Isaías 27
27
Israel nación librasqa kananmanta
1 #
Job 41.1; Sal 74.14; 104.26. Chay punchawmi Tayta Diosqa hatu-hatun espadanwan,
Leviatanwan sutichasqa millqorayaq maqta uruta wañuchinqa,
Leviatanwan sutichasqa apurawman kallpaq maqta uruta sipinqa,
wañuchinqataqmi lamar qochapi dragontapas.
2Chay punchawpiyá,
miskillaña vino qokuq uvas chakramanta takiychik.
3Ñoqa Tayta Diosmi chay uvas chakrata
sapa kutilla parqopayaspa waqaychani.
Mana imapas pasananpaqmi tuta punchaw waqaychani.
4Paypaqqa manam piñakunichu.
Sichum kichkayuq qorayuq kaptinqa
guerrapi peleaq rispaymi lliwta kañaykamuyman.
5Sichum waqaychanayta munaspaqa
ñoqawan amistachun,
arí, ñoqawan allinyanakuchun.
6Hamuq punchawkunapim Jacobqa sapichakunqa,
Israelmi chikllispa sisanqa
rurunkunam kay pachata huntaykunqa.
7Israelpa mirayninkunataqa, Diosqa manam ñakarichirqa
paykunapa ñakarichiqninkunata hinachu,
wañuchispapas manataqmi wañuchirqa
paykunapa wañuchiqninkunata hinachu.
8Aswanqa huklaw nacionman presota apachispam
paykunataqa ñakarichirqa.
Intipa qespimunan lawmanta manchakuypaq pukumuq
wayrawan hinaraqmi qarqorurqa.
9Chaywanpas Jacobpa mirayninkunapa huchantaqa pampachanqam,
ichaqa kaykunatam ruwananku:
Idolonkupa altarninkunatam isku rumita hina ñutupananku,
Asera idolonkutam wikapananku,
idolonkupaq incienso kañananku altarkunatam tuñichinanku.
10Qaqay-qaqay perqayuq llaqtam kunanqa raqayllaña kachkan,
mana runayuqñam purmachkan,
paqwaytañam chunnichkan.
Animal michinanku purunñam rikurirun,
sachapa rapinta mikuspa animalkunapa puñunanñam rikurirun.
11Sachapa kallmanpas chakiruspaqa pakirunmi,
warmikunam chaykunata huñuruspa ninata ratachinku.
Mana yachayniyuqmi kay llaqtaqa,
chayraykum unanchaqninpas mana llakipayanqachu,
nitaqmi paykunataqa kuyapayanqachu.
12Chay punchawmi Tayta Diosqa,
Eufrates mayumanta Egipto wayqopi mayukama,
trigota saruchkaq hina sarunqa,
qamkunam ichaqa chulla-chullamanta akllasqa kankichis.
13Hina chay punchawpim,
hatun trompetata tocanqaku,
hinaptinmi Asiriapi chinkasqakunawan Egiptoman qarqosqakunapas kutimunqaku,
Jerusalén llaqtapi Tayta Diosta hatunchanankupaq,
sapaqchasqan Sión moqopi Tayta Diosta hatunchanankupaq.
Chuya Qellqa Revisión @ Sociedad Bíblica Peruana, 2012