2 Crónicas 26
26
Rey Uziaspa munaychakusqanmanta
(2 R 14.21-22; 15.1-7)
1Judá nacionpi llapa runakunam Amasiaspa rantinpi churin Uziastaña rey kananpaq churarurqaku, payqa chunka soqtayuq watanpim kachkarqa. 2Amasías wañuruptillanmi, churin Uziasqa Elot llaqtata musoqmanta hatarichispan Judá nacionpaq kutichikurqa.
3Uziasqa chunka soqtayuq watanpi kachkaspanmi munaychakuyta qallaykurqa, Jerusalén llaqtapim pichqa chunka iskayniyuq wata munaychakurqa. Mamanmi karqa Jerusalén llaqtayuq Jecolías.
4Uziasqa taytan Amasías hinam Tayta Diospa qayllanpi allin kaqkunata ruwarqa. 5Zacarías kawsanankamaqa Tayta Diostam allinta maskarqa, Zacariasmi Tayta Dios respetayta yachachirqa. Tayta Diosta maskasqanraykum anchata bendecirqa.
6Uziasmi filisteokunawan peleananpaq lloqsispan Gat llaqtapa, Jabnia llaqtapa hinaspa Asdod llaqtapa murallankunata tuñirachirqa; hinaspam Asdod llaqtapiwan filisteokunapa allpanpipas llaqtakunata hatarichirqa. 7Diosmi yanaparqa filisteokunawan, Gur-baalpi yachaq Arabia runakunawan chaynataq Amón runakunawan peleaptinpas. 8Amón runakunam rey Uziasman impuestota pagarqaku, hinaptinmi ancha reqsisqa kayninpas Egipto nacionpa linderonkamaraq chayarqa, payqa llumpay atiyniyuqmi rikurirurqa.
9Rey Uziasqa Jerusalén llaqtapipas torrekunatam ruwachirqa, chaykunatam ruwachirqa “Esquina punku” sutiyuq punkupa altonpi, “Qechwaman qawaq” sutiyuq punkupa altonpi hinaspa esquinapa altonpipas, chaykunatam sumaqta takyachirqa. 10Chunniqpipas torrekunatam ruwachirqa, pozokunatapas achkatam uchkuchirqa; chaykunataqa ruwachirqa achka animalniyuq kasqanraykum, chay animalninkunam tarikurqa orqokunapi hinaspa pampakunapi. Kapurqataqmi uvas chakrankunapi, huertankunapi hinaspa wakin chakrankunapi llamkaq runankunapas, paytaqa chakrapi llamkaymi gustarqa.
11Kapurqataqmi guerrapi peleaq soldadonkunapas, paykunam guerraman tropa-tropa lloqsiqku reypa secretarion Jehielpa lista ruwasqanman hina chaynataq reypa serviqnin Maasiaspa rakisqanman hina; chay tropakunapa kamachiqninmi karqa reypa churasqan Hananías. 12Ayllunkuman hina kamachikuqkunam karqaku iskay waranqa soqta pachaknin allinnin qari-qari soldadokuna. 13Paykunam kamachirqaku kimsa pachak qanchisniyuq waranqa pichqa pachaknin allinnin qari-qari soldadokunata. Paykunam enemigonkunapa contranpi reyta yanapaqku. 14Paykunapaqmi rey Uzías ruwachirqa: Escudokunata, lanzakunata, qasqotawan wasa harkachikunata, flechakunata hinaspa warakakunatapas. 15Jerusalén llaqtapim, torrekunapa hinaspa murallakunapa esquinankunapi kananpaq, yachayniyuq runakunawan guerrapaq maquinakunata ruwachirqa, chaymanta flechakunawan flechanankupaq hinaspa hatun rumikunawan chamqanankupaq. Chay ruwasqankunawanmi karu llaqtakunapipas ancha reqsisqa rikurirurqa, Admirakuypaqta Dios yanapasqanraykum ancha atiyniyuq rikurirurqa.
16Ichaqa ancha atiyniyuq rikuriruspanmi Uziasqa llumpay hatun tukuqllaña rikurirurqa chaynapim wichirurqa. Hatun tukuyninman hinam Tayta Diospa contranpi hatarispan, huk punchawmi templonman yaykuspan altarpi inciensota kañarqa, chay ruwayqa sacerdotekunallapa ruwanan kachkaptin. 17Paypa qepantam sacerdote Azarías yaykururqa pusaq chunka allinnin qari-qari sacerdotekunawan, 18#Ex 30.7-8; Nm 3.10.paykunam rey Uziaspa contranpi sayaruspanku nirqaku:
Rey Uzías, Tayta Diospaq inciensotaqa manam qamchu kañanayki, chaytaqa Aaronpa miraynin sacerdotekunallam ruwananku, ñoqallaykum chaykunata ruwanaykupaqqa sapaqchasqa kaniku. Chaynaqa, kay santuariomanta lloqsiy, kay ruwasqaykiwanqa Tayta Diospa contranpim sayarirunki, chayraykum Tayta Diosqa manaña hatunchasunkiñachu, nispanku.
19Hinaptinmi rey Uziasqa incienso qontichinata hapirayachkaspan, llapa sacerdotekunapaq sinchita piñakururqa. Chaymi Tayta Diospa templonpi sacerdotekuna qawachkaptinku, incienso kañana altarpa waqtanpi sayachkaptin lepra onqoy urkunpi rikurirurqa. 20Sumo sacerdote Azariaswan llapa sacerdotekuna qawaykuptinkum reypa urkunpi lepra kachkasqa, chaymi templo ukumanta utqayllamanña lloqsichimurqaku, paypas leprawan Tayta Dios castigasqanta qawakuykuspanmi utqayllamanña lloqsimurqa.
21Chaynapim rey Uziasqa wañukunankama lepra onqoywan karqa, chaymi sapaq wasipiña yacharqa, Tayta Diospa templonman yaykunanmantapas qarqosqam karqa. Hinaptinmi churin Jotamña quejakunata arreglaspan munaychakurqa.
22Uziaspa imaynam kawsasqanwan imakunam ruwasqanpas, qallariyninmanta tukupayninkamam Amospa churin profeta Isaiaspa qellqasqan libropi kachkan. 23#Is 6.1.Uzías wañukuptinmi, leprawan wañusqanrayku ñawpaq taytankunapa sepulturanpa hichpanpi pamparurqaku, chay sepulturaqa tarikurqa reykunapa pampakunan sitiopim. Paypa rantinpim churin Jotamña munaychakurqa.
Chuya Qellqa Revisión @ Sociedad Bíblica Peruana, 2012