1 Tesalonicenses 4
4
Diospa agradonpaq kawsanamanta
1Wawqe-panillaykuna, qamkunatam yachachirqaykichik Diospa munasqanman hina kawsanaykichikpaq. Chaynatam qamkuna kawsachkankichik, Señor Jesusraykum ruegakuspa mañakuykiku aswanraq chaynata kawsanaykichikpaq.
2Qamkunaqa yachankichikñam Señor Jesuspa kamachikuynin qomusqaykutaqa. 3Diosqa munan mana huchayuq kanaykichiktam hinaspa huchapakuymanta rakikunaykichiktam. 4Sapakamayá warmillaykichikwan kaychik ama huchallikuspa chaynataq respetaspa. 5Amayá aychaykichikpa mana allinkuna munaynintaqa ruwaychikchu, Diosta mana reqsiq runakuna hinaqa. 6Chaynaqa, amayá pipas runamasintaqa kamichunchu nitaq engañachunchu, Señorqa tukuy chaykunataqa vengakunqam. Ñam chaykunamantaqa willarqaykikuña. 7Diosqa manam millakuypaq hucha ruwaypi purinapaqchu qayawarqanchik, aswanqa payllapaqña kawsanapaqmi. 8Chaynaqa, kay yachachisqayta wischupakuqqa, manam runatachu wischupakun aswanqa Chuya Espíritu qosuqnikichik Diostam.
9Wawqe-panintin kuyanakuymanta qellqamunaykutaqa manañam necesitankichikñachu, Diosqa ñam yachachisurqankichikña imaynam kuyanakunaykichikmantaqa. 10Chaynatam Macedonia lawpi llapallan wawqe-panikunawanpas ruwachkankichik, chaywanpas ruegakuykichikmi aswan mastaraq kuyanakunaykichikpaq. 11Hawkalla kawsakuspayá imam ruwanaykichikta ruwaychik, makikichikwanyá llamkaychik imaynam kamachisqaykuman hina. 12Chaynapi Diosta mana reqsiqkunapas respetasunaykichikpaq chaynataq imapas mana pisipusunaykichikpaq.
Señor Jesuspa kutimunanmanta
13Wawqe-panillaykuna, munachkanikutaqmi wañuqkunamanta yachanaykichiktapas, chaynapi mana suyakuyniyuqkuna hina ama llakikunaykichikpaq. 14Imaynam Jesuspa wañukusqanpi hinaspa kawsarimusqanpi creenchik, chaynataqmi Jesucristopi iñikuspa wañukuqkunata Jesucristotawan kuskata Dios kawsarichimunanpipas creenchik.
15Kaykunataqa kikin Señorpa nisqanman hinam nikiku, Señorpa kutimunankama qepaspa kawsaqkunaqa manam wañuqkunataqa ñawpasunchu. 16Kikin Señorpunim uraykamunqa, hanaq pachamanta kamachikuy qapariyninwan, angelkunata kamachiqpa qayakuyninwan hinaspa Diospa trompetanpa waqayninwan, hinaptinmi Cristopi iñispa wañuqkuna puntata kawsarimunqaku. 17#1 Co 15.51-52.Chaymantañataqmi kay pachapi kawsaqkuna paykunawan kuska altoman hoqarisqa kasunchik puyukunapa kasqanpi Señorwan tupananchikpaq, paywanmi wiñaypaq kasunchik. 18Kay palabrakunawanyá kallpanchanakuychik.
Chuya Qellqa Revisión @ Sociedad Bíblica Peruana, 2012