Hoseya 10
10
1Wantu wa Israeli wawera gambira mzabibu guherepa, mzabibu yagulera mabwajubwaju nentu. Wantu wa Israeli pawaweriti na vintu vivuwa, walinyawiliriti shitalawanda sha mabuhi na isi yawu yongereka kuherepa, wongelekiti kuherepiziya mpanda zawu za kuguwira. 2Miyoyu yawu imema uzyanga. Vinu mpaka mkomangwi kwa makosa genu. Mtuwa Mlungu hakavibomoli vitalawanda vyenu na hakahalibisiyi mpanda zyenu.
3Shakapanu wantu hawalongi hangu, twahera mfalumi toziya tumguwirandiri Mtuwa Mlungu, kumbiti na mfalumi hakatutenderi shishi? 4Yagawera ga nakaka gawera ganakaka ndiri, wangulirapa na kutenda majimiranu yagahera mana, yagafiruwa gaweri gafiruwandiri kayi handa kutomola kwa magugu ga usungu mulirambu.
5Wantu yawalikala Samaria hawalendemeri toziya ya mwana gwa ng'ombi gwa aku Beti Aveni. Wantu wakuyi hawamlaviliri mwana gwa ng'ombi ayu, ata watambika yawamguwira hawamliliri, mana litumbiru lya mwana gwa ng'ombi ayu liwusiwa. 6Shinyagu ashi hashijegwi mpaka Ashuru, handa Ashuru kwa mfalumi mkulu. Wantu wa Israeli hawasoniziwi, wantu wa Israeli hawashiwoneri soni Shinyagu shawu. 7Mfalumi gwa Samariya hakatolwi, gambira shipandi sha mtera pampindi pa mashi. 8Shitalawanda shashiweriti kumigongu aku Aveni, peni wantu wa Israeli wawaguwiriti wamlungu wawu, hapabomolwi. Shakapanu misontu na magugu hayimeri mushitalawanda shawu. Na womberi hawayigambiri migongu, Mtufifi na vigongu, Mtuguwili!
Mlungu kalaviya toza Muisraeli
9Mwenga Waisraeli, mtenda vidoda kwanjira kulii Gibea na mwakali mwankwendereya. Nakaka nkondu hayiwalagi kulawa aku Gibea. 10Haniwagenderi wantu awa wa Israeli yawandekiti na kuwakomanga, wantu wa maisi hawajojoniki kuwakomanga, hawawakomangi toziya ya vidoda vyawu vivuwa.
11Israeli kaweriti gambira mwana gwa ng'ombi yakafunditwi weri, yakawera kala kukomanga viboga. Kumbiti singu yakuyi iherepa hakayitawi shipandi sha shimpingapinga. Yuda hakalimi kwa ligembi lya ng'ombi, nakaka Yakobu hakakwegwi ligembi lya kukomera. 12Mlimi malambu na myali mbeyu ziherepa na myali kwa waminika, su munguwili neni Mtuwa Mlungu na neni handagalili mvula iwatoweri. 13Kumbiti mwenga myala ukontola na mbenanga madoda, mliya mabwajubwaju ga upaya wenu.
Gwenga Israeli gutumbiliti makakala gaku mweni na uvuwa wa mashonta gaku. 14Su wankondu hawawawiziri wantu waku na shibambaza sha maboma gaku goseri hagabomolwi gambira lishonta lya mfalumi gwa Shalimani ntambu yakahalibisiyiti mji gwa Bet Arbeli na wadala pamuhera na wana wawu hawaposholwi na kuhowa. 15Ayi hayiweri kwa mwenga wantu wa Beteli, toziya ya ukontola wenu. Papalangala mfalumi gwa Israeli hakalaguwi kunkondu.
The Bible version in the Pogoro Language. @The Word for The World International and Pogoro Language translation. All rights reserved.