Hoseya 1
1
1Mtuwa Mlungu kayoiweriti na Hoseya mwana gwa Beeri, shaka shilii Uziya pakaweriti mfalumi gwa Yuda na Yotamu pakaweriti mfalumi gwa Yuda na Ahazi pakaweriti mfalumi gwa Yuda na Hezekiya pawakaweriti mfalumi gwa Yuda na Yeroboamu mwana gwa Yoashi pakaweriti mfalumi gwa Israeli.
Mdala gwa Hoseya na Wana wakuyi
2Mtuwa Mlungu pakayoweriti na Waisraeli kupitira Hoseya, su kamgambiliti hangu Hoseya. “Su gugendi gwakayugi mdala mndiyandiya na guleri nayu wana wahumba, mana wantu wa isi ayi watenda ukontola uvuwa toziya wandeka neni.”
3Su, Hoseya kagenda na kumheta mhinga gwa Diblaimu yawamshema Gomeri. Gomeri kapatiti yinda na kumlelera Hoseya mwana mpalu. 4Mtuwa Mlungu kamgambira Hoseya, “Gumpanani mwana ayu litawu lya Yezreeli, mana neni haniwakomangi katepu hera walongu wa Yehu kwa malaga gakagatenda mululalanda lwa Yezreeli. Haniwuhalibisiyi nakamu ufalumi muisi ya Israeli. 5Lishaka ali, ahalibisiyi makakala ga lishonta lya Israeli kululalanda lwa Yezreeli.
6Gomeri kapatiti kayi yinda na kulera mwana mdala. Mtuwa Mlungu kamgambira Hoseya, gumpanani mwana ayu litawu lya yakawonerwandiri lusungu, Toziya hapeni niwawoneri lusungu kayi Waisraeli pota kuwalekiziya. 7Kumbiti haniwawoneri lusungu wantu wa Yuda na kuwalopola. Neni Mtuwa Mlungu na Mlungu gwawu, neni haniwalopoli pota likakala ama mashonta ama pindi ama ligumba ama farasi ama wakwena farasi.”
8Gomeri pakamlekeleziyiti mwana gwakuyi mhinga kunona, kapatiti yinda kayi na kumlelera Hoseya mwana yumonga mpalu. 9“Mtuwa Mlungu kamgambira Hoseya, gumpanani mwana ayu litawu mwenga wantu wa neni ndiri na neni Mlungu gwenu ndiri.”
Israeli wankuyinyawa kayi
10Wantu wa Israeli hawaweri wavuwa gambira mhanga gwa kumpwani gweni gupimika ndiri pota kuwalangika. Peni palii Mlungu pakawagambiriti, mwenga wantu waneni ndiri, vinu hakawagambiri, mwenga mwawana wa Mlungu yakawera mkomu. 11Wantu wa Yuda na Israeli hawaweri pamuhera na kumsyagula mkulu gwawu yumu na weni hawongereki muisi yawu. Lishaka ali lya Yezreeli haliweri likulu.
The Bible version in the Pogoro Language. @The Word for The World International and Pogoro Language translation. All rights reserved.