1 Samuel 4
4
Diospa Arcanta filisteokuna aparusqanmanta
1Chay tiempopim filisteokuna huñunakururqaku Israelpa mirayninkunawan guerrapi peleanankupaq, chaymi Israelpa mirayninkuna lloqsispanku carpankuta sayachirqaku Eben-ezerpa hichpanpi. Filisteokunañataqmi carpankuta sayachirqaku Afec llaqtapi. 2Chaymantam filisteokuna rirqaku Israelpa mirayninkunawan guerrapi peleanankupaq. Hinaspam Israelpa mirayninkunata venceruspanku tawa waranqa runakunata wañurachirqaku. 3Chaymi Israelpa tropankuna campamentoman kutiykuptinku ancianokuna nirqaku:
¿Imanasqataq Tayta Diosqa filisteokunawan vencerachiwanchik? Rispanchik Silo llaqtamanta aparamusunchik Diospa contrato ruwasqan Arcata, chaynapi chawpinchikta rispan enemigonchikkunamanta salvawananchikpaq, nispanku.
4 #
Ex 25.22. Chaynapim runakunata Silo llaqtaman kacharqaku, querubinkunapa chawpinpi tiyakuq Tukuy Atiyniyuq Tayta Diospa contrato ruwasqan Arcata apamunankupaq; Eliypa churin Ofniwan Fineespas Arcawan kuskam hamurqaku. 5Tayta Diospa contrato ruwasqan Arcata campamentoman chayarachimuptinkum, Israelpa tropankuna allpapas kuyurinankama kusikuymanta qaparirqaku.
6Filisteokunañataqmi qaparisqankuta uyariruspanku tapunakurqaku:
¿Imanasqataq hebreo castakunapa campamentonpi chaynataña qaparichkanku? nispanku.
Chaymantañam yacharurqaku Diospa contrato ruwasqan Arcata campamentoman aparamusqankuta. 7Chaymi filisteokuna mancharikuspanku ninakurqaku:
¡Diosmi campamentonkuman chayaramun! ¡Imaynaraq kasunchik! Ñawpaqtaqa manam kaynachu karqa! 8¡Imaynaraq kasunchik! ¿Pitaq librawasunchik chay Atiyniyuq Diosninkumanta? Chay Diosmi chunniqpipas tukuy rikchaq ñakariywan Egipto runakunata castigarqa. 9¡Filisteokuna ama hukmanyaychikchu! ¡Kallpanchakuychik peleanaykichikpaq! ¡Chaynapi paykunawan servichikusqaykichikta hina ama hebreo runakunapa munaychakusqan kanaykichikpaq! ¡Chaynaqa, allin qarikuna hina peleaychik! nispa.
10Chaymi filisteokuna peleaspanku Israel runakunata vencerurqaku, hinaptinmi Israel tropakuna kayman chayman ayqekurqaku. Achka-achka runakuna chaypi wañuruptinmi, Israelpa kimsa chunka waranqa chakiwan puriq tropankuna wañururqaku. 11Diospa contrato ruwasqan Arcatapas filisteokunam qechururqaku, Eliypa churin Ofnitawan Fineestapas iskaynintam wañurachirqaku.
Eliypa wañukusqanmanta
12Ichaqa Benjamín ayllumanta guerrapi peleaq runam kallpaspan chay punchawlla Silo llaqtaman chayarurqa, pachanpas llikipasqa hinaspa umanpas allpallaña. 13Chayaruptinmi sacerdote Eliyqa uyan-uyanlla ñanpa patanpi tiyachkasqa. Paymi llumpay llakisqa kachkarqa Diospa contrato ruwasqan Arcamanta. Chay kallpaq runam llaqtanman chayaruspa willakurqa imam pasakusqanmanta, hinaptinmi llaqtantin runakuna qaparispa waqakurqaku. 14Qaparisqankuta uyarispanmi Elí nirqa:
¿Imanasqataq chaynataña qaparichkanku? nispa.
Hinaptinmi chay runa utqayllamanña kallpaspan Eliyman willaykurqa. 15Eliyqa isqon chunka pusaqniyuq watanpiñam karqa, ñawsayaruspanmi manaña rikukuytapas atirqachu. 16Chay runam sacerdote Eliyta nirqa:
Ñoqam guerramanta ayqeramuni, nispa.
Chaymi Elí tapurqa:
¿Imataq pasakun kuyasqay churillay? nispa.
17Hinaptinmi chay willakuqñataq nirqa:
Israel runakunam filisteokunamanta lluptikunku, runakunapas achkallañam wañurunku. Churiki Ofniwan Fineespas iskayninkum wañurunku, Diospa Arcantapas filisteokunam qechuruwanku, nispa.
18Diospa Arcanmanta willaykuptinmi, Eliyqa tiyasqanmanta punku lawman qepaman wichiykurqa, hinaspam umanta takakuruspam yuyaqña kasqanrayku chaylla wañukurqa. Payqa tawa chunka watam Israel runakunapa kamachiqnin karqa. 19Eliypa llumchuyninmi otaq Fineespa warminmi wiksayuq kaspan onqonan hichpapiña kachkarqa. Diospa Arcanta qechurusqankuta chaynataq suegronpas qosanpas wañukusqanta yachaykuspanmi, wachakuywan hapirachikurqa, hinaspanmi chay ratolla wachakururqa. 20Wachakuywan wañuy patanpiña kachkaptinmi yanapaqninkuna nirqaku:
Ama manchakuychu, qari wawatam wachakurunki, nispanku.
Paymi ichaqa manaña imatapas nirqachu nitaqmi musyakurqañachu. 21Wawantam suticharqa #4.21 Hebreo simipi Icabod ninanqa “Atiymi chinkarun” ninanmi.Icabodwan: “Tayta Diospa atiyninmi Israelmanta chinkarun”, nispa. 22Chaynataqa nirqa Diospa Arcan qechusqa kasqanraykum chaynataq suegronpiwan qosan wañukusqanraykum.
Chuya Qellqa Revisión @ Sociedad Bíblica Peruana, 2012