
kunanmi ichaqa wachakuq warmi hina onqosaq,
nanaywan ñakariq warmi hinam qaparisaq.
15Orqokunatawan moqokunatam purmachisaq,
sachankunatawan pastonkunatam chakirachisaq,
mayukunatam aqo pampata ruwarusaq,
qochakunatam chakirachisaq.
16Ñawsakunatam mana reqsisqanku ñanninta pusasaq,
ñawpaqninkupim tutayayta achkiyman tikrasaq,
ranra ñantam pampa ñanmanña tikrasaq.
Paykunapaqmi tukuy kaykunata ruwasaq,
paykunataqa manam saqesaqchu.
17Idolokunaman hapipakuqkunam,
llapa idolokunata “diosniykum kankichik” niqkunam
penqakuymanta karunchakunqaku.
Israel runakuna ñawsa hina kasqankumanta
18Tayta Diosmi nin:
Mana uyariqkuna uyariychik,
ñawsakuna, qawarikuychik.
19¿Pitaq ñawsaqa? ¿Manachum serviqnillay?
¿Pitaq mana uyariqqa? ¿Manachum willakunanpaq kachasqay?
¿Pitaq ñoqa Tayta Diospa akllasqay serviqniy hina llumpay ñawsaqa?
20Tukuy imata qawachkaspapas mana kaqpaqpas hapiqmi,
rinrinwan uyarichkaspapas mana imapas qokuqmi.
21Allin ruwaq kasqanraykum Tayta Diosqa
yachachikuyninta hatunchaspa reqsisqata ruwarqa.
22Chaywanpas kay runakunatam llapa imankuta suwaspa sarunku,
machaykunapi hinaspa carcelkunapim presocharunku.
Qechuchikuptinkupas manam kanchu paykunamanta nanachikuq,
suwachikuptinkupas manam kanchu “qasipuychik” nispa harkaqninku.
23¿Mayqannikichiktaq kay nisqaykunata uyariwaqchik?
¿Mayqannikichiktaq hamuq punchawkunamanta
yachayta munawaqchik?
24¿Pitaq Israelta suwakunapa hinaspa ñakarichiqkunapa makinman qoykurqa?
¿Manachum Tayta Diosqa huchanchikrayku chaykunaman qoykurqa?
manam paypa munasqanman hina kawsayta munarqakuchu,
kamachikuyninkunatapas manam kasukurqakuchu.
25Chayraykum piñakuspa paykunata ñakarichirqa,
lenwachkaq ninata hinam paykunaman mancharikuypaq guerrata kachaykamurqa,
chaywanpas paykunaqa manam kasukurqakuchu;
chay ninam paykunata ruparurqa,
chaywanpas paykunaqa manam kaqpaqpas hapirqakuchu.
Chuya Qellqa Revisión @ Sociedad Bíblica Peruana, 2012