Ansa 17
17
1U laꞋa ta̱ n kugaꞋan vu takuma akama n ka̱ɗu ida̱shi
a na va kulyaꞋa tsuwa tsu ka̱ɗiva̱ a kpaꞋa ku vishili.
2Kagbashi ku ugboji, ki ta̱ a kulyaꞋa tsugono
a maku ma kpaꞋa ma na ma tsu tuka̱ n wono,
ali u ciya̱ upecu wi ili yi uka̱ni derere tsu vuza te punu a kpaꞋa ka.
3Azanariya n azurufa n akina a ɗa o tsu kondo le,
ama Vuzavaguɗu u tsu kondo ta̱ ka̱ɗu.
4Vuza vu gbani-gbani, u tsu bonoko ta̱ ugboji
a kadanshi ku una̱ wa aza a gbani-gbani,
kayaꞋin ka aꞋuwa ka tsu zuwa ta̱ atsuvu e kelentsu ka aꞋuwa.
5A̱yi na u yaꞋankai aza a unambi ulami,
u shika ta̱ vuza vu na u yaꞋin le,
vuza vu na u yaꞋin ma̱za̱nga̱
a kadama ka na ka̱ ciya̱i vutoku
mayu i ta̱ a kutakaci yi.
6Muku ntsukaya i ta̱ tsu okolokolo wu nkoshi,
muku kpamu a lapa ma̱ka̱nga̱ nu mmaci n le.
7Kadanshi kasingai ka tsu untsa n kalau ba,
u tsu laꞋa ta̱ m gbani-gbani a cina vuza vu tsugono n aꞋuwa.
8KalyaꞋa ki ta̱ an ilegetei u vuza vu na u nekei kaꞋa,
a̱ ubuta̱ u na u kpatalai dem u tsu ciya̱ ta̱ ulyaꞋi u kelime.
9Vuza vu na u cinukpai n unushi, ucigi u ɗa wi a kula̱nsa̱,
ama vuza vu na u tsu reme kakuna ga̱ga̱ga̱ u tsu pece ta̱ cija̱Ꞌa̱.
10Uɓarangi kute u yawa ta̱ vuza vu ugboji u yeve,
u laꞋa ili i na kalau ka ku piꞋisa n ulapi amangatawun.
11Vuma vu gbani-gbani u tsu zuwa ta̱ kaci
a ukuna wu ugbamiwasuvu,
i ta̱ a̱ ku suꞋuku vuza vu na wi n asuvayali ba
adama a na u takacika yi.
12U kulaꞋa ta̱ n ugaꞋin vuza u gasa
m ma̱kunzukunzu ma na a̱ pura̱i ni muku,
a na va kugasa n kalau
a̱ ka̱tsuma̱ ka tsulau ci ni.
13Vuma u tsupa baci ka singai n ka gbani-gbani,
ka gbani-gbani ka ki a̱ kuka̱sukpa̱ kpaꞋa ku ni ba.
14Ugiti u kananai wi ta̱
tsu na mini ma na a kpadai ɗa mo ɓosoi,
adama a nannai ka̱sukpa̱i kaꞋa
kafu vishili vu ɗa̱nga̱.
15Vuza na wu utukai vuza vu unushi,
n vuza na u takacikai vuza vu usuɓi
dem vu le ili yu unata i ɗa u Vuzavaguɗu.
16Ikebe yi n kanna e ekiye a kalau ba,
a na wo okpoi wi m mali ma̱ kuciya̱ cicoꞋo ba.
17Ka̱ja̱Ꞌa̱ ko ci yotsongu ta̱ ucigi ayin tutu,
otoku tankpamu a matsa le ta̱
adama a na a̱ ɓa̱nka̱na̱i ɗa a ayin atakaci.
18Ka̱mici ka tsu zuwa ta̱ kukiye u ɗika a̱miki
a vuza vu na i a ida̱shi ɗeɗevu u lyaꞋa baci kutan
u kpa̱ɗa̱i kutsupa.
19A̱yi na u cigai vishili dem, wi ta̱ a kuciga unushi,
A̱yi na u bankai ka̱ci ka̱ ni a̱ ubuta̱ u na yawai ba,
wi ta̱ a kuzamaka ka̱ci ka̱ ni kadama.
20Vuma vu ka̱ɗu ka gbani-gbani u tsu lyaꞋa kelime ba,
vuza vu aꞋuwa u tsu uwa ta̱ atakaci.
21Ili yi una̱mgbuka̱tsuma̱ i ɗa vu yaꞋan n maku ama kalau,
esheku a kalau o ci yongo m ma̱za̱nga̱ ba.
22Ka̱ɗu ka̱ ma̱za̱nga̱ a̱guma̱ asingai ɗa,
ama ka̱ɗu ku una̱mgbuka̱tsuma̱ ka tsu zuwa ta̱ vuma kuɗekpe.
23Vuma vu gbani-gbani u tsu isa ta̱ kalyaꞋa a usokongi
adama a na u sabaꞋa afada a mayun.
24Vuma vu kuyeve, u tsu bonoko ta̱ ugboji o cicoꞋo,
ama kalau ka tsu zuwa ta̱ a̱shi a̱ ni a̱ ubuta̱ dem.
25Kalau ka maku ka tsu zuwa ta̱ esheku a̱ ni una̱mgbuka̱tsuma̱,
ili yu una̱mgbuka̱tsuma̱ i ɗa
u vuza vu na u matsai ni.
26U gaꞋan a lyaꞋa vuza vu na wi n unushi ba ugana,
ko a faba vuza vu kelime adama e mejege ma̱ ni ba.
27Vuza na u tsu dansa ke nu, wi ta̱ n kuyeve,
kpamu a̱yi na u tsu ka̱na̱ ka̱ci ka̱ ni
wi ta̱ n kuyeve.
28Ko kalau feu ka paɗa baci bini,
a ci ɗika yi ta̱ vuza vu ugboji ɗa,
ɗa baci u ka̱na̱i kelentsu ka̱ ni,
uma i ta̱ a kuɗika yi vuza vu ugboji.
©️2025 Language Development and Translation Initiative (LDTI)