Emosu 3
3
Ili i na i zuwai a takacikai aza a Isaraila
1A̱ɗa̱ aza a Isaraila ra̱ka̱ kumaci ku na Vuzaguɗu wu utuka̱i a iɗika i Masar, Panai kadanshi ka na Vuzavaguɗu u dansai adama a̱ ɗa̱.
2<<A̱ɗa̱ ɗa koci aza a na n zagbai a̱ ka̱tsuma̱ ka kumaci ka aduniyan,
a̱ɗa̱ ɗa koci n yevei,
ɗa kpamu n zagbai ɗa̱ yi okpoi uma a̱ va̱,
adama nannai mi ta̱ a kutakacika ɗa̱ adama a unushi u ɗa̱ ra̱ka̱.>>
3Uma e re i a kufuɗa a kuyaꞋan nwalu koɓolo babu a̱ da̱sa̱ngu o foɓuso ba.
4Kawu wi ta̱ a kuyaꞋan yura̱ gbani an gbani e meremune babu u reme manama?
Kawu wi ta̱ a kuyaꞋan yura̱ e kpenle gbani an gbani,
babu u reme ili? 5Manu ma tsu uwa ta̱ a maza?
Babu a zuwakai ilikulyaꞋa?
Maza ma tsu zumgba̱ ta̱ a iɗika gbani? Sai ma̱ ka̱na̱ ili i yoku. 6I ta̱ a̱ kulika̱ kavana ka kuvon a̱ likuci gbani? Uma a̱ likuci i ta̱ e kujeꞋeke ikyamba.
ma̱dukpa̱ ma tsu uwa ta̱ a̱ likuci gbani? Babu wushuki u Vuzavaguɗu?
7Mayun, Vuzavaguɗu u ci yaꞋan kakuna ka̱ ni babu u tonuko eneki a̱ ni ba. 8Kawu vu orukpo baci, ya yi wa ku kpa̱ɗa̱ kupana wovon? Vuzavaguɗu MalaꞋimili u dansa baci ya yi u ku kpa̱ɗa̱ ku dansa kadanshi ka̱ ni? 9Ɗa Vuzavaguɗu u danai Keneki Emosu, Sala kakuna ka a ubuta̱ u kusheɗeku wa aza a Ashidodu, n ubuta̱ u kusheɗeku wa aza a Masar, <<Vu dana, ɓolongi ka̱ci ka̱ɗa̱ a nsansa n gbagbaꞋin ma aza a Samariya, ka̱ta̱ yene wovon u gbayin u na wi punu a̱ ka̱tsuma̱ ka̱ ni, koɓolo n modoruko ma̱ a̱bunda̱i ma uma ma na mi punu.>> 10<<E yeve tsu na a kuyaꞋan kasingai ba,>> Vuzavaguɗu u danai,<<O kuɓolongu ucanuku u na o bokoi, n wa aza a ma̱ga̱la̱ka̱ a̱ ubuta̱ wu ukanji u le.>> 11Adama a nanai, i na Vuzavaguɗu MalaꞋimili u danai i ɗaɗa na. <<Mayun irala i ɗa̱ yi ta̱ a ku ka̱ra̱Ꞌa̱ a iɗika ya, i ta̱ e kupece ɗa̱ n utsura u ɗa̱, ka̱ ta̱ kpamu isa ucanuku wu ubuta̱ u wu ukanji u ɗa̱.>> 12I na Vuzavaguɗu u dansai i ɗaɗa na, <<Uteku tsu na maguɓi ma tsu isa ene e re ko kutsuvu kute ku malala a una̱ u kawu, ta feu ma ku isa ene e re a ivaꞋamkpatsu ko kpamu kakambu ka kakuba ka aza a Isaraila a na i a ida̱shi a kupana uyoꞋo a Samariya nannai. 13Gogo na pana a kaka a nampa, adama a na vu sala aɗa vu ka̱ra̱Ꞌa̱ka̱ a Isaraila ra̱ka̱. Mpa Vuzavaguɗu, Ka̱shile ka gaɗi n dana ta̱, 14A kanna ka na n kutakacika aza a Isaraila adama a unushi wu uyevi u le, mi ta̱ a kuɓoso katalikalyuka ka Betelu, i ta̱ a ku koɗoso avana a katalikalyuka a varuku a iɗika. 15Mi ta̱ a̱ kufa̱da̱ i uwa yi irana n ilyushi i le. IꞋuwa i le i na a lapulai n anga a kagiwa a, yi ta̱ a ku yikpa̱. IꞋuwa i gbagbaꞋin kpamu i ta̱ o kuɓoso i ɗa. Mpa Vuzavaguɗu n dansa ta̱.>>
©️2025 Language Development and Translation Initiative (LDTI)