2 Samuel 22
22
Enemigonkunata venceruspa Davidpa takisqanmanta
(Salmo 18)
1Enemigonkunamantawan Saulmanta Tayta Dios libraykuptinmi kay takita Diospaq David takirqa, 2Kaynata nispa:
Dios Taytalláy, amparakunay qaqam kanki,
pakaykuwaspa libraykuqniymi kanki.
3Diosnilláy, kallpanchaqniymi kanki,
qamllapim hapipakusaq;
atiynikiwan harkaykuwaspam salvaykuwanki,
mana pipa chayay atinanpim pakaykuwanki,
salvaqniymi qamqa kanki,
mana allin ruwaqkunamantam libraykuwanki.
4Tayta Diostam ñoqallayqa qayakusaq,
payllam yupaychana Diosqa,
paymi enemigoymanta salvaykuqniyqa.
5Wañuymi yakupa olankuna hina wankuruwarqa,
kallpachkaq lloqlla hinam mana allinkuna mancharirachiwarqa.
6Wañuymi llumpayta chaqnaruwarqa,
wañuymi toqlla hina hapirullawarqa.
7Llakipi kaspaymi Tayta Diosta qayakurqani,
yanapakuyta mañakuptiymi
templonmanta Diosnillayqa uyariykuwarqa,
mañakuyniytam uyariykuwarqa.
8Tayta Diospa piñakuyninwanmi
kay pachapas kuyurispa katkatatarqa,
cielokunapa cimientonkunam kuyurirqa.
9Senqanmantam qosni wicharirqa,
siminmantam lenwachkaq nina lloqsimurqa
rupachkaq sansatam wischumurqa.
10Cielota kicharispam
tutay-tutay puyukunapa hawanta uraykamurqa.
11Querubinpi sillakuykuspam pawarqa,
wayrapa rapranpim pawarikurqa.
12Tutayaywanmi tapakuykurqa,
yanay-yanay puyuwanmi wankukuykurqa.
13Qayllanmantam kanchariywan rupachkaq sansa lloqsimurqa.
14Hanaq pachamanta qaparimuptinmi
tukuy imapa hawanpi munaychakuq Diospa rimariyninmi
rayo hinaraq uyarikurqa.
15Flechanwanmi enemigonkunata cheqechirqa,
llipyakunawanmi paykunata tuñichirqa.
16Tayta Diospa qaqchakuyninwanmi
lamar qochapa ukunkunapas rikurirqaraq,
Tayta Diospa qapariyninwanmi
kay pachapa cimientonkunapas rikukurqaraq.
17Diosmi hanaq pachamanta hapiykamullawarqa,
achka yakupa chawpinmantam hurqoykullawarqa.
18Atiyniyuq enemigoymantam libraykullawarqa,
cheqniwaqniykunamantam libraykullawarqa;
paykunaqa ñoqamanta aswan kallpayuqraqmi karqaku.
19Sasachakuypi kachkaptiymi paykunaqa pawaykamuwarqaku,
Tayta Diosllam ñoqataqa yanapaykullawarqa.
20Sasachakuymantam hurqoykullawarqa,
kuyawaspanmi libraykullawarqa.
21Allin kawsasqayman hinam Tayta Diosqa premiaykullawan,
munasqanta ruwasqayman hinam pagaykapullawan.
22Diosniypa yachachikuynintam waqaycharqani,
manam huchallikurqanichu
nitaqmi Diosmantapas rakikurqanichu.
23Kamachikuynikiqa ñawpaqniypim kachkan,
decretoykimantaqa manam karunchakurqanichu.
24Qayllaykipiqa chuyatam kawsakurqani,
mana allinkunamantam karunchakurqani.
25Chuya kasqayman hinam,
allin kawsasqayman hinam,
Tayta Diosqa premiaykullawan.
26Diosnilláy
kuyapayakuqkunawanqa kuyapayakuqmi kanki,
allin ruwaqkunawanqa allin ruwaqmi kanki.
27Chuya runawanqa chuyam kanki,
millay runawanqa sakrim kanki.
28Uchuychakuqkunatam salvaykunki,
hatun tukuqkunatam ichaqa penqayman churanki.
29Diosnilláy
qanmi achkiykuwaqniyqa kanki,
tutayayniytam kanchaykuwanki.
30Qanwanqa nana-nanaq tropakunatam cheqechisaq,
qanwanqa hatu-hatun perqakunatam tuñichisaq.
31Diospa ñanninqa mana pantayniyuqmi,
Diospa promesankunaqa hapipakunapaqmi,
paypi hapipakuqkunataqa waqaychanmi.
32Diosnilláy, qamllam cheqap Diosqa kanki
qam hina waqaychakuqqa manam hukqa kanchu.
33Diosmi kallpanchaqniyqa,
paymi allin ñanta pusawaqniyqa.
34 #
Hab 3.19. Chakiytapas luwichupata hinaraqmi kallpachin,
orqonkunata kallpaspaypas manam urmasaqchu.
35Paymi guerrapi peleanaypaq yachachiwan,
broncemanta arcowan flechanaypaqmi makiyta kallpanchawan.
36Qanmi harkaykuwaspa salvaykuwanki,
kuyakuynikiwan vencechiwaspam hatunchaykuwanki.
37Mana lluchkanaypaqmi ñanniytapas kichaykunki.
38Qatispam enemigoykunata chinkarachini,
chinkachinaykamam mana kutimurqanichu.
39Pasaypaqtam puchukarachini
manaña hatariy atinankamam ñutuparuni,
chaki plantaywanmi lliwta saruparuni.
40Peleanaypaqmi kallpata qoykuwanki,
enemigoykunatam ñawpaqniypi qonqorachinki.
41Enemigoykunatam qayllaymanta ayqechirqanki,
chaynapim cheqniwaqniykunata tukururqani.
42Qayakuptinkupas manam pipas yanaparqachu;
Tayta Diosta qayakuptinkupas manam uyarimurqachu.
43Ñutu allpata hinam ruwarurqani,
ñanpi mituta hinam llinqaparurqani.
44Llaqtaypa peleakuyninmantam libraykuwarqanki,
nacionkunapa kamachiqnin kanaypaqmi waqaychaykuwarqanki,
mana reqsisqay llaqtakunawanmi serviykachiwanki.
45Mana reqsisqay runakunapa mirayninkunam hatunchawanku
simiyta uyarispam chaylla kasuwanku.
46Mana reqsisqa runakunam hukmanyaspanku
pakakusqankumanta lluptinku.
47¡Tayta Dios kawsachun!
¡Harkaykuqniy Diosyá qapaqchasqa kachun!
¡Waqaychaykuwaspa salvaykuqniy Diosyá
hatunchasqa kachun!
48Rantiypim enemigoykunamanta vengakurun,
llaqtakunatam chaki plantayman churaykamun.
49Llapa enemigoymantam libraykuwanki
contraypi hatariqkunapa hawanpiraqmi churaykuwanki,
wañuchiqkunamantam libraykuwanki.
50 #
Ro 15.9. Chayraykum nacionkunaman qanmanta willakusaq,
takikunawanmi sutikita hatunchasaq.
51Akllakusqayki reytam yanapaspa venceykachinki,
Davidtawan mirayninkunatam wiñaypaq kuyapayaykunki, nispa.
Chuya Qellqa Revisión @ Sociedad Bíblica Peruana, 2012