Títi 2
2
Ndébɔ́ na wusó wá virunú vyá vato
1Wó je rií anáá mámó, yééré até eyé é géremenámó na dɔntirí ójó tɔ́ɔ́tɔ́. 2Ŋgá na virunú vyá vato anáá ví rií cɛ́ŋ cɛ́ŋ, na jiní, vá búŋgana wusi, vá timbe ŋguru na ŋgɔ́tɔ́wéna, na andiŋgé kó na iháká. 3Va gónó wa vakótó hónó séém, járá nawó anáá vá sɔ́tɔ́ ámó Irɔŋgɔ a diŋgámó, vámwané ka járéna vasɔ́ɔ́ wobé, vá teŋge rií mbékí ra mɔwɔ́, vá yeére até éyé é ámó wusi, 4ukú ójó anáá vá tíhíye ŋgwande rá vakotó odiŋge ówó vanómótó vawó, na vaná vawó, 5vá búŋgana wusi, vá rií sáŋ sáŋ, vá timbaana wusi na byanje vyáwó vyá tobá, vá eŋgá anáá vato bimé vá wó támana, vá rií na mowá na va nómótó vawó, ombótá ójó anáá moto ka seyá Epéŋgé yá Irɔŋgɔ.
Ndébɔ́ na wusó wa embwene
6Járá hónó na embwene anáá vá keéŋsana, 7na wanda wímé, mámó até otihyé eheyá na vesi va ŋgeŋgéna, dontirí wɔɔ a rií nkɔ́kɔnɔ na nkɔkɔnɔ, kó na jiní. 8Járá vipéŋgé iví ndíŋgirííŋ, íví moto a ta hítí omgbeetye, ombótá ójó anáá ombembéna wɔɔ a ová woswení, esene éyé a ta né wɔ́ŋgɔ́ wandá ówó a ámó o só járéna wobé ɔ́wɔ́.
Ndébɔ́ na wusó wa mbékí
9Mbékí í géremenámó orií na mová na va mása vawó na wandá wimé, vedá vá géremenámó osɔsɔ anáá vá wó wɔ́tɔ́, vá vásaára opetaana ówó nawó, 10ka wó ibánena. Vá géremenámó otíhíye wusi anáá vá ámó vato vá ipití, ɔ́wɔ́ na wandá wimé, vá né eréenámó urukú ná ehoóhona yá Irɔŋgɔ asótyé wa visó.
Ogíré ówó isí éyé Yésusu a mó pámó
11Esené Irɔŋgɔ a ma tihíyé ntá raá éjé yo eréenámó vato bimé esɔ́tɔ́. 12Ntá mwané e só yeérámó anáá to mice vambé vá púrú vá visó na vitámáká vyá cí ra ndono ejé. Naná to né sɔ́tɔ́mó esɔ́tɔ́ yá vesi vá mbuŋgáná na cí ejé, esɔ́tɔ́ éyé é ámó ndíŋgirííŋ é wúnde owɔ́tɔ́ Irɔŋgɔ, 13hɔ́rɔ́ to gíré usi wa wusí ójó to pityámó. Isí mwané, niimí ná ekáné yá Irɔŋgɔ wa visó ójó Yésusu Kirítu asótyé wa visó nó mó vátíhíyámó. 14A ma vánééná ómwané maté na wusó wá vísó, ombótá ójó anáá a só atá na wobé wimé, a wunde a só pómóna visó ává noyɔŋɔ náa, kaá índi to rií táásé na nití na weŋga ówó até éyé é ámó wusi.
15Naná kówo o geremenámó ojárá na vato na ijwé rɔɔ́ iŋgímé, ukú ójó anáá o wó rérye notó, ítɔɔ anáá o wó ríŋgaana. Mámó ka mice moto a wo byendye.
© 2024, CABTAL