Obadiya 1
1
1Mtuwa Mlungu kayoweriti na Obadiya kuhusu isi ya Edomu.
Mtuwa Mlungu hakayikomangi Edomu
Tupikiniriti ulagilagi kulawa kwa Mtuwa Mlungu,
mlagilagi kalagalirwa pakati pa maisi.
Mgoloki na tugendeni twakalikomi nkondu na wantu yawakala Edomu!
2Mtuwa Mlungu kawagambiri wantu wa Edomu.
Hanikutendi gwahera makakala pakati pa wantu,
hagubeziwi nakamu na woseri.
3Gulizyanga gamweni kuwera gwa mana kuliku wantu wamonga.
Toziya mji gwaku mkulu gwa mliboma lya matalawu magangamara
na pahala paku pa kulikala papampindi palugongu,
su gulitakulira,
gaa yakaweza kunsulusiya pasi?
4“Su nikugambira kuwera ata paguguluka gambira kapungu,
na kunyawa shitukulu shaku pakati pa ntondu,
neni hanikusulusiyi pasi.
Ntakula neni Mtuwa Mlungu.”
5Yawiwa pawakwizira pashiru.
Mewatoli shilii shawashifira.
Pawabenanga zabibu hawaleki ndidini hera,
kumbiti wankondu waku hawakuwagamiziya nakamu.
6Mwenga wiwuka wa Esawu, lunda zenu zoseri zipokwa.
7Woseri yaguwera nawu hawakuwingili kutali na isi yaku,
waganja waku hawakupayili na kukukanka,
walii yaguwaminiti hawakuyambili mgomiziwu,
na gwenga hapeni guvimani
8“Shakapanu Mtuwa Mlungu kalonga hangu.
Shaka ashi haniwaagamiziyi yawana luhala kulawa isi ya Edomu,
na yawana umani kulawa lugongu Esawu.”
9Lishonta kulawa mji gwa Temani, haliweri na lyoga,
na kila yumu mulugongu lwa Esawu hakagusiwi pasi na kulikitulwa.
Toziya ya Edomu kukomangwa
10Gwee Israeli toziya ya makontola yamugatenditi kwa walongu waku
hamsoniziwi na
hagwagamiziwi nakamu.
11Shaka shilii mugolokiti pambwega pamulola hera,
shaka wankondu pawatoriti ulunda wawu.
Mwenga mdoda gambira womberi
yawatoliti lunda ya Yerusalemu,
kwa kugalambula simbi.
12Mnemelerindiri shaka ashi walongu wenu pawaweriti na shiwembu
memuwasekindiri Wayuda ama kuwera na nemeru pawagamiziwitwi.
Memlitumbitindiri shaka shilii wayenu pawaweriti wankulaguwa.
13Memwingilindiri mumji gwa wantu waneni
lishaka pawaweriti na malaguwa,
memuwapokindiri lunda zawu, lishaka lilii lya kulaguwa kwawu.
14Memuwahepelindiri mumapanda njira
na kuwalaga wantu yawatuga isi yawu,
na kuwalaviya kwa wankondu wantu walii yawasigaliti
mulishaka lya ntabiku yawu.
Mlungu hakagatozi maisi
15Mtuwa Mlungu kalonga hangu, Lishaka lyakwiza lyeni neni Mlungu,
hanigatozi maisi goseri.
Gwee isi ya Edomu ntambu yaguwatenderiti wamonga, hanikutenderi na gwenga,
hamkomwi kulinganira na matendu genu.
16Haniwakomangi wantu wa Yerusalemu toziya niwakalalira,
na haniwatendi maisi wagamiri gambira waweritindiri pasipanu.
Ukanka wa Israeli
17Kumbiti kulugongu Sayuni hawaweli walii yawaponikiti
na lweni haluweri lugongu lwa Mlungu.
Shakapanu wiwuka wa Yakobu hawakolimlima kayi isi yayiweriti yawu.
18“Wantu wa Israeli hawaweri gambira motu
na wiwuka wa Yosefu gambira motu gwalipulipu.
Hawaagamiziyi wiwuka wa Esawu gambira motu ntambu yagupambira makota gayuma,
na hapeni kaponiki ata yumu gwawu.
Neni Mtuwa Mlungu, ntakula.”
19Wantu yawalawa Negebu hawakolimlima lugongu Esawu,
walii yawakala Shefera hawakolimlima isi ya Wafilisti.
Waisraeli hawakolimlima isi ya Israeli na Samaria
na wantu wa Benjamini hawakolimlima isi ya Gileyadi.
20Lishonta lya Israeli lyaliweriti muuhamisiwu Babeli
halikolimlima Foyinike mpaka Sarepta.
Wantu wa Yerusalemu yawawera muuhamisiwu Sefaradi
hawayikolimlima miji ya Negebu.
21Lishonta lya Yerusalemu haliyikankali Edomu na kuyikolamlima,
na Mtuwa Mlungu hakaweri Mfalumi.
The Bible version in the Pogoro Language. @The Word for The World International and Pogoro Language translation. All rights reserved.