Ansa 27
27
1Ka̱ta̱ vu yaꞋan a̱ra̱ɗi a ili i na va kuyaꞋan makpaꞋa ba,
adama a na vu yeve ili yi a̱ kugita̱ makpaꞋa ba.
2Ka̱ta̱ vu cikpa ka̱ci ka̱ nu ba,
ka̱sukpa̱ uma a cikpa wu,
ama ba avu n una̱ u nu ba.
3Katali ki ta̱ n a̱miki, kayala feu ta nannai,
ama atakaci a na kalau ka̱ tsu tuka̱,
a laꞋa le ta̱ a̱miki dem.
4Wupa ili i gbani-gbani i ɗa, u tsu una ta̱,
ama n nannai dem a yawa cisheꞋe m gbani-gbani ba.
5U laꞋa ta̱ n kugaꞋan a ɓarangu vuma e keteshe,
a na va ku yotsongu i ucigi u sokongi.
6Ka̱ja̱Ꞌa̱, ka̱ja̱Ꞌa̱ kaꞋa ko wi ishi u la̱nga̱sa̱ wu ka̱ɗu,
vurala, vurala vu ɗa ko wi ishi wo oɓongu nini
ka̱ta̱ vu ushuku n a̱yi ba.
7Vuza vu ucuwi ka bura yi n ishigi ba,
ama u vuza kambulu ko ili yo okono,
ili yi uyoꞋo i ɗa wa̱ ni.
8Vuma vu na u ka̱sukpa̱i kpaꞋa,
wi ta̱ tsu manunu ma na ma̱ ka̱sukpa̱i cikinda ci ni.
9Ili i ma̱gula̱ni n maniꞋin ma̱ ma̱gula̱ni
ma tsu neke ta̱ ma̱za̱nga̱ a̱ ka̱ɗu,
ama cija̱Ꞌa̱ tsu mayun ci ta̱ a̱ ubuta̱ wa odoki a singai.
10Ka̱ta̱ vu iwan ka̱ja̱Ꞌa̱ ka̱ nu ba,
n ka̱ja̱Ꞌa̱ ke esheku a̱ nu,
kpamu ka̱ta̱ vu bana a kpaꞋa ku tovu,
a kanna ka na atakaci a cinai nu ba.
wi ta̱ a kulaꞋa vu bana a̱ ubuta̱ u vuza
vu na yi a ida̱shi ɗeɗevu,
a na va kubana u tovu nu vu na wi daꞋangi.
11Yongo n cicoꞋo maku ma̱ va̱,
adama a na vu zuwa ka̱ɗu ka̱ va̱ ma̱za̱nga̱,
adama a na mu ushuku yaba dem vu na u goyoi mu.
12Vuza vu ugboji u tsu ene ta̱ kawuya ka̱ta̱ u katsukpa,
ama ka̱mici ka tsu zuwa ta̱ ka̱ci ka̱ta̱ tana u takacika.
13Isai motogu ma vuza vu na u shamkpai komoci,
remei ni tsu kaguta wo okpo baci
magan adama a kashakanlai.
14Vuza vu na baci u kya̱sa̱i vuza vu na
i a ida̱shi ɗeɗevu una̱singai
n ka̱la̱ka̱tsu ka̱u n usana,
i ta̱ a kuɗika una̱wuya u ɗa
u yaꞋankai ni.
15Vuka vu vishili,
wi ta̱ an ijaꞋashi i mini,
16kusa̱nka̱ yi vishili wi ta̱ tsu na
vuza u tsu ciga kusa̱nka̱ wunla̱i nwalu ɗa,
ko kureme maniꞋin n kukiye.
17Tsu na viyum vu tsu gboro viyum
ta feu vuma n vuma
a̱ tsu ɓa̱nka̱na̱i nannai.
18Vuza vu na u la̱na̱i maɗanga ma̱ ma̱biri
wi ta̱ a kulyaꞋa umaci u ni,
kpamu vuza vu na baci u la̱na̱i vuzagbayin vu ni,
wi ta̱ a̱ kuciya̱ tsugbayin.
19Tsu na e ci ene a̱shi a vuma a̱ mini,
ta feu e ci ene ka̱ɗu ka vuma nannai.
20Ukpisa̱ n asaun a̱ tsu cuwa̱ ba,
ta feu a̱shi a vuma nannai a̱ tsu cuwa̱ n kindi ba.
21Azanariya n azurufa n akina aɗa a tsu kondo le,
ama o tsu kondo ta̱ vuma n ucikpi u na ciya̱i.
22Ko vu lapa baci kalau,
vu luɓa̱ta̱ngu yi tsu utalu,
vi a kukasa yi n tsulau ci ni ba.
23La̱na̱ ushiga wu nkyon n nu,
n wa anaka a̱ nu mayin,
24adama a na uciyi u tsu yongo ko wannai ba,
ta feu nannai o ci yongo n tsugono, tsukaya n tsukaya ba.
25A tsu kana ta̱ mita̱ ka̱ta̱ ma savu mo topo,
a tsu ɓolongu ta̱ kpamu a̱vuku a kaginda adama anaka,
26a ci yaꞋan ta̱ aminya n cileme tsa nkyon n nu,
ka̱ta̱ vu tsula kashina n ikebe yi nraɗika.
27I ta̱ a̱ kuciya̱ mani ma nraɗika n a̱bunda̱i,
adama a na vu lyaꞋatangu kpaꞋa ku nu
ali n agbashi a̱ nu a nkere.
©️2025 Language Development and Translation Initiative (LDTI)