2 Crónicas 7
7
1 #
Lv 9.23-24. Mañakuyta Salomón tukuruptillanmi nina hanaq pachamanta wichiykamurqa, hinaspam lliw kañana sacrificiotawan wakin sacrificiokuna ofrecesqanta ruparurqa, hinaptinmi Tayta Diospa kanchariynin temploman huntaykurqa, 2chayraykum sacerdotekunapas Tayta Diospa templonman mana yaykuyta atirqakuchu. 3#1 Cr 16.34; 2 Cr 5.13; Esd 3.11; Sal 100.5; 106.1; 107.1; 118.1; 136.1; Jer 33.11.Israelpa mirayninkunañataqmi nina wichiykamusqanta hinaspa Tayta Diospa kanchariynin temploman huntaykusqanta qawaykuspanku, uyankuta pampakama kumuykachispa Tayta Diosta kaynata yupaycharqaku:
“Tayta Diosqa ancha kuyakuqmi,
kuyakuyninpas wiña-wiñaypaqmi”, nispanku.
4Chaymantam reywan Israelpa llapallan mirayninkuna sacrificiokunata Tayta Diosman ofrecerqaku. 5Rey Salomonmi Tayta Diospaq ofrecerqa iskay chunka iskayniyuq waranqa torokunata hinaspa pachak iskay chunka waranqa ovejakunata.
Chaynatam reywan Israelpa mirayninkuna Tayta Diospa templonta dedicarqaku.
6Sacerdotekunapas imam ruwanankutam ruwarqaku, levitakunañataqmi rey Davidpa ruwachisqan tocanakunata tocaspanku Tayta Diosman graciasta qospanku Davidpa ruwasqan takita kaynata takirqaku:
“Paypa kuyakuyninqa wiña-wiñaypaqmi”, nispanku.
Llapa sacerdotekunam trompetata tocarqaku levitakunapa ñawpaqninpi, Israelpa mirayninkunañataqmi sayachkarqaku.
7Rey Salomonmi Tayta Diospa templonpa ñawpaqninpi kaq patiota dedicarqa, dedicarqaqa llapa lliw kañana sacrificiotawan Dioswan allinlla kasqankumanta ofrendakunata chaypi ofrecesqanraykum. Chaytaqa ruwarqa, lliw kañana sacrificiota, kawsaykunamanta ofrendakunata hinaspa wirakunata kañananpaq broncemanta ruwachisqan altar mana haypasqanraykum.
8Chaypim rey Salomonwan Israelpa mirayninkuna hatun fiestata qanchis punchawpuni ruwarqaku; chaypaqmi Israel mirayninkuna huñunakamurqaku Hamat llaqtaman yaykunamanta qallaykuspa Egipto chaki wayqokama. 9Pusaq kaq punchawpiñataqmi hatun huñunakuyta ruwarqaku, chaytaqa ruwarqaku qanchis punchawnintin altarta dedicaspanku qanchis punchawnintin hatun fiestata ruwasqankuraykum. 10Qanchis kaq killapa iskay chunka kimsayuq punchawninpim, runakunata rey aviarurqa wasinkuman kutikunankupaq. Paykunam kusisqa ripukurqaku Davidpaqpas, Salomonpaqpas chaynataq Israelpa mirayninkunapaqpas Tayta Dios allinkunata ruwasqanrayku.
Salomonwan pactota Dios ruwasqanmanta
(1 R 9.1-9)
11Tayta Diospa templontapas, kikinpa palaciontapas chaynataq tukuy ima ruway munasqantapas rey Salomón qespirachiptinmi, 12tuta rikuriykuspan Tayta Dios nirqa:
Mañakuynikitam uyariykuyki, hinaspaymi kay templota akllaykuni sacrificiokunata ofrecemuwanankupaq.
13Chaynaqa, usyarachimusqayrayku mana paramuptin, aqaruwaykunata kachaykamuptiy chakrapi kawsaykunata mikuruptin otaq peste onqoykunata llaqtayman kachaykamuptiy, 14sichum sutiyta hatunchaq llaqtay uchuychakuspan qayakamuwaspa maskawanqa hinaspa tukuy mana allin kawsayninmanta wanakuspa ñoqaman kutirikamuwaptinqa, hanaq pachamantam uyariykamusaq hinaspam huchankunata pampachaykuspay allpankutapas allinyachisaq.
15Kunanmantaqa kay sitiomanta mañakamuwasqankutam chaylla uyariykamusaq. 16Kunanmi akllakuspay kay templota ñoqallapaqña sapaqchani sutiy wiña-wiñaypaq reqsisqa kananpaq. Kay templotaqa qawaspaymi tukuy sonqoywan nanachikusaq.
17Sichum taytayki David hina ñoqapa qayllaypi kawsaspa tukuy kamachisqayta ruwaspayki kamachikuyniykunata hinaspa decretoykunata kasukuptikiqa, 18#1 R 2.4.ñoqam taytayki Davidman nisqaypi hina munaychakuynikita takyachisaq. Paytam nirqani: “Mana tukuytam miraynikikunamanta Israel nacionpi munaychakuq kanqa”, nispay.
19Sichum qamkuna ñoqamanta karunchakuruspa qosqay decretokunata kamachikuykunata mana kasukuspa huk dioskunataña qatispa yupaychaptikichikqa, 20ñoqam qosqay allpamanta qarqorusqaykichik, akllakusqay templotapas chinkarachisaqmi, hinaptinmi llapa runakunapa penqaspa burlakunan kankichik.
21Kay suma-sumaq templotapas purmasqataña qawaykuspankum, haykam pasaqkuna admirasqallaña tapukunqaku: “¿Imanasqataq Tayta Diosqa kay naciontawan, kay templotaqa kaynata ruwarun?” nispa.
22Hinaptinmi kaynata ninqaku: “Ñawpaq taytankupa Egiptomanta hurqomuqninku Tayta Diosta saqeruspanku huk dioskunataña servisqankuraykum paykunaman kay hatun mana allinkunata kachaykamun”, nispanku.
Chuya Qellqa Revisión @ Sociedad Bíblica Peruana, 2012