Mui Psalm 107
107
1Omu ke palahea Lord ana ingeie e diana: ana e amasi taraurei.
2Kiratei a Lord e hanuire kire ke ere urine lou: muini e hanuire mwaanie nimada maeloonga.
3Na esi tarakonire mwaanie taenanga hanue: maanie wau na mai na hao na taau.
4Ana kire tatakalo kau ilaona mausu kaa tala ike ana: kire kaa lio toona nga hanue ni io ana.
5Hiolanga na marou e tolera ileune: na saeda e rodohono oto.
6Ana maholo kire io ni haa amasilada kire si soi takoie a Lord: na Esi haa isitangainire mwaanie mui maela.
7Esi naoda isulie tala odo: kire si hule ana hanue ni io hu.
8Kire palahea Lord isulie amasinge ingeie: na ana mui anoa e daui hunire mu hunire mu kaleni inoni.
9Ana e ni mangoa ahuteni hunie nga ini ko heitalea: na E haangaue nga ini ko hiolo.
10Kire io ilaona rodohono na i mamalutana maenga: kire io ni siohaanga, na kire hoosire ani ieli heu.
11Isulie kire haitohea mu wala a God: na kire sereinie haatolanga ini e liuta.
12Esi pilingie saeda hou: kire si meuo, na kaa lio tooana ini kei tola oli ada.
13Na kire io ni haamasilada kire si soie a Lord: na Esi haaurire mwaanie taenanga ola huihui.
14E haa isitangainire mwaanie rodohono na mwaanie mamalutana maenga: E wai mousie ukui heu kire hoosire kau ana.
15Kire ke palahea Lord isulie amasinge nge ana: na mu anoa E daui: hunie mu kaleni inoni.
16Ana E ohotatale maaipara hau: na E olo moumou ana mu ieli ikire.
17Kira puo e io ni siohaanga: isulie tolahada e tataala na palonga ikire e lai aela.
18Oqada e supu oto mwaanie mu ngeula: kire karainie maaipara ni maenga.
19Na kire io ni haa amasire kire si soie a Lord: Esi haaurire mwaanie taenanga maela.
20E niie tau walana, esi haaurire: e haa isitangainire maanie kalinge ni maenga.
21Kire ke palahea Lord ana amasinge nge ana: na ana mu anoa E daui hunie mu kaleni inoni.
22Kire unuunu eni palahenga: kire lalado ola ni ilenimwaenga isulie mu palonga Ingeie.
23Kiratei ko hotehote ani iola ilaona asi: kire ko da mui esunge ikire ilaona asi peine.
24Kire leese oto mu palonga a Lord: na mui anoa ingeie ilaona ahowa.
25E ere oto mawasi dengi e tahangai: e susupou ilengi ana ahe.
26Ko suluire ileni, na kire ko sisiho toli lou i kaona asi: maunge e susu hahie saeda.
27Kire ko talei teu na ko qeuqeuaa mala ini ko mehiri saeda e rodohono oto.
28Na ana kire io ni haa amasilada kire si soie a Lord: na Esi haa isitanainire mwaanie moola huihui.
29Oto E da asi ke hoola: na ahe ke moutoli.
30Na e hoola kire si ileilenimwae: na Esi tolera ilaona suu kire ko takoie.
31Kire palahea Lord ana amasinge ingeie: na ana mu anoa E daui hunie mui kaleni inoni.
32Kire soi haamanikulua i matolana mwala: kire ke sai diana ana ilaona lolata ni ratonimwane.
33E da mu wei ke nei henue sala ani: na anohu ke nei hulehule ani wei eni.
34Na e da mu henue ni ngeula ke nei Ahaa ani: isulie tolahada e tataala.
35Na e da lou hanue sala ke nei iqe ani: na anohu ke nei hulehula ani wei eni.
36Na esi neie kira hiolo ileune: uri kire ke lai io ileune.
37Huni esuie mu hohola, na ni hesie taenanga dango: mu ngeula kesi mwaera ani.
38E haa dianaara, kire si hunge liuta: E lio isulie mu po ikire mwane kire mae.
39Na maenga e tolera lou na ionga ni saehu: aena mu maeloonga, na walu ola huihui, na hanipili.
40Na e dau tekelainie mu alaha: e haatakalora ilaona hanue e naonga.
41Na tae esi sulu alaa ana muini e maitale mwaanie siohaanga: e tola tarakonire mui koruhei sheep.
42Kira odotai e leesie, na kire si sae mango: na kira orahaa e qaqa mwamwanoto.
43Atei ko saenanau ke lio letea walu olo ie: ngeie kei manata susulie amasinge a Lord.
اکنون انتخاب شده:
Mui Psalm 107: apbPSA
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
First published as part of the Anglican Prayer Book by the Melanesian Press, 1946.