Lomɛ́ŋ 6
6
Eékúen á kifal, ɔsɔ́tɔ́n é Yésus
1Kiákí túɔ́yitɛ́ ɛ́ɛ́. Tuɛ́kɛɛsikɛnɛn ɛ́ɛ́ túlɔp á kifal ɛ́ɛ́ peseé u Támbák pá naasɔ́ puólíkóoli á? 2Aákóo! Ó pusíó pú kifal tunyɛ pékuen. Tiɛkiɛ́ tunyɛɛ́ pákuand ɔlɔp á kifal? 3Kúnyaánɛ, nuéleme ɛ́ɛ́ pasɔ́ peem túényípítuú é Yésus Kilíis, púnyɛ kɛ́ɛ́yɛ́ é niku túényípítuú ɛ́ɛ́ túpá palatán ɔlɔŋ nɛɛyɛ́ á? 4Kí induén ikáánɛ́ kɛ́ɛ́yɛ́ é niku pótúnyo nɛɛyɛ́, aná Kilíis mɛɛ́nyɔ́k á pilɔ́ŋ á pukaaka pú nukúm nú Támbákɛ́ɛ Síí númenyí wɔ, ɛ́ɛ́ túsɔ́tɔn kusɔ́t kuukɔ́si. 5Ɛ́ kuɛ́n kɔk índɛ tumápílatá mulút tuekú niaŋ niɛ́yɛ́, yá anakáánɛ́ tuányipáánɛ́ papílatán nɛɛyɛ́ ɛ́ kuɛnyɔ́k á pilɔ́ŋ niaŋ niɛ́yɛ́. 6Ɛ́nyɛɛlɛ́ túɔ́p pú peseé ké peseé. Ɛ́ɛ́ pɔ́mɔtɔ́ndɛ́n etényí wáásɔ́ ú pumɔɔndɛ ú insúá ó kolóse ne Kilíis, ɛ́ɛ́ etényí wáásɔ́ ú afalfál katɛk tutiandá apá kiɔ́lí kí kifal. 7Á kiákí ɛ́ɛ́ ewú umeékú nyɛ aŋáŋúnán á kifal. 8Maná índɛ tumekú embúl ne Kilíis, tuápítááka ɛ́ɛ́ tuɔ́nyísɔ́tɔn ɔlɔŋ nɛɛyɛ́. 9Tuémenyen andíkɛ́k ɛ́ɛ́: Kilíise ɛŋɛnyúkɛ́n á pilɔ́ŋ, utipá kuand eku; nikú tipá na kipia kɛ́ɛ́yɛ́ ó pusíó. 10Á kiákí ɛ́ɛ́ aná umeékú, punyɛ á kuátukan na kifal umeékú kisikɛl táŋ kímoómí; maná aná unyɛɛ́ ɔ́ kusɔ́t púnyɛ ó pusíó pú Támbák usɔ́tɔnɛ́ɛ. 11Puandá púmoómí panɔ́ kákáánɔ́ ánupítákɛ́t ɛ́ɛ́: Numekú á kuátukan na kifal, nuɔ́sɔ́tɔn ó pusíó pú Támbák á nipílat ne Yésus Kilíis. 12Ɛ́nyɛɛ́l kɔk kifal tiandá anúpia, ɛ́ɛ́ nuɔ́pinɔn pitɔ́ndɔ pi imekú siényíkúénée. 13Nutiandá kuák tuɔ́l tuánɔ́ ó puɔ́lí pú kifal ɛlɛɛ́ ɔŋɔŋɔ́ yɛ́ kuɛlɛ kilɔk, maná ɛ́nuɛ́lɛ́ epú punyɛ́ indɛ́ndɛ́nɛ núond nuɛ́lɛn Támbákɛ́ɛ puólí ɛlɛɛ́ epé pémeékú póókoond pɛ́ɛnyɔk á pilɔ́ŋ. 14Nutikápá á kipia kí kifal, aná nutiányíkápá á kipia kí kikotí, nukanyi á kipia kí ɔtɛ́m peseé ú Támbák.
Kukɔtɔ kí indɛ́ndɛ́nɛ
15Kiakí kɔk? Túɛ́lɛ kifal á kiákí ɛ́ɛ́, tutikápá á kipia kí kikotí maná é peseé u Támbák á? Aákóo! 16Nutipá numenyene ɛ́ɛ́: kisikɛl nukɔtɔnɛ́ sɔ́k ɛlɛɛ́ kiɔ́lí ɔ́ɔ́kɔɔ́pinɔn wɔ, nuɛ́kɛɛ́yɛ́n piɔ́lí pí ewú nuɔ́pinɔnɛ́ wɔ, kúnyaánɛ nunyɛ piɔ́lí pí kifal kí yuukesíé é niku, kúnyaánɛ nuɔ́kɔɔ́pinɔn Támbákɛ́ɛ uyuukesíé ɔ́ kusɔ́t kú indɛ́ndɛ́nɛ á? 17Tuékenyi Támbákɛ́ɛ ilémbie: numapá kiɔ́lí kí kifal, maná nínúan núɔ́pɛn nɔ ɔtɛ́m wáánɔ́ kitikit kí iŋónyítónyí panɔ́ peem numaátáŋáp. 18Támbák manuáŋɔ́n á kifal, nuetúmu ɔ́ kukɔtɔn epú punyɛ́ indɛ́ndɛ́nɛ. 19Yaánúkálan ɛlɛɛ́ mɔɔnd á kiákí ɛ́ɛ́ púnyɛ imfɛ́l naanɔ́ ɔ́ kuɔ́p, ó pusíó pú punɔ́ɔ́n púánɔ́ pú imekú, numapá piɔ́lí nuepiéki mulút ɔ́ kukɔtɔn kilɔk nuɛndɛ musɔm, é kuesúkín máamakáánɛ́ mɛ́mɛɛ́lɛ́ ɛ́ɛ́ nutiɔ́pɛ́n Támbákɛ́ɛ. Ninúan ánuák nuɔ́l núánɔ́ ɛlɛ́ɛ piɔ́lí pí epú púnyɛɛ́ indɛ́ndɛ́nɛ ɔ́ kusɔ́tɔn kusɔ́t kuunyáŋúnán á Támbák. 20Aká numaápá kiɔ́lí kí kifal, numapá weéŋelí á kiáyí kí indɛ́ndɛ́nɛ. 21Aná numɔɔ́sɔ́tɔ́n anakáánɛ́ kiákí numaápɔ́t? Nínúan nuápian ɛtɔ́ kunúa, á kiákí ɛ́ɛ́ é kuesúkín pilɔŋ pí kusɔ́t pikáánɛ́ óókoólon ne niku. 22Nínúan nunyɛ paáŋúnán á kifal, nukanyɛ peelímoólí pá Támbák, nusɔ́tɔn yá kɛ́ɛ́yɛ́ ó pusíó, akáánɛ́ nuányípia kusɔ́t kú teeníík ne nííkée. 23Á kiákí ɛ́ɛ́ pinamá pí kifal pínyɛɛ́ niku; maná nupoo nutiányípá na pinamá, nú Támbák núnyɛɛ́ kusɔ́t kú teeníík ne nííkée á nipílat ne Yésus Kilíis ɔkɔ́n waasɔ́.
اکنون انتخاب شده:
Lomɛ́ŋ 6: yav
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2026, CABTAL