Zakariya 2
2
Vuza vu kagisamkpatsu ka kawin
1Ana n ɗa̱ngushi a̱shi a̱ va̱, ɗa me enei vuma vu yoku uɓa̱ni n kagisamkpatsu ka kawin. 2Ɗa me ecei ni, <<Teɗai vi a kubana?>> Ɗa wu ushuki mu u danai, <<Mi ta̱ a kubana ku gisangu Urushelima, adama a na n yeve wanshi u ni n ugaɗi u ni.>> 3Ɗa kalingata ka na u yaꞋin kadanshi nu mpa u lazai. Ɗa vuza vu usuki vu yoku u ta̱wa̱i u gasai n a̱yi, 4ɗa u danai ni, <<Suma, vu yaꞋan kadanshi n kolobo ka nan ɗe ka, vu dana yi, <Kanna ko yoku Urushelima wi ta̱ a kushana tukpa n uma n ilikuzuwa ali a namba ubuta̱ u na a kuzuwa le, aza o yoku i ta̱ o kuyongo pulai vu likuci ya. 5Ka̱ta̱ mpa n ka̱ci ka̱ va̱ mo okpo mashilya ma akina u ka̱ra̱i n a̱yi, mi ta̱ kpamu a̱ kuda̱sa̱ngu e mere ma̱ likuci ma n tsugbayin tsu va̱, Vuzavaguɗu u dansai.> >>
Meɗevile ma aza a ugbashi o bono a kpaꞋa
6Ɗa Vuzavaguɗu u danai, <<Uta̱i! Uta̱i! Sumai i ka̱sukpa̱ iɗika i ya aza a uɓon u gaɗi. Adama a na n wacuwa ɗa̱ ta̱ a̱ ubuta̱ dem tsu wunla̱i wu ngon n na̱shi ma aduniyan>> Mpa Vuzavaguɗu n dansai. 7<<Uta̱i, a̱ɗa̱ aza a Sihiyona! Sumai, a̱ɗa̱ na yi a̱ likuci i Babila!>> 8Adama a nannai na ɗa ili i na Vuzavaguɗu MalaꞋimili u danai, <<N tsugbayin ci ni ɗa u suki mu, a kubana iɗika yi uduniyan u na u pura̱i ɗa̱, adama a na vuza na u saꞋwai ɗa̱ dem, u saꞋwa ta̱ maku ma̱ ka̱shi ma̱ va̱. 9Mi ta̱ a̱ kuɗa̱ngusa̱ kukiye ku va̱ mu una le. Agbashi e le i ta̱ a̱ kupura̱ ucanuku u le.>> Nannai ɗa ye kuyeve a na Vuzavaguɗu MalaꞋimili ɗa u suki mu. 10<<Cananai ishipa m ma̱za̱nga̱, aza a Sihiyona. Adama a na mi ta̱ a̱ kuta̱wa̱ ka̱ta̱ n da̱sa̱ngu punu wa̱ nu,>> Vuzavaguɗu u dansai. 11A kanna ka nanlo uduniyan wa̱ a̱bunda̱i wi ta̱ a kuta̱wa̱ u Vuzavaguɗu ka̱ta̱ okpo uma a̱ ni. Vuzavaguɗu MalaꞋimili wi ta̱ a̱ kuda̱sa̱ngu e mere me le. Nannai ɗa i kuyeve a na Vuzavaguɗu MalaꞋimili ɗa u suki mu wa̱ ɗa̱. 12Ka̱ta̱ Vuzavaguɗu u lyaꞋa uka̱ni u Yahuda tsu uma a̱ uka̱ni a̱ ni a iɗika i ciɗa, ka̱ta̱ u doku u zagba likuci i Urushelima yo okpo ubuta̱ wi ida̱shi i ni. 13Paɗai bini e kelime ka Vuzavaguɗu a̱ɗa̱ aduniyan ra̱ka̱, adama a na u ɗa̱nga̱ ta̱ a̱ ubuta̱ wi ida̱shi u ciɗa u ni.
©️2025 Language Development and Translation Initiative (LDTI)