Jemyis 1
1
1Jemyis, Shekwoyi tnutnuyi jesnu n Dagayi Yeisu Kirisiti nyai.
Kwo lo da abye ngwnu-awoceaba nu, n ɓa gnamyi fyilo n abyedo atasni nyi.
Gnaɓyi.
Amwumwui ɓədo n aɓəmwutui
2Əmi azaje azanugbai ɓədo n əmi amapwii, əsahosahoi n fya gwnudo n amwumwui bəgye gbowogbowo; fyaa kwo gwo nge agbmada tnadodnai nya nu. 3Ntuge fye kpəlo nge əfye gaiciyaga mwumwu, kwo ɓe n əmìfyii nu. 4Fa əfye əmìfyi kwa kwu əkwo tnutnu zozhni nabai n fye ɓa kwu akpikwo jesnu n nunui, n tna nyahonyahoi əsnagyii. 5Ngye əzaho lo n əfye n tna wyemwa, akpəge wo nya Shekwoyi əkwo ɓo; n əwo nu ga aza vnyanya n əɓwai loloiya n tna aɓəma nyi, njesnu a ɓa ga wo. 6Ama əsa n wa nyaɓo ncei, ɓəshishi nu waa gaiciya ga jesnu to wa fyi abwugba-aba m, ntuge əza n wo fyi abwugba-aba, wo wu ngye nuwna dokwo nu n shikwo, n əse pyekwo gwnulo; kwoi lo kwoi ɓe nyi. 7Əza yi pya to tuwye nge wo ɓa ɓwa nyaho shi n Dagayi m. 8Əza yi pya wo n abwugbai fyilo ngwnu-aba; wo ta myitu n əɓo gbmanyi, n aɓo vnyanya n wo zhni nyi m.
9Avyiyi n ɓa fyilo n awyekwo n nyipma nyi; kwo kwnuce lo ɓa gbma fyi n əɓa mwamwa yaakwo n Shekwoyi wo la ɓa latu nyi. 10Ama anyaɓwayi ɓa gbma n tukwo lawui n kwo la zè əɓa avnyinkwo ɓo nyi, ntuge ɓa ɓəi fyi ɓa duya ngye mamawyí bmana nya. 11Ntuge nyipyei kpeɓe n əkwo nagyii njesnu kwa kwu mamawyí ɓwá; əkwo afnyitolo ɓa kaya zhi n əknyi njesnu əkwo bmyabmya kwa kwu zhniagbma. N ɓwasnu nlai nu n anyaɓwayi ɓə ɓwuwye vnyanya n əɓa anyaɓwai n ɓa la yezhi n əɓa aɓwazei nyi.
12Əza anabəlikada nu n waa əwohni wnashì dna ń mwumwui, ntuge she wo ɓə kwu nasala gyi n mwumwui, əza yi ɓə gwo fnunyi wyewyeyi nya n Dagayi wo la əkwo əgbe shi wa ga aza yi n ɓa ye wo nyi.
13Əsa n əza ɓwa mwumwu, əza yi to gna, “Shekwoyi nu gnyi woi mwu mi m,” Ntuge a taa tu Shekwoyi mwi ń ɓənukwoi m, kwo nge wa mwi zahozahoyi m. 14Ama zahozahoyi ɓwa mwumwu əsa nu n əwohni ɓəpwawo nukwoi ɓədo n aɓəwyedai gnyi wo lo ncei nu. 15Nlonu, əsa n shakpe kwo la nubwo la, kwo ma leifyi nu, jesnu she leifyi la zo mwa, kwa ma əfyí.
16Əmi azaje azanugbai n amapwii, fye to dna fyehni kwoce m. 17Nyaga manai n nunui tnagyifyi dəhodəhoi, kwo gbmi n əshemi nu, n kwo shniɓe ń Dada əshemi abwuznagna nya aba, əwo n wo ta shnaba ngye ajejelukwo nyi m. 18Əwo nu ɓə knyí wa ma əyi dna n ɓədagbma gaiciyanunui nya, nabai n yi ɓə kwu zè anyagyigyi kpmisnui ho pya, n anya zhnizhniyi vnyanya n wo ɓə zhni nyi.
Tnubwakna n ɓəzhnii
19Əmi aza ayeyeyi azanugbai n amapwii, fye kwu ɓəye wnawye: zahozahoyi wo pye n tnubwaknai, ama wo to pye n ɓədai m, njesnu wo to pyé n minagyi gyii m, 20ntuge zanyikwoci minagyi ta gbmiɓe n ɓəfyecezhnii n Shekwoyi n əkwo əɓoi pma nyi m. 21Ntucenu, fye kwu asisiɓozhni ɓo fa vnyanya jesnu n ɓənukwoi n kwo la gakpe laɓa nyi, dna n tukwogba, fya gwo ɓədagbma n a la kwo bye dna n fye nyi, n əkwo nu ɓa myi kwa gnyi fye.
22Fye to ɓwa ɓədagbma tnubwa knakna nu m, kwa zhni fya dna əfyehni kwoce m. Ama fye zhni əɓo ń kwa gna a zhni. 23Zahozahoyi n wo kna ɓədagbma tnubwa ama to wa zhni əɓo n kwa da nyi m, wo wulo ngye əza nu n wo shi əwohni awyeba awye dna n maganyi. 24Jesnu shi wo kwu əwohni zo awyeshi wa lakala nsayisayii waa zamwi shi əwo awyeba n wu lo. 25Ama zahozahoyi n wo shi owa nunui awye byiwuu n kwo ga əza loloya nyi, njesnu n wa gwodu dna n kwo, to wa zo əɓo amwi n wo kwu wo nyi m, ama woi zhni kwo, wo ɓa ɓwa anabəlika n əɓo n wo zhni nyi.
26Aza yi n ɓa gye əɓahni nge ɓa zhni Shekwoyi avyiyi nu, ama to ɓai myi n əɓa anyitala wnashi m, ɓa dna əɓahni nu kwoce, jesnu əɓa Shekwoyi vyi kwnunu kwo zhni gbəloi nu. 27Shekwoznashni zokwo n Shekwoyi əyi Dada gwo nge tnadodnai jesnu tnaɓətui, əkwo nu nyi: a shi akwuwyi awye ɓədo n anyigbayii dna n əɓa azhnìgye sa. Njesnu əza wo la əwohni wnakna to wa ye nge anyìgyi cegyetu nya kwa wnu wo ya m.
اکنون انتخاب شده:
Jemyis 1: GNB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.