Isaías 31
31
Egiptoman hapipakuqkunata qaqchasqanmanta
1¡Ay, imaynaraq kanqaku Egipto nacionman rispa yanapakuy maskaqkuna!
Egiptopa caballonkunapi,
kallpasapa silladankunapi,
achkallaña carretankunapi hapipakuqkuna;
ichaqa manam Israelpa Chuya Diosninpiqa hapipakunkuchu,
nitaqmi Tayta Diostaqa maskankuchu.
2Diosqa ancha yachayniyuqmi,
sasachakuytaqa apamunqapunim,
rimasqantaqa ruwanqam.
Mana allin ruwaqpa aylluntam
yanapaqninkunatawan kuskata chinkarachinqa.
3Egiptopi kaqkunaqa runakunallam,
manam dioskunachu;
caballonkupas aychallam,
manam espirituchu;
Tayta Diosmi paykunata atiyninwan ñakarichinqa,
yanapaqtapas yanapachikuqtapas kuskata.
Chaynapim paykunaqa lliw chinkarunqaku.
4Tayta Diosmi kaynata niwarqa:
Imaynam ovejata hapiruspan
michiqkuna huñunakuruspa qaparispanku manchachiptinkupas leonqa sunita sayan,
chaynam Tukuy Atiyniyuq Tayta Diospas
llaqtanta harkaykunanpaq Sión moqoman uraykamunqa.
5Imaynam alton pawaq urpikuna qesanta harkakun,
chaynatam Tayta Diospas Jerusalén llaqtanta nanachikunqa,
harkakunqa, libranqa hinaspa salvanqa.
6Israelpa mirayninkuna,
paqwaypaq qepanchakusqaykichik Diosman kutirikuychik.
7Qori-qollqemanta idolokunata,
hucha makikichikwan ruwasqaykichikta wischusqaykichik punchawmi,
8Asiria nacionpa tropankuna espadapi puchukanqaku,
ichaqa manam runakunapa espadanwanchu.
Espadamantaña lluptiptinkupas
jovenkunatam criado kanankupaqña hapirunqaku.
9Mancharikuymantam manaña kallpayuq rikurinqaku,
capitanninkunapas banderankuta saqespam ayqekunqaku,
Tayta Diosmi chaynata nin.
Paypaqqa Sión moqopim lenwachkaq ninan kachkan.
Jerusalén llaqtapiñataqmi hornon kachkan.
Chuya Qellqa Revisión @ Sociedad Bíblica Peruana, 2012