Tsuɓari 3
3
Ili dem yi ta̱ m makyan ma̱ ni
1Ili dem yi ta̱ m makyan ma̱ ni,
m makyan adama a ulinga aduniyan ra̱ka̱.
2makyan ma limata mi ta̱ lo, makyan ma̱ ukpa̱ mi ta̱ lo,
makyan ma̱ vica̱Ꞌa̱ mi ta̱ lo, makyan ma vikyaꞋa mi ta̱ lo,
3makyan ma munuka mi ta̱ lo, makyan mo kupotsotongu mi ta̱ lo,
makyan ma̱ kufa̱da̱ mi ta̱ lo, makyan ma kumaꞋa mi ta̱ lo,
4makyan ma̱ ma̱shi mi ta̱ lo, makyan mi izoshi mi ta̱ lo,
makyan ma kpalu mi ta̱ lo, makyan ma̱ ma̱za̱nga̱ mi ta̱ lo,
5makyan ma kuwacuwa atali mi ta̱ lo, makyan mo kuɓolongu le mi ta̱ lo,
makyan mo moɓongbonoi mi ta̱ lo, makyan mu ukpa̱ɗi u moɓongbonoi mi ta̱ lo,
6makyan ma kula̱nsa̱ mi ta̱ lo, makyan ma̱ kuka̱sukpa̱ ki ta̱ lo,
makyan ma kuzuwa mi ta̱ lo, makyan ma kuvakangu mi ta̱ lo,
7makyan ma kukara mi ta̱ lo, makyan ma kujila̱ mi ta̱ lo,
makyan ma kupaɗa bini mi ta̱ lo, makyan ma kadanshi mi ta̱ lo,
8makyan mu ucigi mi ta̱ lo, makyan ma maꞋiwansanai mi ta̱ lo,
makyan mo kuvon mi ta̱ lo, makyan ma̱ ma̱ta̱na̱ mi ta̱ lo.
9Yiɗa̱i vuma u kuciya̱ a̱ ka̱tsuma̱ ka kataci ka ulinga u ni? 10Me ene ta̱ a̱miki a na Ka̱shile ka zuwakai uma. 11U yaꞋan ta̱ ili dem n ugaꞋin a ayin a̱ ni. Ɗa kpamu u zuwakai vuma ka̱ɗu ko cicoꞋo ke kuyeve ki ili i na i lazai n ili i na yi e kelime, n nanai dem a kufuɗa a zuwaka n ili i na Ka̱shile ka yaꞋin ɗe n ugiti ali a̱ kuta̱wa̱ a ayin a ukocishi ba. 12N yeve ta̱ i yoku yi lo i na i laꞋi vuma u ciya̱ ma̱za̱nga̱ ka̱ta̱ uyaꞋin i li singai a ayin a na wi n wuma ba. 13N adama a na yaba dem u ciya̱ u lyaꞋa u soꞋo, u pana uyoꞋo wu kataci ka ulinga u ni dem, na lo kuneꞋe ku Ka̱shile ku ɗa. 14N yeve ta̱ ili dem i na Ka̱shile ka yaꞋin yi ta̱ e kugeshe kowannai, ko ili yi punu kudoku ko kujebe ba. Ka̱shile ka yaꞋin ta̱ nannai adama a na uma e neke yi tsugbayin.
15Ili i na yi lo gogo na, a yaꞋin ta̱ ɗe i ɗa
ili i na kpamu i kugita̱, i gita̱ ta̱ ɗe,
Ka̱shile ki ta̱ a kuzuwa ili i na i gita̱i ɗe, i doku i yaꞋansaka.
16Ɗa kpamu me enei ili i yoku aduniyan a nampa,
a̱ ubuta̱ u na a kukiɗa afada a e mejege, kucikpa a ci na ka gbani-gbani ɗe,
a̱ ubuta̱ wu usuɓi, a kucikpa a cina ɗe ka gbani-gbani.
17Ɗa n sheshei a̱ ka̱ɗu ka̱ va̱,
<<Ka̱shile ki ta̱ a kukiɗaka
vuza vu usuɓi n vuza va asuvawuya afada,
adama a na makyan mi ta̱ lo adama a ulinga dem,
makyan adama a ili dem.>>
18Ɗa kpamu n sheshei a̱ ka̱ɗu ka̱ va̱, <<Uma tamkpamu, Ka̱shile ko tsu kondo le ta̱ adama na e yeve a na ele va a laꞋa nnama ba. 19Wuma u vuma n wuma wu nnama, u te u ɗa dem. Tsu na a̱yi na u ku kuwa̱, ta feu a̱yi na ɗe u ku kuwa̱ nannai. Dem vu le ayinviki e te a ɗa le, Vuma u laꞋa manama n ili yoku ba. Ili ra̱ka̱ gbani ɗa. 20Ra̱ka̱ vu le ubuta̱ u te u ɗa i a kubana, ra̱ka̱ vu le kubuta̱ kaꞋa uta̱i, kpamu a kubuta̱ kaꞋa o kubono. 21Yayi u yevei a na ayinviki a vuma a̱ tsu ɗa̱nga̱ ta̱ gaɗi, ayinviki a manama tankpamu a̱ cipa̱ a iɗika?>>
22Ɗa me enei, ili i yoku yi lo i na i laꞋi kugaꞋan vuma u pana uyoꞋo u kataci ku ulinga u ni ba, adama a na ɗaɗa katsupu ka̱ ni. Adama na yayi u kuyeve ili i na i kugita̱ ɗa baci u kuwa̱i?
©️2025 Language Development and Translation Initiative (LDTI)