Roma 6
6
Tǝtau Wu Bikau, Mbǝmbǝɗau Wu Kǝrsiti
1Mi nga mǝna sǝni na kabangǝka? Kariya, mǝna dumwa ǝnga mǝl bikau aga mayiwakur nǝ Hyal a cakǝ ya? 2Awau! Alaga kushu! A ɗar mǝn ǝnggǝr nji tǝtau anǝ bikau. Abar tsu nga mǝna ɓǝra sǝni dumwa ǝnga nggya a gwa? 3Ɗǝm ya, nahyi aˈyi wu sǝni abǝr patǝkura mǝn njira nji mǝliya nda baɓǝtizǝma wu Kǝrsiti Yesu, a gwu tǝ nyi nga nji mǝliya mǝn baɓǝtizǝma kǝ wa? 4Agabangau, namǝn lagur baɓǝtizǝmar mǝn a haɗǝna mǝnǝr nji ǝnga ja a gwu tǝ nyi. Nji haɗǝna mǝn aga ǝnggǝr kǝra nji hyaˈana Kǝrsiti sara vir tǝ lagu dǝnama nǝ kadakadarkur nǝ Tada, abangǝ tsu nga mǝn wu nda nggya ǝnga pi mafǝliyangǝu.
5Ta ɗa, a ɗar mǝn zǝmǝ ǝnga ja wu culi tǝ nyi, gǝra nga tǝkǝ kǝr, mǝnu nda nggya zǝmǝ ǝnga ja wu culi hyaˈari nyi sara vir tau. 6Ara mǝnu sǝni abǝr ndǝndǝkur mǝn nǝ ɗǝɗǝmǝ a dlakǝya nyir nji daɓǝ ǝnga ja, aga dǝnama nǝ bikǝ wu kumǝr dzau a tǝkǝ ǝnga mǝn ara mǝna sara ɓǝra ɗa mafa nǝ bikau. 7Ariya ma ndǝ a tǝri, a biyar ja sara wu dǝnama mafakur nǝ bikau.
8Kabangǝkau, ma mǝn a tǝri ǝnga Kǝrsiti, a hǝnggǝr mǝn abǝr mǝnu nda nggya ǝnga pi ǝnga ja. 9Ara a sǝnǝr mǝn abǝr ta ɗa a hyaˈanar nji Kǝrsiti sara vir tau, ǝtsu tsu ju ɓǝra tǝ mai, ariya tǝ aˈyi ǝnga dǝnama ar kǝra ja mai. 10Tǝ kǝra ji tau, ji tǝ aga zǝmǝu, aga ja ɓǝlna dǝnama nǝ bikau, ama nggyabiya nyi nggya aga Hyal ngau. 11Lagu kǝ tsu, hya hǝr kǝrhyi ǝnggǝr nji tǝtau anǝ bikau, ama ǝnga pi anǝ Hyal wu Kǝrsiti Yesu.
12Agabangau, hya sara piyari bikǝ ja sǝm tǝlkur ar kǝra kumǝr dza hyi kǝra tǝtǝ kǝ mai, a sara hya nu sǝra suna nǝ kumǝr dzǝ wu na mai. 13A sara hya lǝ gashal dza hyi anǝ bikǝ mai, aga ja ɗa sǝr mǝl thlǝr ɗǝmwaˈyu. Ama hya lǝr kǝrhyi anǝ Hyal ǝnggǝr njira nji hǝbiya sara wu tau a ndu pi, ǝnga hya lǝr gashal dza hyi tsu anǝ nyi ǝnggǝr sǝr mǝl thlǝr nǝ tsapǝkur. 14Ara bikǝ a sǝni sǝm tǝlkur ar kǝra hyi mai, ariya nahyi aˈyi ǝgya kiɗa dlaɗǝ mai, ama ǝgya kiɗa mayiwakur.
Mafa Tsapǝkur
15Abar ja, mi ngǝ sǝra a ˈya? Kariya, mǝna dumwa ǝnga mǝl bikau ariya aˈyi mǝn ǝgya kiɗa dlaɗǝ mai ya, ama ǝgya kiɗa mayiwakur Hyal ya? Awau, sǝ aˈyi wu ɗa abangǝ mai! 16Aˈyi hyu sǝni abǝr ma hyi lǝr kǝrhyi anǝ ndǝ aga hya ɓǝla ndǝr nyi, a ɗar hyi mafa nda nyi wa? Hya tsamǝ sǝ a gwa, tara mafa nga hyi anǝ bikau, kǝra wu shili ǝnga tau, ǝndǝga mafa nga hyi nǝ ɓǝlar ndǝr Hyal, kǝra wu shili ǝnga nggya tsapǝu. 17Ama usaku anǝ Hyal, alaga kau, a saya nggyar hyi mafa anǝ bikau, ama kabangǝkau ǝnga huɗǝ zǝmǝ nga hyi ɓǝlari culi highiɓǝ kǝra nji fuwa wu tsa hyi. 18A ɗar hyi kambau ar kǝra bikau ba hyi ɗa mafa nǝ tsapǝkur.
19Ya vǝr ndǝr kǝ anǝ hyi wu ndǝndǝkur, ariya tǝtǝwa nga hyi wu nggyabiya nǝ kum ǝnga mashi. Ənggǝr kǝra nggyabiyar hyi kǝra ɗǝɗǝmǝu, hyi lǝr gashal dza hyi aga mǝl sǝsukur ǝnga nggya ɗǝmwaˈyikur sara wu ɗǝfuwa hyi. Kabangǝkau hya lǝr kǝrhyi ar viya mafa nǝ tsapǝkur kǝra wu shili ǝnga cicikur. 20Ar pǝci ta hyi wu mafakur anǝ bikǝ ta, aˈyi hyi ǝgya kiɗa tsapǝkur mai.
21Ar pǝci ta, wa thlǝmǝ akkǝri kǝra hyi uya wu nggyabiya kǝra kabangǝkau, sǝli wu tǝ hyi ar kǝri ka? Culi sǝˈyar kau, kǝl tǝ nga ndu shili ǝni wacu! 22Ama kabangǝkau, a ɗar hyi kambǝr nji sara wu bikau ba hyi ɗa mafa Hyal, kǝra akkǝri nyi ca ngǝ cicikur, kǝra wu yabiya pi gǝra kuɗau. 23Ariya akkǝri nǝ bikau ca ngǝ tau, ama lǝ sǝ kurthlǝ nǝ Hyal ca ngǝ pi gǝra kuɗau wu Kǝrsiti Yesu Thlagǝr mǝn.
©2024 Initiative for the Translation and Development of African Languages and Margi Tiwi Nga Təm