Isaías 33
33
Diosllapi hapipakunamanta
1¡Ay, imaynaraq kankichik,
purmachiq kachkaspa mana purmachisqakuna,
traicionaq kachkaspa mana traicionasqakuna!
Purmachiyta tukuruspam qampas purmachisqa kanki,
traicionayta tukuruspam qampas traicionachikunki.
2Dios Taytallayku,
qamllapi suyasqaykuraykuyá llakipayariykullawayku,
qamyá sapa tutapayta kallpanchaykuwayku,
sasachakuyniyku punchawpiyá salvaykuwayku.
3Qaqchakuynikita uyariykuspankum llaqtakuna ayqekunku,
qam hatariykuptillaykim nacionkuna cheqerinku.
4Suwakuspa llapa ima huñukusqankum suwasqa kanqa,
nana-nanaq aqaruwaykuna hinaña enemigonkunam
kallpamuspanku llapa kapuqninkuta qechurunqaku.
5Hanaq pachapi yachakuq Tayta Diosmi hatunchasqa kachkan,
Sión llaqtatam mana pimanpas sayapakuywan chaynataq allinkuna ruwaywan huntaykun.
6Paymi allin kawsakuy qosuqnikiqa,
paytaqmi yachaytawan yuyayniyuq kaytapas salvakunaykipaq qosunki;
Tayta Diosta manchakuynikim ancha kapuqniyuq kaynikiqa.
7Mana manchakuq allinnin qari-qarikunapa
callekunapi qaparkachasqantayá uyariychik,
hawkayayta apamuqkunapa
waqasqantayá uyariychik.
8Ñankunam chunnichkan,
manañam pipas chaynintaqa purinñachu;
contratotam yanqacharunku,
testigokunatam qepancharunku,
mana pitapas respetaqñam rikurirunku.
9Kay allpam llakipi tarikun,
Líbano orqopi sachakunam chakiruspan penqaypi rikurirun,
Saronpas chunniqñam kachkan,
Basanpiwan Carmelo orqopi sachakunapas mana rapiyuqñam kachkan.
10Tayta Diosmi kaynata nin:
Kunanmi ñoqa hatarisaq,
kunanmi ñoqa hatunchasqa kasaq,
kunanmi ñoqa alabasqa kasaq.
11Qamkunapa tanteasqaykichikqa qora hinallam,
qamkunapa ruwasqaykichikqa qopa hinallam,
ichaqa samayniymi nina hina ruparusunkichik.
12Llaqtakunam uchpayanankukama kañasqa kanqaku,
kuchusqa kichkakuna hinam kunununuyllaña ninapi rupanqaku.
13Karupi kaqkuna,
imam ruwasqaymanta uyariychik.
Hichpapi kaqkuna,
Tukuy Atiyniyuq kasqayta reqsiychik, nispa.
14Sión llaqtapi huchasapakunam paqway mancharisqa kachkanku,
Diosta mana yupaychaqkunam pasaypaqta katkatataspa ninku:
¿Mayqanninchiktaq rupakuq nina ukupi yachachwan?
¿Mayqanninchiktaq wiña-wiñaypaq rupakuq nina ukupi yachachwan? nispanku.
15Isaiasñataqmi nirqa:
Allinkunata ruwaspa cheqap rimaqmi,
engañowan qollqe ganayta mana munaqmi,
sayniyuta mana chaskikuy munaqmi,
runa wañuchiqkunapa consejasqanta mana uyariqmi,
mana allinkunata mana qawaq munaqmi,
16allin waqaychasqa kawsakunqa,
yachananpas qaqay-qaqay sunim kanqa;
mikunanpas manam tukunqachu,
yaku tomananpas manam pisinqachu, nispa.
17Ñawikikunam reypa kuyayllapaq kasqanta qawanqa,
nacionninpa tukuy hinastinman mirasqantam qawanqa.
18Manchakuypi kawsasqaykita yuyarispam ninki:
¿Maypitaq kachkan impuesto qollqe yupaqqa?
¿Maypitaq kachkan impuesto qollqepa llasaynin qawaqqa?
¿Maypitaq kachkan torrekuna yupaq runaqa? nispa.
19Mana llakipayakuq runakunataqa manañam rikunkichu,
rimasqankupas mana entiendey atina runakunataqa manañam rikunkichu.
20Sión llaqtata qawariy,
hatun fiestakuna ruwananchik llaqtata qawariy,
Jerusalén llaqtata qawariy,
hawka samarina llaqtata qawariy.
Mana suchuchiy atina carpam kanqa,
estacankunapas mana chutay atinam kanqa,
waskankunapas mana tipiy atinam kanqa.
21Llimparistin kallpaq ancho mayukunapa huntarisqanmi kanqa,
kaspimanta qachinayuq barcokunapas manam chaynintaqa rinqachu,
hatun barcokunapas manam chaynintaqa riyta atinqachu.
Chaypim Tukuy Atiyniyuq Tayta Dios ñoqanchikwan kanqa.
22Tayta Diosmi juezninchikpas,
decretokuna qowaqninchikpas,
Tayta Diosmi reyninchikpas,
payllataqmi salvaqninchikpas.
23Enemigonchikpa barconkunapa waskankunaqa manañam hapinñachu,
wayayaruspam hatun kaspinkunatapas manaña takyachinñachu,
barcota purichiq toldontapas manañam chutanñachu.
Nana-nanaq qori-qollqenkutapas qechuspam rakinakusun,
wistukunapas ñawsakunapas rakinakuspam apakunqaku.
24Sión llaqtapi yachaqkuna,
manañam mayqannikichikpas ninkichikñachu:
“Onqochkanim” nispaqa.
Diosmi chaypi yachaqkunapa huchanta pampachanqa.
Chuya Qellqa Revisión @ Sociedad Bíblica Peruana, 2012