2 Samuel 20
20
Davidpa contranpi Seba hoqarikusqanmanta
1 # 1 R 12.16; 2 Cr 10.16. Gilgal llaqtapim huk mana allin runa tarikurqa, paymi karqa Benjamín ayllumanta Bicripa churin Seba. Paymi trompetata tocaspan qaparirqa:
Israel runakuna
¡Davidwanqa manam ima ruwananchikpas kanñachu,
Isaipa churinwanqa manam herenciapas rakinakunanchikpaq kanñachu!
¡wasikichikman sapakama ripukusunchik! nispa.
2Chaynapim Israel runakunaqa Davidta saqeruspanku Bicripa churin Sebata qatikurqaku. Judá runakunam ichaqa reyman sayapakuspa Jordán mayu patanmanta Jerusalén llaqtakama rirqaku.
3 # 2 S 16.22. Jerusalén llaqtapi palacionman chayaruspanmi, palacion cuidananpaq saqesqan uywanakusqan chunka warmikunata sapaq wasimanña David churarurqa. Paykunamanta nanachikuspanmi hina kikin uywarqa, ichaqa manañam paykunawan puñurqañachu, viudakuna hinam wañunankukama wichqasqa kawsarqaku.
4Chaymantam Amasata rey kamachirqa:
Kunanmanta kimsa punchawmanmi Judá runakunata huñumunki, hinaspam paykunawan hamunki, nispa.
5Chaymi Amasa rirqa Judá soldadokuna huñumuq, ichaqa manam nisqan punchawpichu kutimurqa. 6Hinaptinmi Abisaitaña David nirqa:
Bicripa churin Sebaqa Absalonmantapas aswan más dañotaraqmi ruwawasun, chaynaqa soldadoykunawan paypa qepanta qatiy, yanqañataq murallasqa llaqtakunata tariruspa pakakuruwachwan, nispa.
7Chaymi Joabpa soldadonkuna, reyta waqaychaq Ceret castakuna, Pelet castakuna hinaspa lliw allinnin qari-qari soldadokunapiwan Jerusalén llaqtamanta Abisaiwan lloqsispa Bicripa churin Sebata qatirqaku. 8Gabaón llaqta law hatun rumipa hichpanpi kachkaptinkum Amasa hamurqa paykunawan tupaykuq. Joabmi soldado pachayuq kachkarqa, weqawninpiñataqmi vainanpi espada watasqa kachkarqa. Joab ichiptinmi vainanmanta espada wichirurqa. 9Chaymi Amasata rimaykuspan Joab nirqa:
¿Hawkallachu kachkanki wawqelláy? nispa.
Alleq makinwanmi barbanmanta hapiykurqa muchaykunanpaq. 10Amasaqa manam musyarqachu Joabpa makinpi espada kasqanta. Qonqaymantam Amasata wiksanpi Joab tuksirurqa chunchulninkunapas pampaman tallikunankama. Chaylla wañurusqanraykum huktawanqa manaña tuksirqañachu. Chaymantañam Joabqa wawqen Abisaipiwan Bicripa churin Sebata qatirqaku. 11Joabpa hukkaqnin soldadonmi Amasapa ayanpa waqtanpi sayaykuspa nirqa:
Joabtawan Davidta kuyaqkunaqa Joabtayá qatichunku, nispa.
12Amasañataqmi ñanpi hinalla yawarninpa hawanpi chutaykachakurqa, hinaptinmi chay soldado sapa pasaqkuna sayaykuspa qawarayasqankuta rikuruspa Amasapa ayanta ñanmanta chakra ukuman suchuchispan pachawan tapaykurqa. 13Ñanmanta suchurachiptinmi runakunaqa mana sayarqakuñachu, Bicripa churin Sebata qatinankupaqmi Joabwanña rirqaku.
14Sebam Israel casta ayllukunapa lawninta pasaruspa Abel-bet-maaca llaqtaman chayarurqa, Bicripa mirayninkunañataqmi huñunakuruspanku llaqtaman paywan kuska yaykurqaku. 15Joabpa tropankunañataqmi Abel-bet-maaca llaqtaman chayaruspanku muyuriqninpi churakururqaku, hinaspam llaqta muyuriq perqapa qepanman allpata montoruspanku llaqta harkaq perqata tuñichiyta qallaykurqaku. 16Chaymi huk yachaysapa warmi llaqtamanta qayaykachakamurqa:
¡Uyariwaychik, uyariwaychik! Joabta niykapamuwaychik kayman hamunanpaq, paywan rimaytam munani, nispa.
17Joab asuykuptinmi chay warmi nirqa:
¿Qamchu Joab kachkanki? nispa.
Joabñataqmi nirqa:
Arí, ñoqam kani, nispa.
Chay warmiñataqmi nirqa:
Kay serviqnikipa rimarisqayta uyariykuway, nispa.
Payñataqmi nirqa:
Uyarisqaykim, nispa.
18Chaymi yapamanta chay warmi nirqa:
Ñawpaq tiempopim kaynata rimaqku: “Pipas tapukuy munaqqa Abel llaqtapi tapukuchun”, nispanku. Chaynatam ima sasachakuytapas arreglaqku. 19Kay llaqtapi kaqkunaqa hawkalla kawsakuq runakunam kaniku chaynataq reypa qatiqnin runakunam. Ichaqa qanmi kay llaqtata chinkarachiypi richkanki. ¿Imanasqataq Tayta Diospa herencianta tuñichiyta munanki? nispa.
20Joabñataqmi nirqa:
Chaytaqa manam piensayllapas-piensanichu, manam tuñichisaqchu nitaqmi purmachisaqchu. 21Manam chaynachu kanqa, Efraín orqokunapi yachaq Bicripa churin Sebam rey Davidpa contranpi hoqarikurun, payllata qoykamuwaychik, hinaptinqa kutikusaqmi kay llaqtamanta, nispa.
Chaymi Joabta chay warmi nirqa:
Chay runapa umanta qoruruspaykum perqapa hawanta wischuramusaqku, nispa.
22Chaymantam yuyaysapa kayninman hina chay warmi rirqa llapa runakunawan rimaq. Hinaptinmi paykuna Bicripa churin Sebapa umanta qoruruspanku Joabman wischuykamurqaku. Chaymi cornetata Joab tocachiptin, llapa runakuna llaqtamanta anchurikuspanku sapakama wasinkuman ripukurqaku. Joabñataqmi Jerusalén llaqtaman kutikurqa reywan kananpaq.
Davidpa yanapaqninkunamanta
(2 S 8.15-18; 1 Cr 18.14-17)
23Chaynapim Joabqa lliw Israel tropakunapa kamachiqnin qeparqa. Joiadapa churin Benaiasñataqmi karqa rey waqaychaq cereteokunapa hinaspa peleteokunapa kamachiqnin. 24Adoramñataqmi karqa impuesto cobraqkunapa kamachiqninku, Ahiludpa churin Josafatñataqmi karqa imapas sucedekusqankunamanta qellqaq. 25Sevañataqmi karqa secretario, Sadocwan Abiatarñataqmi karqaku sacerdotekuna. 26Jair llaqtayuq Irañataqmi karqa Davidpa sacerdoten.
Chuya Qellqa Revisión @ Sociedad Bíblica Peruana, 2012