Yomka C'Comtne 23
23
1Bulus go̱tt bo̱ ka̱nk an gedma̱n lalk swa̱a̱n. U zeka, “De̱bc ri el ba̱ta̱ss a̱n hwic Na'Sil ho̱da̱na̱n m emtin c'nocurimu canma̱n te̱nte̱.” 2Hananiya, go̱m va̱ d'ka̱b u Na'Sil u so̱dk zeta bo̱ an lain a'es baa ru az a cakanna o k'do̱mo̱. 3Bulus zeta bo̱ o, “Sila ta cakanna la vo, vo oba̱l va̱ d'kika̱. Sooca̱d rov be̱ taha̱n iv gedata m lalk ho̱da̱na̱n giiras kaatine. Go̱t la v zek az na gonanna me. Giira ta ze la taanl da.”
4An lain a'es ko̱m Bulus, a ipkk o, “A̱v la bo̱ kaa a̱n rebc go̱m va̱ d'ka̱b u Na'Sil u so̱dke?”
5Bulus se̱st bo̱ na̱, “Hyaarene, a̱m ta lak a̱m napk az i unwa a̱n rein go̱m va̱ d'ka̱b u Na'Sil u so̱dk da. Rema̱n lalks Na'Sil zeka, ‘Av rebg la go̱m da.’ ”#23:5 Go̱t ta̱m: U'Rwa̱ 22:28.
6An Bulus ke̱e̱ste̱in az ahyan baa na̱ i Farisini, ahyan ta̱m i Sadusini, u ze̱lk v'god baa ka̱nk an gedma̱n lalko. U zeka, “Anba̱rini, i mi k'Farisi, waav k'Farisi ta̱ma̱. Na saka la lalk ri rema̱n a̱m sak u'con az a na wa̱a̱, nan po̱t a̱n hweda̱ d'be̱se̱.”
7Au vattin taanlo, Farisin a Sadusin gudgk a̱n s'lana. Hid na̱ wankske. 8Sadusin zek az a na wa̱a̱, a nan po̱t ta̱m da. A ta se̱s ta̱m az comta̱nc Na'Sil a c'horma̱n el da. Farisin la, a kabk az rihica̱ ha̱n kwe̱, c ello.
9Neta̱n sudka̱ suda̱ d'gudgu. Ahyan baa an la̱a̱sa̱m na s'giira, an ka̱nk Farisin, unutu bo̱ a emk s'lan na̱m'we̱se̱. A zeka, “Ca he̱n rina̱n a̱rm uha̱n emin i naak da. Tade̱e̱da, i d'hormo alla comta̱nc Na'Sil a̱n iga̱msin o.” 10An lans vaaktin ho̱d ni'dama, gelk ryaak so̱dka̱v koola̱n az ta pe̱la̱m Bulus. U de̱lt bo̱ koola̱n cizga̱, a kas Bulus na̱m'we̱s a sav o baan yomka na̱.
11A̱n gyopun lo, Kan Go̱mca̱n Kooye̱ haka u esk baa Bulus u zeka o, “Bulus, em c'a̱rma̱. Ho̱da̱na̱n v emtin ba̱sa̱d ri a̱nmin le̱in Urisalima, i ho̱da̱n lo bo̱ ta̱m a̱n ta̱'v emt a̱n le̱in Roma.”
A saak hweed Bulus
12Na̱m'zanta, Yahude̱n swe̱e̱ke̱ d'hi. A conkk a pata̱rska, az a ta ryaak alla a so̱o̱ rihi da, a za a hok Bulus da. 13Neta̱n to̱o̱k kwe̱zc il an swe̱in d'hi. 14A hata bo̱ baa c'hwengnan ka̱bd Na'Sil a c'hwenga̱n Yahude̱ne̱. A zeka na̱, “C conkk c pata̱rska, az a ca̱n ryaa alla c so̱o̱ rihi da, a za c hok Bulus da. 15Se̱e̱pse̱ na a an gedma̱n lalk no. A̱n palk so̱dka̱v koola̱n u nokta Bulus a̱n hwic ka̱nk an gedma̱n lalk az a̱n to̱nk a̱n be̱tk lalks ru a d'ke̱mne̱nne̱. Ca̱ el a'walg c hot o, ai u ceta baa no.”
16An waav ha̱n Bulus waa'wanta hongtin da̱n kwe̱e̱m na̱, u uvk baad an yomka koola̱n u ve̱ce̱ke̱ Bulus. 17Bulus dangt bo̱ u po̱g da̱nv so̱dka̱v koolno. U zeka o, “Sav waa'kempa uha̱n baa so̱dka̱v koolno, rema̱n u ci rina̱n tu ve̱ce̱ o.” 18So̱dka̱v koola̱n o̱mt bo̱ waa'kempaune u cet o baa damran so̱dka̱v koolno. U zeka o, “I Bulus un rein a'gag a̱n po̱gin me. U konk me az a̱m san waa'kempa uha̱n baa rovo. Az u ci rina̱n tu ve̱ce̱ vo.”
19Damran so̱dka̱v koola̱n sipt bo̱ koma waa'kempa a he̱gk v'kabo. U ipkt bo̱ o, “Iye̱ v to̱nin a̱v ve̱ce̱ me?”
20U zeta bo̱ o, “Yahude̱n se̱e̱pske̱ az a pal va̱ v san Bulus buk baa ka̱nk an gedma̱n lalko. Az a to̱nk a sud a̱n be̱tk lalk ru a d'ke̱mne̱nne̱. 21Av se̱s la da. Rema̱n neta̱n el a to̱o̱k kwe̱zc il a̱n kwe̱e̱m ru a hote. A conkk a pata̱rska az a ta ryaa alla a so̱o̱ rihi da, a za a hok o da. A la bo̱ na̱m'val a hongt awaz ta̱'v se̱s kons na̱.”
22An damran so̱dka̱v koola̱n pya̱a̱ksta̱in waa'kempa, u zeka o, “Av ve̱ce̱ la noc az a̱v ve̱ce̱ke̱ m rihica̱ ha̱n da.”
Bulus baa Fe̱liks gwamna
23U po̱gto̱ bo̱ so̱dka̱n koola̱n i'ila̱. U zeka na̱ “Walg na koola̱n s'za̱ngu s'ila̱, a an ta sak a̱n do̱ka̱n kwe̱zc ta̱a̱cu a̱n oopa, a̱n an ta bo̱p c'sapo s'za̱ngu s'ila̱. A sak le̱vka̱n havma̱n Kaisariya s'ko̱m s'door sa̱n gyop uhna. 24Walg na ta̱m do̱kuna̱n Bulus tu sakte. A̱n nap az a̱n cetk o m'ho̱o̱ka̱n baa Fe̱liks kan go̱mc nu'copo.” 25U ge̱nk ta̱m k'vaa ho̱d uhna: 26Klaudiyus Lisayas, el a̱n po̱o̱so̱m rovo, Fe̱liks ka k'gwin, kan go̱mc nu'copo.
27Yahude̱n sipk a̱rm uhna, ta̱m ca̱nmi a̱n kusin a hot o. A̱m hata bo̱ a koola̱n a̱m gwa̱a̱ o, ai retin na ve̱ce̱ke̱ m az i unwa kan Roma. 28Am to̱ntin a̱m nap rina̱n a zein az u emka, a̱m savk o baa ka̱nk an gedma̱n lalks na̱. 29A̱m ke̱e̱ste̱ bo̱ az rina̱n a zein az u emka, i lalksa̱n giiras na̱. A ta vat rina̱n cain na gag o alla na hwaa o da. 30Na ve̱ce̱ke̱ m az Yahude̱n el a̱n kwe̱e̱m ru a hote. I rina̱n de̱lin bo̱ a̱m de̱lt na nokto o baa rov a̱ndaabe. A̱m zek ta̱m an sain lalks ru az a noko a ve̱ce̱ v rina̱n u emin na̱.
31Koola̱n emt bo̱ rina̱n so̱dka̱v na̱ zein na̱. A o̱mt bo̱ Bulus a̱n gyopo, a cet le̱in Antipatris. 32Ai zantaine, a baak a lag koolnan do̱ka̱n to̱o̱ a Bulus ne. A vaakka kaa baan yomka na̱. 33Daav a cetin Kaisariya, a nesk kan go̱mc nu'cop vaak ne. A nesk ta̱m o Bulus. 34An kan go̱mc nu'cop po̱gtin ge̱nsa̱n vaak ne, u ipkt bo̱ Bulus az i unwa kan pe̱. Au naptin az Bulus i kan copun Silisiya, 35u zeka, “Lag an sain lalks rov can. Ta̱'m hong rina̱n de̱lin na sata lalks rovo.” U zeta bo̱ az na rega̱d Bulus a̱n ka̱bd He̱ro̱d go̱mo̱.
اکنون انتخاب شده:
Yomka C'Comtne 23: driNT
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. and © The Nigeria Bible Translation Trust 2019