Ishaya 37
37
Hezikaya u la̱nsa̱i uɓa̱nki u Vuzavaguɗu.
1Ana Hezekaya mogono u panai i na a danai, ɗa u karai ntogu n ni ɗa u ukai akashi a kpalu ɗa u banai a̱Ꞌisa̱ a Vuzavaguɗu. 2Ɗa u suki Eliyakimu vuzagbayin vu kefeku ko mogono, n Shebuna kaɗani, koɓolo n anan ganu a gbagbain, ra̱ka̱ vu le u uki n akashi a kpalu ɗa a banai u keneki Ishaya kolobo ka Amozu. 3Ɗa a danai ni, <<I na Hezekaya mogono u danai i ɗanna. Anana kanna ka atakaci kaꞋa, ki ishikushi, n ko wono. Ki ta̱ an kanna ka̱ a̱ga̱nda̱, kpamu vuka va vu buwa n utsura u na wa kufuɗa wa matsa ba. 4U gaꞋan ba Vuzavaguɗu Ka̱shile ka̱ ɗa̱ ki ta̱ a kupana kadanshi ka vuza vu kelime vo osoji a Asiriya va, vuza na vuzagbayin mogono ma Asiriya u suki u goyo Ka̱shile ka wuma, ka̱ta̱ u ɓarangu yi adama a kadanshi ka na Vuzavaguɗu Ka̱shile ka̱ ɗa̱ ka panai. Adama a nannai vasa adama a uma a na a buwai n wuma.>>
5Ana agbashi o mogono Hezekaya a̱ ta̱wa̱i wi Ishaya, ɗa a danai ni ili na Mogono ma danai, 6ɗa Ishaya u danai, <<Dana vuzagbayin vu nu, <I na Vuzavaguɗu u dansai i ɗanna. Ka̱ta̱ vu takacika ka̱ci ka̱ nu adama a kadanshi ka gbani-gbani ka na vu panai adama a̱va̱ a ubuta̱ wa aza a usuki o mogono ma Asiriya ba. 7Panai, mi ta̱ a kuzuwa ili i yoku a̱ ka̱ɗu ka̱ ni, adama a na u pana baci ili i na akaka a a danai, wi ta̱ o kubono a iɗika i ni, ta ɗe n kuzuwa a una yi n kotokobi.> >>
8Ana vuza vu kelime vo osoji a Asiriya u panai a na mogono ma̱ ni ma̱ ka̱sukpa̱i likuci i Lakishi, ɗa u banai kushilika̱ n aza a Libina. Ɗa feu u lazai a kubana ɗe.
9Gogo na Senekeribu u pana ta̱ akaka a na Tirihaka mogono mi Itopiya wu uta̱ ta̱ adama a na u shilika̱ n a̱yi. Ɗa u suki alingata a kubana u Hezekaya, a danai, 10<<Nanai ɗa ya kudana Hezekaya mogono ma a Yahuda. <Ka̱ta̱ vu ka̱sukpa̱ Ka̱shile ka̱ nu, ka na vu ushuku n a̱yi, ka̱ ya̱nsa̱ wu n kadanshi ba, a kudana a kuneke Urushelima ekiye a mogono ma Asiriya ba. 11La̱na̱, vu pana ta̱ i na ngono n Asiriya n yaꞋankai iɗika ra̱ka̱, tsu na a unai le gbende. Avu vi ta̱ a kulaka? 12Ikaya i va̱ i la̱nga̱sa̱i ta̱ Likuci i Gozan n Haran, n Rezefa, koɓolo n aza a Adini a na i Telasaru a̱ma̱li a iɗika i nanlo ya a fuɗa yi isai le ba 13Te ɗai mogono ma Hamata m mogono ma Arapadu i anana? Te ɗai kpamu mogono ma̱ likuci i Sefaravim, m mogono ma Hena, m mogono ma Iwa i gogo na?> >>
Hezikaya u yaꞋin kavasa
14Ɗa Hezekaya wi isai akaka a katagarda a e ekiye alingata a, ɗa u kecei. Ɗa u banai a̱ ma̱va̱li ma Vuzavaguɗu, ɗa ta na u ɓa̱yuwa̱i akaka a katagarda e kelime ka Vuzavaguɗu. 15Ɗa Hezekaya u yaꞋin kavasa a kubana u Vuzavaguɗu. 16<<Vuzavaguɗu MalaꞋimili, Ka̱shile ki Isaraila, avu na vi ida̱shi e mere ma Corobi, avu ɗa Ka̱shile endeꞋen o tsugono ra̱ka̱ tsa aduniyan. Vi yaꞋan ta̱ gaɗi n iɗika. 17Vuzavaguɗu, zuwaka mu atsuvu a̱ nu, ka̱ta̱ vu panaka mu avasa a̱ va̱, ɓa̱yuwa̱ a̱shi a̱ nu Vuzavaguɗu ka̱ta̱ ve ene, inda kadanshi ki ishikushi ka na mogono Senekaribu u suki a yaꞋanka Ka̱shile ka wuma.
18<<Mayun ɗa, Vuzavaguɗu, ngono ma aza Asiriya a una ta̱ uma a ra̱ka̱ n iɗika i le dem. 19Ɗa a variki a̱ma̱li e le a asuvu a kina ɗa o songi a ɗa, adama a na ele a̱ma̱li a mayun a ɗa ba, nɗanga n ɗa n atali koci, a na vuma u yaꞋin n ekiye a̱ ni. 20Gogo na, Vuzavaguɗu Ka̱shile ka̱ tsu, isa tsu e ekiye a̱ ni, adama a na tsugono ra̱ka̱ tsa aduniyan ci yeve a na avu ɗa Vuzavaguɗu endeꞋen.>>
Sanakaribu u yikpa̱i
(2 Ng 19:20-34)
21Ɗa Ishaya kolobo ka Amozu ka̱ suki n akaka a kubana u Hezekaya. U danai, <<Ili i na Vuzavaguɗu Ka̱shile ki Isaraila ka danai i ɗaɗa na, m pana ta̱ avasa a̱ nu adama Senekaribu mogono ma Asiriya. 22Kadanshi ka na Vuzavaguɗu u yaꞋin adama a̱ ni ka ɗaɗa na,
<<Likuci i Sihiyona i goyo wu ta̱
ɗa kpamu i zoꞋoshi nu,
likuci i Urushelima a̱ kugba̱ɗa̱sa̱ ka̱ wu kaci
tsu na vi ilaɗi.
23<<Yayi vi shikai ɗa kpamu vi yaꞋankai kadanshi ki ishikushi?
Yayi vu ɗengusa̱ka̱i ka̱la̱ka̱tsu
ali ɗa vu uta̱ka̱i a̱shi a̱ a̱ra̱ɗi?
Nu mpa ɗa vi a tsura vuza Ciɗa vi Isaraila.
24N alingata a̱ nu a ɗa
vu goyoi Vuzavaguɗu.
Ɗa vu danai,
<N ekeke o odoku a̱ a̱bunda̱i a̱ va̱ a ɗa
mi isai nsasan n na n laꞋi n ugaɗi, ɗa n uwai punu e mere-mere
u ɓata̱ u na u lai nu gaɗi a kakamba ka Lebano.
Adama a na n kapa ta̱ nɗanga n Sida n na n laꞋi n ugaɗi,
nu nɗanga n sipirus n na n laꞋi n kugaꞋan.
Ɗa vu danai, n yawa ta̱ a uteku u na u laꞋi n zuva,
ɗa n uwai n galai kuntsu ku ni.
25N ga̱va̱ ta̱ ayinva,
ɗa n soꞋi mini me le.
N ataka e ene a̱ va̱
ɗa n dasai n ɗekpetengi nyeneke ma aza a Masar ra̱ka̱.
26<< <Vu saꞋwa kupana ba?
A na mpa n sheshe ɗe ili i nampa ali m megeshe ɗe?
N foɓuso ta̱ i ɗa n ayin a cau a ɗe,
ɗa gogo mi a kuzuwa i ɗa i yaꞋan,
uteku u na vo kuɓoso likuci yu ukanji
ka̱ta̱ vu bonoko i ɗa kotomo ka agali.
27I ɗaɗa i zuwai ɗa uma e le i babu utsura u makara, o okpoi n wovon
ɗa a̱ ripula̱i.
O okpoi babu utsura tsu mita̱,
babu atakaci e kukpete an mita̱ ma savu ma na mi a̱ kuta̱.
I ta̱ tsu mita̱ ma na mo tsu topo a gaɗi vu tsusaki, ka̱ta̱ ma lumba ma̱ kpa̱ɗa̱ kugbonguro.
28<< <Ama n yeve ta̱ mayin ubuta̱ u na vu ci yongo, kuta̱wa̱ ku nu n kulaza ku nu. N yeve ta̱ tsu na vi a wupa nu mpa. 29Adama a na vi yaꞋan ta̱ wupa n a̱bunda̱i nu mpa,
ɗa kpamu kadanshi ku ugbamukaci u nu ka yawai a atsuvu a̱ va̱,
mi ta̱ a kuꞋuka kuɗopi a̱ vunu vu nu,
ka̱ta̱ kpamu n zuwa iryangama a̱ una̱ u nu.
Ka̱ta̱ n zuwa wu vu bono vu tono
nu uye u na vu tuka̱i.>
30<<Na va wi ta̱ o kokpo urotu wa̱ nu, avu Hezikaya,
lala vi ta̱ a kulyaꞋa i na i matsai n ka̱ci ka̱ ni,
ka̱ta̱ ka̱ya̱ vi lyaꞋa umaci u na o doku a matsasakai ɗe.
A̱ ka̱ya̱ ka tatsu vi ta̱ a̱ kuca̱Ꞌa̱ n ka̱ci ka̱ nu ka̱ta̱ vi kyaꞋa,
vi ca̱Ꞌa̱ kashina ki itacishi ka̱ta̱ vi lyaꞋa umaci u ni.
31Kagimi ka ka kpaꞋa ku Yahuda, ki ta̱ o kutopo tsu nɗanga n na n zuwai aralu e le a iɗika ɗa a matsai.
32Kagimi ka uma a na a buwai n wuma uta̱ ta̱ a Urushelima n ka̱tsura̱ ka uma a na a laꞋakai a kusan ku Sihiyona, adama a na ucigi u Vuzavaguɗu MalaꞋimili ɗa u sheshei kuyaꞋan nanai.
33<<Adama a nannai ili i na vuzavaguɗu u dansai adama o mogono ma Asiriya i ɗa na.
Wa kuꞋuwa a̱ likuci i nampa ya ba,
ko ta na u taɗuku punu kayaꞋa.
U kuꞋuwa punu i ɗa m ma̱ra̱ga̱
ko kpamu u maꞋa idasakpatsu i na u kuꞋuka punu ba. 34Vuzavaguɗu u danai, Wa kuꞋuwa a̱ likuci i nampa ba, n uye u na wu utuka̱i u ɗaɗa u kubonoko. 35Mi ta̱ a kukanza likuci i nampa ya ka̱ta̱ mi isa i ɗa,
adama a̱ ka̱ci ka̱ va̱ n kagbashi ka̱ va̱ Dawuda.>>
36N kayin ka nanlo ɗa kalingata ka Vuzavaguɗu ka banai ɗa ka unai osoji aza a Asiriya a̱kpa̱n amangatawun na amanga̱na̱shi n a tawun (185,000). Ana kayin kasai ɗa a cinai uma vagali ukpa̱. 37Ɗa Senekaribu mogono ma Asiriya u sumai ɗa u bonoi a Niniva ɗa u da̱sa̱ngi ɗe.
38Kanna kete, a̱yi a̱ ma̱va̱li a kucikpa ka̱ma̱li ka̱ ni Nisaroku, ɗa muku nre n ni Adurameleki koɓolo n Shareza unai ni n kotokobi, ɗa a sumai a kubana iɗika i Arara. Ɗa kolobo ka̱ ni, Esarahadon wo okpoi mogono a̱ una̱ u ni.
©️2025 Language Development and Translation Initiative (LDTI)