Isaías 29
29
Jerusalén llaqta librasqa kananmanta
1Ay, #29.1 Arielqa Jerusalén llaqtapa huknin sutinmi.Ariel, Ariel llaqta,
Davidpa samarinan llaqta,
fiestaykikunapas hinaraqyá iskay-kimsa watakunakama qatinaslla kachun.
2Ariel llaqtata, ñoqam sasachakuyman churasqayki,
waqakuypi hinaspa sinchi llakikuypim tarikunki,
kañapuwanankupaq altar hinam kanki.
3Muyuriqnikipim campamentoyta hatarichisaq,
tropaykunawanmi muyurusqayki,
kaspikunawanmi muyuriqnikita qencharusaq,
atacanaypaqmi uchkukunata ruwachisaq.
4Chaynapim allpaman wichichisqa kanki,
qamqa allpamantam rimarimunki,
qaparimusqaykipas allpa ukumantam uyarikamunqa,
rimasqaykipas wachachachay hinam uyarikunqa.
5Enemigoykikunapas ñutu allpaman tikrasqam kanqaku,
qatikachasuqnikikunapas wayrapa apanan qopa hinam kanqaku.
Qonqayllamantam chaynaqa rikurinqaku.
6Tukuy Atiyniyuq Tayta Diosmi,
wayra-parawan, loco parawan, llumpay terremotowan,
lliw ruparuq lenwachkaq ninawan,
enemigoykikunata ñakarichinqa.
7Ariel llaqtapa contranpi peleaqkunaqa,
achka llaqtakunaña kaspankupas,
mosqoy hina pasaruqllam kanqaku.
Ariel llaqtapa murallan tuñichiqkunam,
sasachakuyman churaqninkunam,
chayna kanqaku.
8Imaynam yarqachikuq runa mosqoyninpi mikun,
rikchariruspanñataq hinalla yarqaymanta tarikun;
imaynam yakumanta kaq runa mosqoyninpi yakuta toman,
rikchariruspanñataq hinalla yakumanta tarikun,
chaynam Sión llaqtapa contranpi peleaq
achkallaña nacionkunapas kanqaku.
9Qamkunaqa hinallayá sonsorayaychik,
mana imapas rikuq ñawsa hinayá kaychik.
Vinowan mana sinkachkaspapas,
poqosqa aqawan mana machachkaspapas,
qamkunaqa sinka hinayá tampikachaychik.
10 #
Ro 11.8. Tayta Diosmi qamkunaman
sinchi puñunayayta kachaykamusunkichik.
Profetakunapa ñawintapas wichqarunmi,
visión rikuqkunapa umantapas velowanmi wankurun.
11Chaymi visión rikusqaykichikpas qamkunapaqqa,
pasaypaq wichqasqa libro hinaña rikurirun.
Sichum leey yachaqman qoykuspa ninqaku:
Kayta leey, nispanku;
hinaptinmi payñataq ninqa:
Wichqasqam kachkan, manam leeyta atiymanchu, nispa.
12Sichum mana leey yachaqman librota haywaykuspa ninqaku:
Kay librota leey, nispanku;
ichaqa paymi ninqa: Manam leeyta yachanichu, nispa.
13 #
Mt 15.8-9; Mr 7.6-7. Señormi nin:
Kay runakunaqa hawa sonqollam asuykamuwanku,
simillankumantam yupaychamuwanku,
sonqonkum ichaqa ñoqamanta karupi kachkan.
Paykunaqa runapa yachachisqanman hinallam yupaychawanku.
14 # 1 Co 1.19. Chayraykum huktawan admirakuypaq milagrokunata ruwaspay
kay llaqtata yapamanta hukmanyachisaq.
Yachaysapa runankunapa yachayninmi tukurunqa,
yuyaysapa runankunapa yuyayninmi waspirunqa, nispa.
15¡Ay, imaynaraq kanqaku!
Tayta Diosmanta mana allin tanteasqankuta pakaqkuna
tutayayllapi mana allin ruwaqkuna,
paykunam ninku:
“Manam pipas rikuwanchikchu,
manataqmi pipas musyawanchu”, nispanku.
16Millakuypaqmi chayna kayqa.
¿Yaqachu manka ruwaq mituwan rikchakunman?
¿Yaqachu mankaqa ruwaqninta ninman:
“Manam ruwawarqankichu”, nispa?
¿Yaqachu puyñuqa ruwaqninta ninman:
“Manam imatapas yachankichu”, nispa?
Israel nacionta salvananpaq Dios prometekusqanmanta
17Manapas unaypim Líbano orqo
tukuy imapa qespinan allpaman tikrakunqa.
Tukuy imapa qespinan allpañataqmi
sachakunapa kanan montemanña tikrakunqa.
18Chay punchawpiqa mana uyariqkunapas librota leepuptinkum uyarinqaku,
ñawsakunapas ancha tutayaypi kachkaspankupas rikukunqakum.
19Sumaq sonqoyuqkunam Tayta Diospi kusikunqaku,
pasaypaq wakchakunam Israelpa Chuya Diosninrayku kusikunqaku.
20Runamasin ñakarichiqpas tukunqam,
asipayakuqkunapas chinkanqam,
mana allinkunalla maskaqkunapas chinkarunqakum.
21Runamasinta yanqamanta cargochaqkunaqa tukurunqam,
cortepi nanachikuqman trampa churaqkunaqa chinkarunqam,
mana huchayuq runata allin arreglota mana ruwaspa engañaqkunaqa puchukarunqam.
22Chayraykum Abrahamta libraq Tayta Diosqa
Jacobpa mirayninta kaynata nin:
Kunanmanta hamuq punchawkunapiqa
Jacobpa mirayninkunaqa manañam penqakuypaqchu kanqaku,
nitaqmi ayayasqa uyayuqchu kanqaku,
23aswanqa mirayninkunam llaqtankupi imam ruwasqayta qawaspanku
Chuya Dios kasqayta reqsinqaku,
hinaspam ñoqata, Israelpa Diosninta manchakuwanqaku.
24Pantaypi kaqkunam yuyayniyuq kayta yachanqaku,
runamasinpa qepanpi rimaqkunam yachachikuyta chaskinqaku, nispa.
Chuya Qellqa Revisión @ Sociedad Bíblica Peruana, 2012