Tsuɓari 7
7
CicoꞋo
1Kula ku singai ku laꞋa ta̱ maniꞋin ma̱ ma̱gula̱ni,
kpamu kanna ku ukpa̱ ka laꞋa ta̱ kanna ka limata.
2U laꞋa ta̱ n kugaꞋan a bana a kpaꞋa ku kpalu
an a kubana a kpaꞋa ku ka̱ɗiva̱,
adama a na ukpa̱ u ɗa ukocishi u yaba dem,
ka̱sukpa̱ vuza wuma ra̱ka̱ u zuwa i nampa ya a̱ ka̱ɗu ka̱ ni.
3Una̱mgbuka̱tsuma̱ u laꞋa ta̱ izoshi,
adama a na una̱mgbuka̱tsuma̱ u tsu tuka̱ ta̱ kulapulu a̱ ka̱ɗu.
4Ka̱ɗu ka vuza vu ugboji ko ci yongo ta̱ a̱ ubuta̱ u kpalu,
ama ka̱ɗu ka kalau ki ta̱ adama a kupana ku uyoꞋo.
5U laꞋa ta̱ n kugaꞋan vuma u pana uɓarangi vuza vu ugboji,
an wa kupana ishipa ya alau.
6Uteku tsu na maɗanga ma awana mi a̱ ku kula̱ e kenle,
ta i zoshi ya alau yi nannai.
Nava feu gbani ɗa.
7Ukuna u modoruko u tsu bonoko ta̱ vuza vu ugboji kalau,
kalyaꞋa kpamu ka̱ tsu la̱nga̱sa̱ ta̱ vuma.
8Ukocishi u kakuna u tsu laꞋa ta̱ ugiti,
uka̱ni u ka̱ɗu u laꞋa ta̱ a̱ra̱ɗi
9Ka̱ta̱ vu yaꞋan moloko ma kuna̱mgba̱ ka̱tsuma̱ ba,
adama a na kalau ka ko ci yongo a wupa.
10Ka̱ta̱ vu yaꞋan keci vu dana, <<Yiɗa̱i i zuwai ayin a cau, a laꞋi o gogo na?>>
Adama a na u gaꞋan uma a yaꞋan keci ku nanlo ba.
11Ugboji wi ta̱ n ugaꞋin, ci ili yi uka̱ni,
yi ta̱ n ugaꞋin wa aza a na enei kanna.
12Ugboji, u tsu ere ta̱ vuma,
tsu na ikebe i ci ere vuma,
ama ugaꞋin u kuyeve u ɗaɗa,
ugboji u tsu ɓa̱nka̱ ta̱ wuma u vuza na wi n u ɗa.
13La̱na̱i biꞋi ili i na Ka̱shile ka yaꞋin.
Yayi wa̱ kuba̱rukpa̱
ili i na u ka̱nza̱i?
14Ayin a gaꞋan baci, yaꞋan ma̱za̱nga̱,
ama ayin a̱ na̱mgba̱ baci ciɓa,
a na Ka̱shile kaꞋa ka yaꞋin ayin nampa,
a̱yi ɗa feu u yaꞋin a̱yi na ɗe.
Adama nannai, vuma wi a kufuɗa kuyeve
ili i na i kugita̱ e kelime ba.
15A ayin a wuma u gbani a̱ va̱ a nampa a, me ene ta̱ ili i nampa ya ra̱ka̱.
Vuza vu usuɓi a̱ ku kuwa̱ a̱ ka̱tsuma̱ ku usuɓi u ni,
vuza gbani-gbani u geshe o kuyongo n kawuya ka̱ ni.
16Ka̱ta̱ vu ɗika ka̱ci ka̱ nu vuza vu usuɓi ɗa vi ka̱u ba,
ko kpamu vuza vu ugboji ka̱u ba
ta baci nannai ba vi ta̱ a ku una ka̱ci ka̱ nu.
17Ka̱ta̱ vo okpo vuza kawuya ka̱u ba,
ka̱ta̱ tan feu vo okpo kalau ba
adama a̱ yiɗa̱i ɗa vi a̱ ku kuwa̱ babu ayin a̱ nu a yawa?
18Ugan ta̱ vu ushuku n ke te
a na va̱ ku ka̱sukpa̱ ka nan ɗe.
vuza na wi a kupana wovon u Ka̱shile
a̱yi ɗa u kufuɗa kutono ili i nampa ya ra̱ka̱.
19Ugboji u tsu zuwa ta̱ vuza vu ugboji u tsurakpa
u laꞋa aza o tsugono kupa a̱ likuci.
20Babu vuza vu usuɓi aduniyan
vuza na u ci yaꞋan ku usuɓi babu unushi.
21Ka̱ta̱ vu zuwa atsuvu a ili i na uma i a kadanshi ba,
ta baci nannai ba vi ta̱ a kupana agbashi a̱ nu a kushika wu,
22adama a na avu feu vu yeve ta̱ a ka̱ɗu ka̱ nu,
n a̱bunda̱i vu shika ta̱ uma.
23N kondoi ili i nampa ya ra̱ka̱ n ugboji u vu ɗa n danai,
<<N ciga ta̱ mo okpo vuza vu ugboji>>
ama ka nampa ka, ka laꞋa ta̱ u tsura u va̱.
24Kakuna ko cicoꞋo,
ki ta̱ n atakaci, ki kuyeve taci-taci ba,
yayi u kuyeve ili i na yi punu ra̱ka̱?
25Ɗa zuwai ka̱ci ka̱ va̱ adama a na n yeve,
adama a na n la̱na̱ ka̱ta̱ n la̱nsa̱ ugboji n tsu na a ci yaꞋan ili
ka̱ta̱ kpamu n yeve tsulau tsu ka gbani-gbani,
n ujari u tsulau.
26Ɗa n cinai ili i na i laꞋi ukpa̱ okono,
vuka vu na ka̱ɗu ka̱ ni ki maza maꞋa
vuza na ka̱ɗu ka̱ ni uganda u ɗa
ekiye a̱ ni kpamu ci ikani.
Vuma na u ci yaꞋan ili i na Ka̱shile ka tsu pana uyoꞋo, wi ta̱ a kulaꞋaka e ekiye a̱ ni,
ama vuza vu unushi u ku laꞋaka e ekiye a̱ ni ba.
27Malum ma danai, la̱na̱, ili i na me enei i ɗaɗa na.
M ɓolongu ta̱ ili i te n vutoku, adama a na n yeve tsu na o foɓusoi ili ra̱ka̱.
28mpa biꞋi a̱ ka̱tsuma̱ ka̱ kula̱nsa̱,
ama n ciya̱ ili i na mi a̱ kula̱nsa̱ va ba,
ɗa n ciya̱i vuma te ma̱riki a̱ ka̱tsuma̱ ka̱ ka̱kpa̱n.
ama a̱ ka̱tsuma̱ ka a̱ma̱ci ko vuza te.
29Na ɗa koci ili i na n yevei,
Ka̱shile ka yaꞋan ta̱ vuma n ka̱ɗu ke mejege,
ama ɗa uma a̱ ripula̱i ka̱ci ka̱ le okpoi aza a gbani-gbani.
©️2025 Language Development and Translation Initiative (LDTI)