Ishaya 26
26
Vishipa vu kucikpa Vuzavaguɗu
1A kanna ka nanlo a kucanana ta̱ vishipa vu nampa a iɗika i Yahuda,
ci ta̱ n likuci yu utsura,
Ka̱shile ka̱ tuka̱ ta̱ n wishi
ci ta̱ ukanji m mashilya ushikpi mayin.
2Ɓa̱yuwa̱i utsutsu u likuci
adama a na uma a usuɓi a uwa punu,
uma a na i n uneki u ka̱ɗu.
3Avu zuwa yi u yongo m ma̱ta̱na̱
a̱yi na ka̱ɗu ka̱ ni ki ida̱shi wa̱ nu,
adama a na u zuwa ta̱ katsura wa̱ nu.
4A ayin dem neke Vuzavaguɗu ka̱ɗu ka̱ nu,
adama a na Vuzavaguɗu Ka̱shile ka̱ tsu a̱yi ɗa katali ke kusheɗeku ka na ka ci shamgba n utsura kowannai.
5U bonoko ta̱ aza a na i n a̱ra̱ɗi ukuna u gbani,
ɗa u la̱nga̱sa̱i likuci yu ugbamukaci i le,
u fa̱da̱ ta̱ i ɗa gbani-gbani,
ali ɗa u ɓosoi i ɗa yo okpoi kubuta̱.
6Aza a unambi n aza a na i o kusoꞋo atakaci
a dasa ta̱ i ɗa n ene e le.
7Ama aza a na i n usuɓi, uye u le wi ta̱ derere m mejege,
avu ɗa Ka̱shile ka na ka ci yaꞋan ili i singai, avu ɗa vu gboroi uye wa.
8Vuzavaguɗu ta nannai ci ta̱ a kuwala a uye u wila̱ u na vu zuwai,
tsu vana ta̱ adama a na ci yevesheke wu mayin,
kula ku nu ku ɗaɗa tsu ili i na ci a kuciga
ayin dem punu a̱ a̱ɗu a̱ tsu.
9Ka̱ɗu ka̱ va̱ ko ci yongo ta̱ a̱ kula̱nsa̱ wu n kayin dem,
n usana ka̱ɗu ka̱ va̱ ko ci yongo ta̱ a kuciga kene wu.
Ayin a na baci afada a̱ nu a̱ ta̱wa̱i a aduniyan a nampa,
uma a iɗika i ta̱ a kupiꞋisa ili i na i kutuka̱ n usuɓi.
10O yotsongu baci vuza vu gbani-gbani kasingai,
ɗa u kpa̱ɗa̱i kupiꞋisa ukuna wu usuɓi,
ali a iɗika ya aza a usuɓi dem wi ta̱ a kulyaꞋa kelime n kavama,
wi kpamu o kutono tsugbayin tsu Vuzavaguɗu ba.
11Avu Vuzavaguɗu, kukiye ku nu ku yaꞋan ta̱ uɗengushi,
n ufoɓushi adama a na ku takacika le, ama ele e yeve ba.
YaꞋan e ene ulinga u nu a̱ ubuta̱ u uma a̱ nu ka̱ta̱ a pana wono,
ka̱sukpa̱ akina a̱ nu a na i uzuwi adama irala i nu o songu le ra̱ka̱.
12Vuzavaguɗu neke tsu ma̱ta̱na̱
adama a ili i na ci yaꞋin dem, ci yaꞋan ta̱ n utsura u nu.
13Vuzavaguɗu Ka̱shile ka̱ tsu, a̱ma̱li o yoku a lyaꞋa ta̱ tsugono wa̱ tsu,
n nannai dem ama kula ku nu ku ɗa koci ci e kuneke tsugbayin.
14Gogo na irala i tsu dem a̱ kuwa̱ ta̱ ɗe o kudoku a̱ ɗa̱nga̱ kpamu ba, vu takacika le ta̱ ɗe,
wuma u le u na u lazai ɗe u buwa kpamu a̱ kuɗa̱nga̱ n wuma ba.
Vu takacikai le ɗa vu unai le kpamu,
o kudoku a ciɓa n ele kpamu ba.
15Avu Vuzavaguɗu vu zuwa ta̱ iɗika i gbonguroi,
vu zuwa ta̱ iɗika i gbonguroi.
Vi ciya̱ ta̱ tsugbayin
ɗa kpamu uteku wi iɗika dem u doki wanshi adama a̱ nu.
16Vuzavaguɗu, n atakaci a ɗa tsu ta̱wa̱i kula̱nsa̱ wu
ayin a na baci vu takacikai le
wi ta̱ a kuyaꞋan le n atakaci kafu a vasa#26:16 N kelentsu ka aza a Ibirahi, kakariki ka nampa ka ki ta̱ n atakaci e kuyeve.
17Tsu na vuka vu ka̱tsuma̱ u tsu takacika a̱ ubuta̱ wa̱ a̱ga̱nda̱ a limata,
a̱ yura̱ m ma̱shi adama a̱ mɓa̱la̱,
ta ci ishi nannai a̱ ubuta̱ u nu, Vuzavaguɗu.
18Ci ishi ta̱ tsu vuka vu ka̱tsuma̱ a̱ ubuta̱ wa̱ a̱ga̱nda̱ a limata,
ama ce ene maku ba sai wunla̱i koci.
Tsu tuka̱ n wishi a iɗika ba.
Tsu tuka̱ n wuma a iɗika i nampa ba.
19Vuzavaguɗu u danai, aza a̱ ɗa̱ a na a̱ kuwa̱i ɗe i ta̱ a̱ kuɗa̱nga̱ n wuma,
keven ki ikyamba ke le ki ta̱ a̱ kuɗa̱nga̱.
A̱ɗa̱ na yi ida̱shi a̱ kubuta̱,
ɗa̱nga̱i ka̱ta̱ yo orukpo adama a̱ ma̱za̱nga̱,
tsu na ciza tsu usana tsu tsu ta̱na̱ta̱ngu iɗika,
adama a na iɗika yi ta̱ a̱ kuta̱ka̱ n aza a na a̱ kuwa̱i.
20Lazai uma a̱ va̱, uwai a̱ unu a̱ ɗa̱
ka̱ta̱ i ɓa̱ya̱ngu utsutsu,
i sokongu ka̱ci ka̱ ɗa̱ ali a kubana megeshe kenu
sai ayin a na wupa u ni u lazai.
21La̱na̱i, Vuzavaguɗu wi ta̱ a̱ kuta̱wa̱ na ɗe gaɗi a̱ ubuta̱ u na wi o kuyongo
adama a na u takacika uma aduniyan adama a unushi u le.
Aduniyan i ta̱ a̱ kuta̱ka̱ n aza a na a̱ tsuwa̱in mpasa punu wa̱ ni,
wi ta̱ a̱ kuta̱ka̱ le e keteshe adama a na yaba dem we ene.
©️2025 Language Development and Translation Initiative (LDTI)