Mathāi 18
18
Vānrama Rēngrama Ālian Khīt Rang
Mk 9:33-37; Lk 9:46-48
1Hava hunlāi han a zolāi ngāi chu Isuo kōma a hong u na, “Hanle vān rēngrama hin tū mo ālian khīt rang?” a ti u na. 2Hankēng Isuo'n nāipangtē chu a kōma a pāi a, a malāi u taka a manding a, 3#1Pe 2:2amā'n, “Taktaka kei na ril a ni u zei, nei kīr u na, nāipangtē anga nā ni u nōk ten, vān rēngrama lūt thei u nō ta ni. 4#Mk 9:35Hasikhan tūkareng hiva nāipangtē anga annuoi tak chu vān rēngrama ālian khīt rang a ni. 5Tūkareng hiva nāipangtē khat anga ka raminga āpom tak chu, koi a nā pom a ni.
Mī Ansulna Ranga Anrēngna
Mk 9:42-48; Lk 17:1-2
6 #
Mk 9:42; Lk 17:2 “Tūkareng koi anā iam nāipangte ngāi bila angkhat pei a chulna a thō chu, a rīnga burōtna lung ankhāia tipui anthūka anning sela, ama ranga a sa uol. 7#Lk 17:1A chulna ngāi sika maniapūr chu a vān a duoi! A chulna chu ei hong rang ngal a ni, tenchu a chulna ān-ompū miring chu a vān a duoi. 8Na kutin mo ole na kē'n mo āsia a na manthō ten, tan tānla, pei ving ro. Kut anni mo ole kē anni mo a dōn a, tāituon moipuia nā chul nēk ten, bāngansama mo ole akhora mo a ni, damnāna ālūt chu na ranga a sa uol. 9Na mitin āsia a na manthō ten, kel tānla, pei ving ro. Mit anni adōna moikundūna nā chul nēk ten, mit khat adōna damnāna ālūt chu, na ranga a sa uol.
Bera Anpei le han Ankhīna
Lk 15:3-7
10 #
Aph 48:16; Sām 34:7; Kui 12:11, 15; Heb 1:14 “Hiva nāipangte ngāi bila angkhattē ngal hi sumdem nōk ranga anrēng u ro. Asik chu kei na ril a ni u zei, vānrama a vānpalāi ngāiin ka Pā anvāna om mēl chu ei mū chian u kēng. 11Miring Nāipasal hi ānpei ngāi ānzōk ranga ā hong kēng. 12Hong mo na mandon u? Mī khatin bera 100 dōn sela, hava bila angkhat lam anvāi sela, amā'n 99 ngāi a māk a, muolpui ngāia va kala, lam anvāi angkhattē chu vā rok nō ni mo? 13Taktaka kei na ril a ni u zei, ānpeitē ha a va man ten, lam anvāi lui 99 ngāi nēka, hava bera chunga rāi mansān uol in ti. 14Hantin anga han, hiva asīnte ngāi bila angkhattē ngal ei ānpei rang hi, anvāna na Pā u'n zōt mak a.
Na Paruol Āsia Thō Ruia
Lk 17:3-4
15 #
Lev 19:17; Lk 17:3; Gal 6:1; Zak 5:19-20 “Hanūk chu na paruolin na chunga āsia a thō ten, a kōma sē tānla, nang lē ama rong riata ei machāina chu va ril ro. Na hē a rangāi ten, na paruol chu nei man rēt a ni zei. 16#Atl 35:30; Dān 17:6; Zn 8:17; 2Ko 13:1; 1Ti 5:19; Heb 10:28Tenchu na hē a rangāi nōk ten, mī angkhat mo ole anni mo na bila ruoi tānla, hantin han, āriatpuipū anni mo ole anthum chongbāi le han rui tin chu anzēk in ti, (Dān 19:15)
a tī na. 17#Rōm 16:17; 1Ko 6:1-6Tenchu amāni hē ngal a rangāi nōk ten, kuibing kōma mantung ro. Kuibing hē ngal a rangāi nōk ten, ama chu na ranga namtei lē siachōipū anga ni rase.
Phil Chunga Ānkhit lē Ānzōk Rui
18 #
Mt 16:19; Zn 20:23 “Taktaka kei na ril a ni u zei, nangnī'n phil chunga nei khit u takpei chu vānramā'm ankhit in ti. Nangnī'n phil chunga nei mazōk u chu vānramā'm anzōka om in ti. 19#Mt 7:7Taktaka kei na ril rēt a ni u zei, maniapūra hin nangni bila annī'n ei zong u takpeia anruol u ten, hava ha amāni ranga anvāna ka Pā'n thōpē in ti. 20#Mt 28:20Ka raminga anni mo ole anthum mo ei ānchun una taka, a bil una kā om,” a tī na.
Ānduol Zōtlui Suok le han Ankhīna
21 #
Mt 6:14; Lk 17:4 Hatuka Peter chu Isuo kōma a hong a, “Puma, ka paruolin ka chunga āsia thō sela, voi ituk mo kei maduol rang? Voi sari tenpei mo?” a tī na. 22#Aph 4:24Isuo'n a kōma, “Voi sari ten ni mak kei na ti, tenchu voi 77 ten kēng. 23#Mt 13:24; 25:19Hasikhan vān rēngram chu, rēng khatin a suok dōn ngāi kōm ātā hisāp alāk rang a zōt ang chu a ni. 24Sum hisāp ālāk a phut le chu, talen#18:24 talen: Talen 1 chu kg 32.3 a ni. Talen chu denari nēka thep 6,000 tāng ātam a ni. Atun taka sum teldān anga chu talen 10,000 hi dangkā 2,00,00,000 tāng a ni. 10,000 āntāng mī khat chu a kōma a hong ruoi u na. 25#Lev 25:39; 2Rē 4:1; Neh 5:5, 8; Lk 7:42Tenchu amā'n ei pēk thei lāi nōk sika, a pumā'n ama lē a thāinū lē, a nāi ngāi, hanūk chu ei dōn dōra a zuor zit a, āthuon ranga chong a pēk a. 26Hasikhan hava suok chu a makunga anbok a, ‘O puma, na maruong tot sā ro, aloma na thuon zit bō ning,’ a tī na. 27A pumā'n hava suok chu riangvāi a mū na, a mazōk a, ei āntāng chu a maduol a. 28Tenchu hava suok chu a sē na, a suok changpui bila angkhat denari#18:28 denari: Denari 1 chu nikhat lō a ni. 100 āntāng chu a va mū na. Ama chunga kut ā lek a, a rīngtaōk a sōmpē na, ‘Nei āntāng chu na thuon ro,’ a tī na. 29Hatuka a suok changpui chu a kekunga anbok a, ‘Na maruong tot sā ro, aloma na thuon zit bō ning,’ tīna, a mathēm a. 30Tenchu zōt mak a, tenchu ei āntāng a thuon suo māseng pei chu ankhumna-ina a va khum a. 31A suok changpui ngāiin a sinthōdān a mū u na, achālaka a malung a na u na. A sinthōdān chu a puma u kōma a sē na, aloma a va manthei zit u na. 32A pumā'n ama chu a pāi a, a kōma, ‘Nang suok salui! Nei na mathēm sika, nei āntāng ngāi dōra ka na maduol a! 33Riangvāi kei na mū anga, na suok changpui um lung nei manpōng rang ni mak mo?’ a tī na. 34A puma chu a tak asī na, ei āntāng dōra a thuon suo māseng chu, ānsinsakpū ngāi kuta a betōk a. 35#Zak 2:13Nangnī'n um na malung le han, na paruol u ngāi dān ei khēl una chu na maduol u nōk ten, anvāna ka Pā'n um hantin dēn han na chung una thō in ti,” a tī na.
Bible in Ranglong, © Bibles International, the Bible society of Baptist Mid-Missions, 2024.