Mekece 5
5
Cece vu uva̱la̱ta̱
1Reve A̱sulazuva a yuwan adanshi na̱ Musa, u damma, 2<<Vu zuwa aza a Isra'ila o uta̱a̱ vuma na suru ri na̱ mɓa̱la̱ mu ukwan ko za na ri a̱ ma̱ɗa̱wa̱ ko za na o'woi idaba adama a na u ju'wa̱in a̱kwa̱kwa̱ diga o uva̱la̱ta̱. 3Yu uta̱a̱ vali ko ka a̱ tyo a alanga o uba̱ta̱ wu uva̱la̱ta̱, adama o o'woto uva̱la̱ta̱ u le uba̱ta̱ u na n ri nden e memere me le idaba wan.>> 4Reve aza a Isra'ila a yuwan ne, a̱vu o uta̱a̱ a̱za̱ e idaba o uva̱la̱ta̱'a̱ cine A̱sulazuva a dammai Musa, ne ɗa aza a Isra'ila a yuwain.
Atsupu adama o unusu
5Reve A̱sulazuva a yuwan adanshi na̱ Musa, u damma, 6<<Damma aza a Isra'ila, na̱ vali ko ka yuwaan nanza unusu, u yuwan ta̱ ulambu wa̱ a̱ɓula̱ e ekere a̱ A̱sulazuva, vuma ndolo ta̱ nu unusu. 7Vuma'a u ta damma unusu u na u yuwain. Waru u ta̱ ka̱mbuwa̱ ili i na u lungusa̱i'i suru, reve u da̱shi za ta̱ a̱tsuma̱ e ili i ton yi ili'i, u ca za na u nusayi'in. 8Amma na̱ vuma na a yuwayin unusu'u u kuwa̱ agba u ri na̱ za na ri zuzu na̱ a̱yi na a̱a̱ ka̱mbuwa̱a̱ ili'i shi, ili i na a̱ ka̱mbuwa̱i'i wo o'wo ta̱ za va̱ A̱sulazuva aa ta ca ganu oɓolo na̱ a̱a̱giri'i a na aa yuwaan kucci matara mo ume mo unusu wa̱ yi. 9Ili ya akiza i na aza a Isra'ila a̱ ta̱wa̱yi ya ganu suru o to o'wo za va ganu. 10Uneꞌe wa akiza u na vuma cayi suru, u to o'wo za va ganu.>>
Ma̱lyungwa̱ ma ka na ri na̱ a̱ɓula̱ shi
11Reve A̱sulazuva a yuwan adanshi na̱ Musa u damma,
12<<Damma aza a Isra'ila, na̱ ka vuma puwa̱n a̱vu u yuwaan yi ulambu wa̱ a̱ɓula̱, 13a damma nanza von ta̱ na̱ a̱yi, agba vali va̱ yi reve shi, agba e reve ni idaba ya̱ yi shi waru ili yi lo a na oo roco a aci a̱ yi shi, waru e reme yi a̱tsuma̱ a mayan shi, 14no okolo a vali va̱ yi e reme tsushu'un, reve u reme itamaha yi ka va̱ yi o o'wo ta̱ idaba, ko nu u yuwan tsushu'un reve u yuwan itamaha ya̱ yi ko nu u shi wo o'woto aciya̱yi idaba shi, 15vali'i u ta tara ka'a a̱ tyo ya ganu. Reve u ta̱wa̱a̱ na̱ kucci na vu ntsayi vu za ta̱ a̱tsuma̱ a kupa a yira i yitabo o una̱ wa̱ yi. She u tsun yira'a mani'in wan ko u tsun yi ili i ma̱guru wan, adama a na kucci vi ishina tsushu'un tsa ɗa, kucci vu ucuwusan ɗa adama u rono ugbozu u vuma tsura̱ mejege mo uta̱ alanga eteshe.>>
16<<Ganu ta̱ ta̱wa̱ na̱ ka'a reve u zuwa yi wi isawan a̱ ma̱ka̱ka̱n ma̱ A̱sulazuva. 17Reve u kene mini ma akiza ma na ma̱ ri o upondo u ci'in, reve u kene ma̱buta̱ me iɗa mo oogodoꞌo u tsun pe a̱ mini'i. 18Reve ganu ta̱wa̱ na̱ ka'a u zuwa yi wi isawan a̱ ma̱ka̱ka̱n ma̱ A̱sulazuva. Reve u ba̱ɗa̱ a̱nji a aaci a̱ yi. A̱vu u zuwa akapi a̱ kucci vu ucuwusan e ekere a̱ yi kucci vi ishina ɗa adama a̱ tsushu'un. Reve ganu na aciya̱yi u guza̱ mini mo okono ma na ma̱ tsu zuwa una̱ u reme. 19Reve ganu zuwa ka'a u yuwan akucunu, u damma yi, <Nna̱ vali ro von na̱ a̱vu shi waru vo o'woto aciya̱wu idaba adama o ulambu wa̱ a̱ɓula̱ e ekere a vali va̱ wu shi, lyawa vo o'wo fa̱a̱n e ekere a̱ mini mo okono ma nda ma na ma tsu zuwa una̱ u reme. 20Amma na̱ vu von ta̱ na̱ vali ro za na ri vali va̱ wu shi, reve vo o'woto aciya̱wu idaba,> 21reve ganu zuwa ka'a u yuwan akucunu a na una̱ u tsu reme, u damma ka'a, <Lyawa A̱sulazuva a zuwa ama a̱ wu aa yuwaan wu una̱ waru a wasan wu, nu u zuwa umatsutsun wa̱ wu u ɓa̱ru waru a̱a̱tsuma̱ a̱ wu a tsutsa. 22Lyawa mini ma nda ma na ma̱ tsu ta̱wa̱ nu una̱ ma uwa a̱ lipu va̱ wu, u zuwa a̱a̱tsuma̱ a̱ wu a tsutsa, reve waru u ɓa̱ru umatsutsun wa̱ wu.> Reve ka'a u damma, <Ami, lyawa wo o'wo ne.> >>
23<<Ganu'u u ta ɗana una̱ u nda a aatagada o ukutsulusu a̱vu wu za̱'wa̱ le na̱ mini mo okono'o. 24Reve u zuwa ka'a u sowo mini mo okono ma na ma tsu zuwa una̱ u reme, adama mini'i u uwa a̱ lipu va̱ yi u ta̱wa̱a̱ yi na̱ a̱tsuma̱lima̱ a wuya. 25Reve ganu ushi kucci vi ishina tsushu'un diga e ekere a ka'a reve u 'ya̱sa̱n yi a̱ ma̱ka̱ka̱n ma̱ A̱sulazuva reve u ta̱wa̱ na̱ a̱yi a masa'a. 26Reve ganu kene kucci vi ishina ukere tapu a̱vu u kula̱to le a masa'a'a kucci vu ucuwusan. No o koto reve u zuwa ka'a u sowo mini'i. 27Nnu u zuwa yi u sowo mini'i, nu wo o'woto ta̱ aciya̱yi idaba o ulambu wa̱ a̱ɓula̱ e ekere a vali va̱ yi, mini ma na ma tsu zuwa una̱ u reme'e ma ta uwa a̱ lipu va̱ yi reve u zuwa yi u sowo a̱tsuma̱lima̱ a wuya. A̱a̱tsuma̱ a̱ yi a ta tsusa reve umatsutsun wa̱ yi u ɓa̱ru. Ka'a u to o'wo za na una̱ woo tono a̱tsuma̱ a ama a̱ yi. 28Amma na̱ ka'a wo o'woto aciya̱yi idaba shi u von na̱ vali ro shi, u to o'wo fa̱a̱n reve u tsura̱ limatan.
29<<A̱yi nda a̱yi ɗa wila̱ adama a̱ tsushu'un, na̱ ka yuwan ulambu wa̱ a̱ɓula̱ wo o'woto aciya̱yi idaba a̱yi o lolo. 30Ko na̱ majiyan ma̱ tsushu'un me reme vali reve u yuwan itamaha yi ka va̱ yi. Ganu ta zuwa ka'a wi isawan a̱ ma̱ka̱ka̱n ma̱ A̱sulazuva, reve ganu'u u yuwan na̱ a̱yi cine wila̱ u nda u dammai suru. 31Vali'i u ta̱ fa̱tsa̱ o unusu'u amma ka'a u ta tara ume wu unusu wa̱ yi.>>
اکنون انتخاب شده:
Mekece 5: TSW
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2025 Language Development and Translation Initiative (LDTI)