نامَه تیتوس 3
3
اَسِی هر کَر خَش آمادَه بِش
1شُن یاد بیا که از حاکمیا و آنایاکِه صاحب مَکام و منصب هِت اطاعت بِکنِت، و فَرمو بِبرِت، و اَسِی هر کَر خَشی آمادَه بِت. 2دربارَهِ هِسکَه بَدگویی نِکنِت، اُ خوشو از جَر و مُرافِعَه دور بِکنِت، آروم بِت و خاد هَمَهِ مردم کاملاً وَ ملاحظَه رفتار بِکنِت.
3اَسِی که اَما خومو هم یَک زَمونی نادون هادِم، نافَرمو و گمراه هادِم، غُلوم هوی و هَوسیا و مَ رَکَم خوشگذرونی هادِم، رازیامو تِی بَدجنسی و حسادت مواَگذَرِنَه، مردم نَخچ اَما شُنِهاد و اَما از یَکُدو. 4ولی وَختی که خَشِنِ نجاتدَهندَمو خدا و مهربونیش اَسِی آدامیا، آشکار بو، 5آنا اُ اَما نجات اُشدَ، ولی اِ نجاتا وَخاطر کَرِی صالحی که اَما اَنجوم مُدَدِستاد، نِهاد، بلکه وَخاطر رحمتُش، و شُشتَئِه کَلبیامو هاد، که اُ واسطَهِ آنا روح کدّوس خدا، شُ اَما تولد تازه و زندگِنِ تازَه دَ. 6مِ روح کدّوسی که خدا اُ واسطَهِ نجاتدَهندَمو عیسی مسیح، وَ فَراوونی شُ اَما عطا کِه، 7تا وَ فیض آنا صالح اُ حساب بِلگِم و طِبک امیدی که اُ زندگِنِ اَبَدی مُهَه، وارثیا بِبِم. 8اَبِه اُ اِ حرفا اطمینان بِکنِش. و ما از تو مَئِه که لِی اِ چِییَهوا پریچ بِش، تَ آنایاکِه اُ خدا ایمون شُئوردِ حَواسشو بِه که اُ خوشو وَکف کَرِی خَش بِکنِت، اِ چِییَهوا اَسِی مردم بُری خَشِه و فایدَه اُشَه.
9ولی از جَر و جِنجالِی که از لِی نادونیه، از شجرَهنامَهیّا، از اختلافیا و جَر و مُرافِعَه دربارَهِ شریعت اُ خوت دور بِکو، اَسِی که اِ چِییَهوا نِه فایدَه اُشَه و نِه کِراماند. 10مِ کسی که جدایی اَبی، بعد از اِکِه یَک دَفَه و بعدُش دو دَفَه اُ آنا هشدار اُتدَ، رابطهاُت خاد آنا کَعط بِکو. 11اَسِی که اَدانِش اینا آدامی فاسد بُدِ و گُنَهکارِه، آنا خوش اُ خوش محکوم اَکو.
فَرمو و سلامِی آخر
12وَختی آرتِماس یا تیخیکوس تُحَد اَفرِستام، تا جَی که اَبِه تَکَلّا بِکو تَ اُ شهر نیکوپولیس مُحَد بِلگِش، اَسِی که تصمیم اُمگِرِتِه که زِمستو آنکا وامانام. 13تا جَی که تَشابِه، اُ زیناسِ وکیل و آپولُس تِی سفری که شُهَه، کُمَکشو بِکو، حَواسُت بِه تَ کام و کاستِنی شُنِبِه. 14بِهِر مردم اَما یاد بِگِرِت که اُ خوشو وَکف کَرِی خَش بِکنِت تا اینا یَک کمکی بِت اَسِی رفع نیازِی ضروری و زندگیشو بیثَمر نِبِه.
15هَمَهِ کسِی که خاد ما هِت، اُ تو سلام اَرَسِنِت. اُ آنایایی که خاطر اَما تِی ایمون شُئِه، سلام بِرَسِن.
فیض خدا خاد هَمَهِ شما بِه.
اکنون انتخاب شده:
نامَه تیتوس 3: LAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company