1 Atasaloniyi 3
3
1Ntulonu she yi ɓə gye kwoi du yi akalá, ya gye kwo dulo ya kwu kpefyi n Atens əyihniyihni. 2Ya tnu fye n Timwotii, n wo zhni əyido nyi jesnu Shekwoyi tnutnu kwnuzhniyi dna n Kirisiti nabagyi manai gnamyi, nabai wa dna fye bwugbakalá jesnu wa ga fye agwumyi dna n əfye gaiciyaganunui. 3Nabai n əzaho taa ɓwa ashnaje n amwumwu ye ɓo m. Ntuge fye kpəlo dəidəi nge a ɓə zhni yi n əɓa ɓo nu. 4Ɓəhnihni, əsa n yi ɓə kwnusnu n fyei nyi, yi ɓə zhni yii gna fye ciici nge a ɓə wu yi awyesnugbegye ɓo. Njesnu kwaa zè nlonu, ngye shi fye kpəlo nyi. 5Ntucenu, she mi to ɓə yee myi n ɓəye shi m, ma tnu nabai a kpe əfye gaiciyaganunui əɓo ye. Mi ɓə gnyi mii wodna nu nge kwo a ɓa gye əzamwuyi wo kwu fye mwi jesnu əyi tnutnu kwo kwu zè gbəloi.
Timwoti əɓədokwu wu agwumyizhi nya
6Ama nsaiye Timwoti n la jezeɓe da yi woi gbmi n əfye aba, wonyi la ɓe yi n nabagyi manai ntu əfye gaiciyaganunui ɓo n yeyei. Wo kwu gna yi nge fye pá yi ɓo lo n bwugbadai ciici jesnu nge awyekwo fye lo, fya gye yi, n ɓwasnu shi awyekwo yinyi lo ce ya gye fye nyi. 7Ntucenu, əyi azaje azanugbai n anyikwozai, dna n əyi bwugbawnu vnyanya n awyesnugbegye ɓoi, yi ɓə kwu agwumyi ɓwa ń əfye ɓo, ntu n əfye gaiciyaganunui ɓo. 8Ntuge nsaiye nu n yi gyianyì ɓəhnihni nya, shikwonyi nge fye myizhi lo dna n Dagayi. 9Yi ɓa sa Shekwoyi ami n wunanu n kwnuce n fye ɓo n bwugbabwui vnyanya, n yi ɓwa n əyi Shekwoyi aba ntu n əfye ɓo nyi a? 10N nyipyei n sukwoi yi zhniaduwa n əwyei bmyibmyii nabai n yi ɓə je fye wyegye jesnu yii ga fye ənya n kwo ceya lo n əfye gaiciyaganunui.
11Nsaiye, fa əyi Shekwoyi n Dadai, n əwohni tukwo ɓədo n əyi Dagayi Yeisui, wa gwu zokwo ya ga yi ya ɓe əfye aba. 12Fa Dagayi wa zhni əfye yeye kwa mwaɓe jesnu kwa zheya n fye ga aje, n ɓwasnu shi əyi nya zheya ga əfye nyi. 13Fa wa fyi əfye adu akalá nabai n fye ɓə kwu zhi a tnaɓətui jesnu n gyigyiyi n əyi Shekwoyi aba ɓədo n Dadai, she əyi Dagayi Yeisu ɓə ɓe n əwo agyigyiyii vnyanya.
اکنون انتخاب شده:
1 Atasaloniyi 3: GNB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.