2 Samuel 9
9
Mefi-bosetta David yanapasqanmanta
1 # 1 S 20.15-17. Huk punchawmi David tapukurqa:
¿Pillapas Saulpa mirayninmanta puchurqachu Jonatanrayku yanapaykunaypaq? nispa.
2Saulpa ayllunpam karqa Siba sutiyuq mayordomon, paytam Davidpa qayllanman qayachimurqaku, chaymi David tapurqa:
¿Qamchu Siba kachkanki? nispa.
Sibañataqmi nirqa:
Arí, ñoqam kachkani, nispa.
3 # 2 S 4.4. Hinaptinmi rey David tapurqa:
¿Pillapas Saulpa ayllunmanta kachkanraqchu Diospa kuyakuyninwan yanapaykunaypaq? nispa.
Chaymi Siba nirqa:
Kachkanraqmi Jonatanpa churin, payqa iskaynin chakinmanta suchuyasqam kallan, nispa.
4Hinaptinmi David tapurqa:
¿Maypitaq payqa kachkan? nispa.
Sibañataqmi nirqa:
Payqa Lo-Debar llaqtapim Amielpa churin Maquirpa wasinpi kachkan, nispa.
5Chaymi rey Davidqa payta pusachimurqa Lo-Debar llaqtapi Amielpa churin Maquirpa wasinmanta. 6Saulpa willkan Jonatanpa churin Mefi-bosetmi Davidpa kasqanman chayaramuspan paypa qayllanpi qonqoranpa kumuykurqa. Chaymi David nirqa:
¡Mefi-boset! nispa.
Payñataqmi nirqa:
Ñoqam kani kamachiwanaykipaq, nispa.
7Chaymi David nirqa:
Ama manchakuychu. Ñoqam taytayki Jonatanrayku yanapaspay abueloyki Saulpa llapa allpanta kutichipusqayki, qamñataqmi ñoqawan kuska tukuy tiempo mikunki, nispa.
8Hinaptinmi Mefi-boset kumuykuspan nirqa:
¿Pitaq ñoqallayqa karqani? Ñoqaqa wañusqa allqo hina mana valeqmi kallani, nispa.
9Chaymantam Saulpa mayordomon Sibata qayachimuspan David nirqa:
Saulpa chaynataq mirayninkunapa kapuqninkunatam lliwta patronniki Saulpa willkan Mefi-bosetman qoykuni. 10Qanmi churikikunapiwan hinaspa serviqnikikunapiwan allpanta llamkapunki, cosechanta hoqarispaykim patronnikipa ayllunkuna mikunankupaq waqaychanki. Patronnikipa willkan Mefi-bosetmi ichaqa ñoqawan kuska tukuy tiempo mikunqa, nispa. Sibapa churinkunam karqa chunka pichqayuq, serviqninkunañataqmi karqa iskay chunka.
11Hinaptinmi reyta Siba nirqa:
Reynilláy, tukuy kamachiwasqaykitam ruwasaq, nispa.
Mefi-bosetñataqmi reypa churin hina reywan kuska mikurqa. 12Mefi-bosetpam Micaía sutiyuq taksa churin karqa. Sibapa wasinpi llapallan yachaqkunam Mefi-bosetpa serviqninkuna karqaku. 13Mefi-bosetmi ichaqa reywan kuska mikuspa Jerusalén llaqtapi yacharqa. Payqa iskaynin chakinmanta suchuyasqam karqa.
Chuya Qellqa Revisión @ Sociedad Bíblica Peruana, 2012