Mika 3
3
Mika kankuwakalapira walonguziya wa Israeli
1Shakapanu ntakula, mwenga walonguziya wa Israeli mpikinili. Mfirandiri kuyimana toza, 2mwenga yamlema maheri na kufira makontola. Mwenga yamuwawambula likuli wantu waneni, nakuwusiya vinofu mumihonju yawu. 3Guwatabisiya nentu wantu waneni na mwenga muwera gambira wantu yawaliya wantu, muwawambula likuli na kumeganga mihonju yawu vipandipandi na kuhanjanga vinofu gambira vinofu yavitelekwa mushiwiga. 4Shakapanu hamumliliri Mtuwa Mlugu, kumbiti yomberi hapeni kawankuli. Hapeni kapikaniri maluwa genu, toziya mtenda mirandu mikontola.
5Mtuwa Mlungu kalonga hangu kwa wambuyi yawawazyanga wantu wakuyi, wambuyi yawabwera ponga pawapananwa shintu, kumbiti walitanda kulikoma nkondu pawapananwandiri shintu. 6Su pashiru hapizi pota hapamwezi kuwera na malola na lidunyu haliwatendi namtunga. Mshenji hagwinali kwa wambuyi awa na paluwala hapaweri na lidunyu kwawu. 7Walola na watunga hawasoniziwi. Woseri hawanyamali, toziya kwahera lyankulu loseri kulawa kwa Mlungu.
8Kumbiti neni memiziwa makakala na Rohu gwa Mtuwa Mlungu, ugangamala na uwezu, niwubweleri wiwuka wa Yakobu likosa lyawu na kuwagambira Waisraeli makontola gawu. 9Mwenga wakulu wa numba ya Yakobu na wakolamlima wa numba ya Israeli mpikiniri, mwenga yampotuziya lagiru na kila yaliwera teratera. 10Mgunyawa mji gwa Sayuni kwa mwazi na Yerusalemu kwa ukontola. 11Wakulu watenda mahengu gawu kwa swinda, watambika wakuyi wafunda kwa kwanka mpiya, wambuyi watunga kwa mpiya. Womberi walitumba kumtumbira Mtuwa Mlungu, pawalonga, Mtuwa Mlungu kapamuhera na twenga na kwahera madoda yanagatupati.
12Toziya yamwenga wakulu, watambika na wambuyi, Sayuni hayilimwi gambira lirambu, Yerusalemu hayiweri mahami na Numba ya Mlungu hayiweri lidowi.
The Bible version in the Pogoro Language. @The Word for The World International and Pogoro Language translation. All rights reserved.