An Roma 9
9
A'Sil a neta̱n na̱-na̱
1A̱m vatk m'ga̱u, rema̱n i mi u Ka̱risti. Za ko̱lca m retin da. A̱m napk ta̱m taanl a̱nmin de̱bc ri. Rema̱n i Hora̱md Na'Sil a̱n reina̱n gabta̱m ri. 2A̱m ci naam c'de̱b a d'o̱so̱mo̱n hwe̱di a̱n de̱bc ri. 3I pa̱tk be̱ na ze az Sila emaka m s'nwa̱a̱, a wankse m ta̱m a Ka̱risti ni. Awaz be̱ ti de̱l an baco, an remd ri, a kum d'gwa̱a̱ma̱. 4An baco nane, i an Isra'ila. I na̱nna a̱n Sila kabin a soot aka̱n na̱. Sila kwesaka na̱ ta̱m gwink na̱. A gigk lalk ai ta ema na̱. A nesk na̱ giiras Mosa. A kwesaka na̱ ho̱da̱na̱n ta hwiipsta̱ na̱ i kasi. A ve̱ce̱ke̱ ta̱m na̱ rihic hyan ca̱n ta ema na̱.#9:4 Go̱t ta̱m: U'Rwa̱ 4:22.
5I baa na̱ a̱n cetonc c'swaaca̱n#9:5 I Ibrahi, Isaaku na Yakubu bo̱. rwa̱ini. I baan goov na̱, a̱n remsa̱ c'nocurimu, a̱n Ka̱risti rwa̱ini. Un rein Silan kooye̱, kan nan bo̱m d'kal-d'kala. A̱nha̱a̱n.
6Za la az i lalksa̱n Sila vatin ta es da. Rema̱n za an rwa̱in Isra'ila kwe̱, a̱n rein akna Na'Sil da. 7Za la rema̱n i na̱nna goov Ibrahi a retin akna Na'Sil da. Lalks Na'Sil zeka, “I baa Isaaku a̱n nan kum goov rovo.”#9:7 Go̱t ta̱m: D'Tak 21:12. 8Rina̱n na rein na̱m'ze, i, za aknan macu c'nocurimu an rein akna Na'Sil da. I aknanan Sila gigin lalk az nan kumu, a̱n na o̱min goov Ibrahi. 9Hong na lalkuna̱n Sila gigine, “Dahe, a̱n goon daava̱ hna, ta̱'m vaaka m gita̱ Seera matk waa'a̱rma̱.”#9:9 Go̱t ta̱m: D'Tak 18:10.
10Za ta̱m taanl c'taa da. Aknanan Rebeka matine, i k'ceto k'da̱n, ceta cinna Isaaku. 11Puti an tan na, ai na matt la akna ne, a emt rihi i kasi alla i naake, bat rina̱n Sila se̱e̱pse̱in ti esa. Az i soot i kan a dagin a̱n rein rihi. 12Az za rema̱n yomka noc da, i rema̱n se̱e̱pse̱d Na'Sila̱. A ve̱ce̱te̱ bo̱ Rebeka, “Waa hwa̱tka̱ tu ema kan dim v ru m'coko.”#9:12 Go̱t ta̱m: D'Tak 25:23. 13I ho̱da̱na̱n i retin a'ge̱n a̱n lalks Na'Sila̱, “A̱m to̱nk Yakubu, a̱m ha̱lk Isuwa.”#9:13 Go̱t ta̱m: Mal 1:2-3.
14Iye̱ bo̱ kaa a̱n nan ze? Az Sila ta em-em bo̱ kaa honhon da? A̱'a̱. Za taanl da! 15Rema̱n Sila zeka Mosa, “Ka m to̱nin a̱m kwisi, ta̱'m kwisi. Ka m to̱nin ta̱m a̱m hong za̱im ru, ta̱'m hong za̱im ru.”#9:15 Go̱t ta̱m: U'Rwa̱ 33:19. 16Rema̱n taanlo, za rema̱n to̱nu noc alla kaama̱n hid ru da. I rema̱n kwisid Na'Sila̱. 17Rema̱n a̱nmin ge̱nsa̱n lalks Na'Sila̱, Sila zeka Fe̱ro#9:17 Fe̱ro: Go̱m va̱n copun Masar., “I rema̱n rihica̱ ha̱n a̱m kaatin v go̱mo̱. Bat ta̱'m kwesa we̱sma̱n go̱mc ri baa rovo. Na ba̱st ta̱m dind ri koope̱ a̱nmin copun yanda̱hna.”#9:17 Go̱t ta̱m: U'Rwa̱ 9:16. 18Rema̱n taanlo, Sila ta hong za̱im kan a to̱nine. A kands ta̱m de̱bc kan a to̱nine.
Hwinsa̱d Na'Sil a kwisid na̱-na̱
19Ta̱n la̱a̱ a̱n ze me, “I rema̱n ye̱ bo̱ kaa a̱n Sila ta sipt co a̱n d'ko̱to? Iwe̱ a̱n tu la̱a̱ a̱n ha̱l to̱nu Na'Sila̱?”
20E̱'e̱ nocurimu, i vo we̱, a̱v emata A'Sil k'se̱sse̱so? Rina̱n na main ti ipk ho kan main e, i ze, “I rema̱n ye̱ v maatin m taaha̱n ne?” 21Ka na'maa a tu la̱a̱ a̱n bala̱msa c'lo̱b u maa rina̱n u to̱nin da? Tu la̱a̱ u maa dori kasi a̱n lo̱bca̱n lo alla u maa i naake.
22I'Le̱e̱le̱ bo̱ kaana, awaz Sila nan rein na̱m'to̱n az a kwesa hwinsa̱d na̱, a kwesa ta̱m we̱sa̱m na̱. A gagk la c'de̱b a an hwennain az a ema d'hwinsu, an hwennain be̱ ta̱m az a hwaa? 23Sila em-em taanl a kwesata damran gwink na̱ baa aa kwesain za̱im na̱, aa walgin hyam m'e̱t az a kum gwink na̱. 24Cinna ge̱, aa po̱gine, za Yahude̱n c'taa da. I a an zain Yahude̱n da. 25I ho̱da̱n lo bo̱ a̱n Sila vattin a̱n vaak Hosaya. A zeka,
“An ta lain de̱ha̱n neta̱n ri da,
ta̱'m po̱g na̱ neta̱n ri.
Netnanan m ta lain ta̱'m to̱n da,
ta̱'m po̱g na̱ am rein na̱m'to̱no̱.”#9:25 Go̱t ta̱m: Hos 2:23.
26“Va̱na̱n na zein na̱ de̱hne,
‘Nwaa a̱n za netna Na'Sil da.’
I a̱n a̱n'a ge̱, a̱n nan po̱g na̱
‘Aka̱n Sila m'ga̱u.’ ”#9:26 Go̱t ta̱m: Hos 1:10.
27Isaaya k'barav Na'Sil ba̱sk ta̱m da̱n netnan Isra'ila. U zeka, “Go̱t ge̱ netnan Isra'ila el hwe̱di ho̱da̱n mamca̱ k'ge̱n, i i'hona la baa na̱ a̱n nan gwa̱a̱. 28Sila ta geda an copun yanda̱ha̱n lalk ka̱tt-ka̱tt na̱m'ga̱u. A ta naas ta̱m v'daa da.”#9:28 Go̱t ta̱m: Isa 10:22-23. 29I ho̱da̱na̱n Isaaya k'barav Na'Sil vattin de̱hne. U zeka, “A za be̱ an Kan Go̱mca̱n Kooye̱ le̱gse̱in cinna goo da, lawabe̱ Sila hok cinna ho̱d netnan So̱do̱m. A mina̱sa̱ na ta̱m ho̱d netnan Gomora.”#9:29 Go̱t ta̱m: Isa 1:9.
Cepks Bulus rem an Isra'ila
30Iye̱ bo̱ kaa a̱n na̱n ze? Go̱t an zain Yahude̱n da, an ta hobin rihica̱n gela̱v Na'Sil da, a kumk ca̱. I rihica̱n nan kum la baan bata̱m d'ba̱t baa Na'Sila̱. 31Netnan Isra'ila la, an kain d'hi a̱n gaba̱m s'giira az a kumt le̱vka̱n gela̱v Na'Sila̱, a ta kum la ka̱ da. 32I rema̱n ye̱? I rema̱n a ta bat d'ba̱t baa Na'Sil a̱n hoba̱n ka̱nka da. A hobk ka̱ a̱n we̱sma̱n hid na̱. A pa̱giski a̱n, “Taarda̱ d'pa̱gisi.” 33Ho̱da̱na̱n i retin a'ge̱n a̱n lalks Na'Sila̱. Sa̱ zeka,
“Go̱to̱, a̱m kaak taarda̱n
da̱n de̱l neta̱n pa̱gisi a̱n le̱in Zaayo̱n.
Taarda̱n da̱n de̱l neta̱n hwe̱di a hyaa.
Koowe̱ la a̱n batin d'ba̱t baa ru,
a tu tak a̱n ryaa m'e̱n da.”#9:33 Go̱t ta̱m: Isa 28:16.
اکنون انتخاب شده:
An Roma 9: driNT
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. and © The Nigeria Bible Translation Trust 2019