Mika 2
2
Afada adama aza a na i a kutakacika aza a unambi
1Ili ya atakaci i ɗa a kubana wa aza a na e sheshei kawuya,
aza a na e ci sheshe ka gbani-gbani ele ivaꞋin a kajiba.
Ka̱ta̱ kayin ka asa baci uta̱ a yaꞋan kaꞋa,
adama a na i ta̱ n utsura u kuyaꞋan kaꞋa.
2A ci yaꞋan ta̱ tsurala tsa ashina ka̱ta̱ a isa a ɗa,
a ci yaꞋan ta̱ tsurala ci iꞋuwa ali a isa i ɗa,
O tsu doro ta̱ vuma isa kpaꞋa ku uka̱ni ku ni,
3Adama a nannai, Vuzavaguɗu u danai,
La̱na̱, mi ta̱ lo o kufoɓuso kawuya adama a uma a nampa,
tsu na ya kufuɗa ku uta̱ka̱ ka̱ci ka̱ ɗa̱ punu ba.
Yi o kudoku kuyaꞋan nwalu n a̱ra̱ɗi ba,
adama a na wi ta̱ o ko okpo ayin a gbani-gbani.
4A kanna ka nanlo irala i ɗa̱ yi ta̱ a kuyaꞋanka ɗa̱ ishipa ya agivi,
yi ta̱ a̱ kushika̱ n una̱mgbi u ka̱tsuma̱ gbani-gbani i dana,
<<Tsu kuwa̱i ta̱ gbende,
Vuzavaguɗu u sabaꞋasaka ta̱ upecu u uma a̱ va̱.
Wi isai u ɗa wa̱ a̱ va̱,
u pecekei ashina a̱ tsu wa aza a na a lyaꞋi tsu n kuvon.>>
5Adama a nannai, ayin a na baci o kubonoko uma a Vuzavaguɗu n iɗika i le,
babu upecu u na a̱ɗa̱ i kuciya̱ punu.
Eneki a aꞋuwa
6Uma a na a panakai mu, a danai, <<Ka̱ta̱ i yaꞋan kene ba,
ka̱ta̱ i yaꞋan kene,
adama a ili i nanlo ba,
babu ili i wono i na i kuciya̱ tsu.>>
7Derere ɗa i dansa nannai,
avu kpaꞋa ku Yakubu?
Uremi u ka̱ɗu u Vuzavaguɗu u gusa̱ ta̱?
Ko a̱yi ɗa u yaꞋin ili i nampa ya?
Kadanshi ka Vuzavaguɗu ki n ugaꞋin,
u vuza na u tonoi mejege ba?
8Vuzavaguɗu wu ushuki u danai,
ama i ci yaꞋan ta̱ n uma a̱ va̱,
adanshi irala i ɗa.
I tsu foɗo ta̱ ntogu ma aza a na i a nwalu m ma̱ta̱na̱,
aza a nwalu ba adama o kuvon ba.
9I lokoi a̱ma̱ci a uma a̱ va̱,
a iꞋuwa i singai-singai le.
I tsu takpa ta̱ una̱singai u va̱,
a̱ ubuta̱ u muku n le kowannai.
10Ɗenga̱i i wala,
na va ubuta̱ u kuvuka u ɗa ba,
adama a nshinda̱ n ɗa̱,
ma̱dukpa̱ ma gbani-gbani mi ta̱ a̱ kuta̱wa̱ ɗa̱.
11Vuza u ɗa̱nga̱ baci,
u ka̱na̱i kuyaꞋan kene ka aꞋuwa a kudana,
<<Mi ta̱ a kuyaꞋanka ɗa̱ kene a ukuna u ma̱kya̱n n ma̱ra̱,>>
icuꞋu i eneki a nampa a ɗaɗa uma a tsu laꞋa n kuciga koci.
Uzuwakpani wa̱ a̱pa̱Ꞌa̱
12Mayun, mi ta̱ o kuɓolongu ɗa̱,
kumaci ku Yakubu,
mi ta̱ o kuɓolongu kagimi ka uma a Isaraila,
Mi ta̱ o kuɓolongu le a̱ ubuta̱ u te tsu ushiga wu nkyon,
n tsu ushiga wu nkyon a̱ ubuta̱ u kalina,
yi ta̱ o ko okpo tsu ka̱bunda̱i ka uma ka na a kupana kacaꞋa ke le.
13Vuza na u ta̱sa̱i mashilya,
a̱yi ɗa u kuꞋuwaka le kelime,
wo okpo le utsutsu ku uta̱.
Mogono me le mi ta̱ a̱ kulyaꞋa kelime ke le,
Vuzavaguɗu n ka̱ci ka̱ ni wi ta̱ a kuꞋuwaka le kelime.
©️2025 Language Development and Translation Initiative (LDTI)