2 Crónicas 2
2
Rey Hiranwan contratota Salomón ruwasqanmanta
(1 R 5.1-18; 7.13-14)
1Rey Salomonmi tantearurqa Tayta Diospaq templo ruwayta hinaspa palacion ruwaytapas. 2Chaypaqmi Salomón akllarqa qanchis chunka waranqa qepiqkunata, pusaq chunka waranqa rumi labraqkunata hinaspa kimsa waranqa soqta pachak capatazkunata.
3Chaymantam Tiro llaqtapa reynin Hiramta Salomón kaynata nichimurqa: Imaynam taytay Davidman wasinta ruwachinanpaq cedro qerukunata apachimurqanki, chaynayá ñoqamanpas palacioyta ruwanaypaq apachimuway. 4Ñoqam yupaychasqay Tayta Diospa templonta ruwasaq, miski asnaq inciensota paypa qayllanpi kañanaypaq, patanasqa tantatapas sapa kutilla ofrecenaypaq, sapa achikyayta, sapa tardeykuyta, samana punchawkunapi, musoq killakunapi, Diospa fiestankunapi Tayta Diosman lliw kañana sacrificiota ofrecenaypaq. Chaykunaqa wiña-wiñaypaqmi Israel nacionpi ruwasqa kanqa.
5Templo ruwasqayqa hatunmi kanqa, Diosninchikqa kay pachapi llapallan dioskunamantapas ancha hatun kasqanrayku. 6#1 R 8.27; 2 Cr 6.18.Ichaqa ¿pitaq paypaq templo ruwayta atinman, cielokunapas paypaq mana haypachkaptinqa? ¿Pitaq ñoqaqa karqani templonta ruwapuspay paypa qayllanpi inciensollataña kañanaypaqpas?
7Chaynaqa, qorimanta, qollqemanta, broncemanta, fierromanta, puka qaytumanta, grosella qaytumanta hinaspa azul qaytumanta tukuy imapas ruway yachaqkunatawan tallay yachaqkunatayá kachamuway, chaynapi Taytay Davidpa akllasqa maestrokunawan kuska llamkanankupaq. Paykunam Judá nacionpi hinaspa Jerusalén llaqtapi kachkanku.
8Apachimuwaytaq libanomanta cedro qerukunatawan, ciprés qerukunata hinaspa sándalo qerukunatapas. Ñoqaqa yachanim serviqnikikunaqa Líbano montepi qerukunata kuchuy yachasqankuta; chaynaqa serviqniykunam qampa serviqnikikunata yanapanqa, 9chaynapi qerukunata achkallataña huñumunankupaq, templo ruwasqayqa ancha hatun hinaspa suma-sumaqmi kanqa.
10Qeru kuchumuq serviqnikikunapaqmi qosaq tawa waranqa tawa pachaknin tonelada trigota, tawa waranqa tawa pachaknin tonelada cebadata, tawa pachak tawa chunka waranqa litro vinota hinaspa aceitetapas hina chaynata, nispa.
11Hinaptinmi Salomonman Tiro nacionpa reynin Hiram kaynata qellqarqa: Tayta Diosmi llaqtanta kuyaspan paykunapa reynin kanaykipaq churasurqanki. 12Kay pachatapas hanaq pachatapas unanchaq Israelpa Diosninyá yupaychasqa kachun. Paymi rey Davidman qoykurqa yachaysapa, allin tanteoyuq, allin yuyayniyuq churita, chaynapi Tayta Diospa templontawan yachanan palaciota ruwananpaq.
13Ñoqam Hiram-abita kachamuyki, payqa allin yachayniyuq hinaspa tukuy imakuna ruway yachaqmi. 14Payqa Dan ayllumanta kaq warmipi Tiro llaqtayuq runapa churinmi. Yachanmi qorimanta, qollqemanta, broncemanta, fierromanta, rumimanta hinaspa tablamanta tukuy ima ruwaytapas, yachantaqmi grosella qaytumanta, morado qaytumanta, lino qaytumanta hinaspa puka qaytumanta tukuy ima ruwaytapas; chaynataq tukuy imapi tallaytapas hinaspa llapa dibujokuna ruwaytapas. Paymi maestroykikunawan hinaspa taytayki Davidpa contratasqan maestrokunawan kuska llamkanqa.
15Chaynaqa reynilláy, kunanyá nisqaykiman hina, trigota, cebadata, aceiteta hinaspa vinota kay serviqnikikunaman apachimuwayku. 16Ñoqaykuñataqmi mañakusqaykiman hina Líbano montemanta qerukunata kuchumusaqku, hinaspam Jope llaqtakama lamar qochanta balsakunapi aparamuptiyku Jerusalén llaqtaman apachinki, nispa
17Salomonmi yupachirqa Israel nacionpi huklaw llaqtayuq runakunata, payqa yupachirqa taytan Davidpa yupachisqanmanta qepatañam. Yuparuptinkum karqa pachak pichqa chunka kimsayuq waranqa soqta pachaknin runakuna. 18Paykunamantam akllarqa qanchis chunka waranqata rumi qepiqpaq, pusaq chunka waranqata orqopi rumi labraqpaq, kimsa waranqa soqta pachaktañataq chay llamkaqkunata llamkachiqpaq.
Chuya Qellqa Revisión @ Sociedad Bíblica Peruana, 2012