Habaku 3
3
Avasa a Habaku
1Avasa a ulyaꞋi a na keneki Habaku u yaꞋin. A yaꞋan vu ɗa n ka̱la̱ka̱tsu ka Shigiyonotu.#3:1 Katagarda ka aza a Ibirahi ki ta̱ a kadanshi a̱ ciya̱ kuyeve yiɗa̱i Shigiyonotu ba
2Vuzavaguɗu, m pana ta̱ arabali a̱ nu,
ulinga u nu u neke mu ta̱ wovon, Vuzavaguɗu.
vu yaꞋansaka u ɗa ayin a̱ tsu,
zuwa e yeve u ɗa a ayin a̱ tsu,
pana asuvayali a̱ tsu, a̱ ka̱tsuma̱ ka wupa u nu.
3Ka̱shile ka̱ uta̱ ta̱ a Teman a iɗika i Edom,
Vuza Ciɗa vu na vu uta̱i a Kusan ku Paran.
Tsugbayin ci ni tsu pala ta̱ zuva ra̱ka̱,
ɗa kpamu ucikpi u ni u palai aduniyan ra̱ka̱.
4Tsugbayin ci ni a na uɓaci u kanna,
kutashi a̱ ka̱ uta̱ punu e ekiye a̱ ni,
a̱ ubuta̱ u na utsura u ni wishi u sokongi.
5U suki ma̱dukpa̱ kelime ka̱ ni,
ɗa kpamu ma̱dukpa̱ mu ukpa̱ mo tonoi ni ka̱ca̱pa̱.
6U shamgbai, ɗa u gba̱ɗa̱i aduniyan,
wi indanai, ɗa u zuwai uduniyan u jeꞋekei ikyamba.
O ɓosoi nsasan m gbagbaꞋin n cau,
aginda a na i lo ali n tsumani a̱ niꞋwa̱in.
Uye u ni wi ta̱ lo ali n tsumani.
7Me enei a̱pa̱m a Kushan a̱ ka̱tsuma̱ ka atakaci,
uma a iɗika i Midiya e kujeꞋeke ikyamba.
8Vuzavaguɗu, vi ta̱ a wupa nu nyeneke ma?
Asuvu a usuɗukpi a̱ nu a kubana a nyeneke n ɗa?
Asuvu a usuɗukpi a̱ nu a kubana a mala maꞋa?
Ko ɗaɗa i zuwai vu kumbai odoku a̱ nu,
ekeke o odoku a̱ nu adama ulyaꞋi?
9Vu uta̱ka̱i utan u nu e keteshe,
vu katsuki ayaꞋa a̱ nu.
Vu ɓatsai iɗika, nyeneke tankpamu m pecei.
10Nsasan m gbagbaꞋin me enei nu, ɗa m gba̱ɗa̱i,
ɗa a jarai mini ma̱ wunla̱i,
ali mala mu uga̱vi ma̱ vuzakpai,
ɗa ma̱ ɗengusa̱i aɓau a̱ ni gaɗi.
11Kanna n wotoi a shamgbai a ubuta̱ u na i,
a makyan ma na kutashi ka ayaꞋa a̱ nu ku urangi,
n kutashi ku nwalu mu nsara n nu.
12A̱ ka̱tsuma̱ ka wupa u nu, vu dasai aduniyan,
a̱ ka̱tsuma̱ ka wupa u nu kpamu, vu dasai uduniyan.
13Vu uta̱i adama a na vi isa uma a̱ nu,
vi isa aza a na vu zagbai.
Vu una vuza kelime vi iɗika i gbani-gbani,
vu foɗo aminya a̱ ni vu nekei ni wono.
14N ayaꞋa a̱ ni a ɗa,
vu sapai kaci ko kovonshi ka̱ ni,
a ayin a na a̱ ta̱wa̱i tsu kabatalikpau,
adama a na a wacuwa tsu,
ma̱za̱nga̱ me le maꞋa una,
aza a unambi a na i usokongi.
15Vu kpetei mala n odoku a̱ nu,
a ku vuzakpa mini ma gbagbaꞋin ma.
16Ana m panai, ɗa ka̱ɗu ka̱ va̱ ka̱ muɗa̱i,
ɗa ikyamba i ka̱na̱i kujeꞋe adama o wovon,
ɗa ikyamba i va̱ i kuwa̱i,
ene a̱ va̱ kpamu e kujeꞋe.
N nannai dem, mi ta̱ a kupaɗa bini n vana kanna ka atakaci,
atakaci a na a̱ kuta̱wa̱ a uma a na a̱ tsu tuka̱ tsu n kuvon.
17Ko a na wo okpoi maɗanga ma ma̱biri ma yaꞋan a̱pa̱lu ba,
kpamu a̱ ciya̱ umaci u maɗanga mi itacishi ba,
ko a na maɗanga ma zaitu ma̱ kpa̱ɗa̱i kumatsa,
kpamu ashina a matsa ili ba,
ko a na wo okpoi nkyon mi punu a ushiga u le ba,
anaka feu i punu a ushiga u le ba,
18n nannai dem, mi ta̱ a kuyaꞋan ma̱za̱nga̱ a kubana u Vuzavaguɗu,
mi ta̱ a kuyaꞋan ma̱za̱nga̱ u Ka̱shile kishi ka̱ va̱.
19Vuzavaguɗu Ka̱shile, a̱yi ɗa katsura ka̱ va̱,
u tsu bonoko ta̱ ene a̱ va̱ tsu mesheun,
u tsu zuwa mu ta̱ n fuɗa n kumba gaɗi ka̱u.
#
2 Sam 22:34; Ishp 18:33
Kadanshi a kubana u vuza vu kelime vi ishipa. A ucanuku wi iwashi i va̱.
©️2025 Language Development and Translation Initiative (LDTI)