रोमियो 7
7
ब्याह लहसी जीवनो दृष्टांत
1हे गिऊ प्यारे साथी विशवासी रे, केहच़ी ञेंच़ातंई कि गेह कानून ञेंहच़ा तंङ साते कुट्रातग, कि अपेहल तचेक मीह श्रींङी बंङज़ा, धोंण तचेक दोऊ टोईच़ी मुसाओ कानूनो अधिकार बंङज़ा। 2ब्याह लहसी मेच़िमी कानूनो हिसाबे एनोह गगसो श्रींङे दोरंङ साते छुहसा तोह, पर अगर दोऊ गगसा सिए इलि, दंङ दू कानूनी तरीका रंङ साते एनोह गगसो दोरच़ी मुक्त शुहचे यवाह। 3झांह लेह अगर गगसो श्रींङरिए दू अरिया ऊई गंङमी शुहचे इलि ता दू कुकम लहज़ा शोतो, पर अगर गगसा सिए इलि ता, दंङ दू, दू कानूनो दोरच़ी युप्सा योतो, देर तचेक कि अगर दू अरिया ऊई गंङमी शुहचे इलि ता दू कुकम लहज़ा माह शोतो। 4ध्वांए ए गिऊ न्वारे, अपेहल केरे मसीह रंङ सिए इलजी तोतोंई, दंङ केरे मुसाओ कानूनो अधिकारो थल्जी ला सिए इलजी तोंई। एंतेग केरे मसीहू शुंई अंऊ सिमी दोरच़ी श्रींङे इलि ताकि केरे परमेश्वरो थल्जी फल हचि तरपोंई। 5छना कुचे अपेहल हेनर हेंदु पापी स्वाभावो वशा रिंङ तोईनी, दंङ पापो हिटी हेंदु अंदरेग कम लहज़ी लेहकी तोहई, दंङ कानूने दि मदम हिटी चेहक्पी लेह च़रति, दंङ मौतो फल पैदा लहज़िमी थल्जी हेंदु फुका रिंङ कम लहज़ाते। 6पर हेनर दू कानूनो थल्जी सिए इलोन, अच़ि इच्च़ा फेरा हेनर बंदी बणाके केहते, झांह लेह हेनर एंतेग कि कानूनो दोरच़ी आज़ाद शुहचे ईलोईं ञेंरे परमेश्वरो सेवा युई तरीका रंङ च़ेहसी कानूनो ठ्रोह माह लहज़ातंई, पर खरकोई तरीका रंङ परमेश्वरो आत्माओ अगुवाई ओ दोरच़ी लहज़ातंई।
कानून ए पाप
7दंङ छि दिऊ मतलब दि तोह आ कि कानून पाप शुह? माह! बिल्कुल माह! पर दिए कानूनो दोरच़ी गेह पाप बि ञेंए केहतग। गेह ञेंए चरच़ातग कि लालच लहज़ी पाप शुह, छना कुचे कानूनारिंङ दि च़ेहसी तोह कि, “लालच थालोहू।” 8पर पापे दि हुकुमो इस्तेमाल लहज़ी गिह्बी भत्ते पाहठी लालच पैदा लहरी, छना कुचे कानून मेह पापो छल्ले सामर्थ माह। 9तुहई गेह कानूना बि ञेंए मेह श्रींङी तोईगा, पर अपेहल गेह कानून ञेंए केहतग, दंङ पापो शाक्ति गिऊ अंदरेग बढेक्पी लेहती, दंङ पापे गेह परमेश्वरो दोरच़ी शत्ह लेह च़रति। 10दंङ दू ए हुकुमे अंऊ परमेश्वरे गिऊ श्रींङमी बि वहज़ा बणाकते, गिह्बी परमेश्वरो दोरच़ी शत्ह लेह च़रति। 11पर पापे दि हुकुमो इस्तेमाल लहज़ी गिह्बी धोखा रेंई, दंङ दोऊ दोरच़ी गिह्बी परमेश्वरो दोरच़ी शत्ह लेह च़रति।
12झांह लेह ञेंहच़ी दि कुट्री तरपोंई कि कानून पवित्र तोह, दंङ दोऊ हुकुम पवित्र, धर्मी ए रूठे तोह।
13दंङ छि कानूने, अंऊ रूठे तोहई, गिह्बी परमेश्वरो दोरच़ी शत्ह लेह चरच़तो आ? माह! बिल्कुल ला माह! पर दि पाप तोहई अच़ि झांह लहरी। पापे दू ए कानून अंऊ रूठे तोहई दोबि इस्तेमाल लहज़ी गिह्बी परमेश्वरो दोरच़ी शत्ह लेह च़रति। झांह लेह पापे कंङातो कि दू हेले रिंङ छि शुह, दंङ हुकुमे कंङातो कि पाप भत्ते पाहठी मांजी तोह।
मीहू अंतद्रष्टि
14छना कुचे ञेंहच़ी ञेंच़ातंई कि कानून ता आत्मिक शुह, पर गेह मीह शुगाह दंङ पापो गुलाम शुगाह। 15दंङ छि गेह लहज़ातग दू माह ञेंएगा, छना कुचे छि गेह जुंज़ातग दू माह लहज़ातग, पर अंऊ दिरिंङ गिह्बी नफरत अपा, दू गेह लहज़ातग। 16दंङ अगर, गेह छा माह जुंज़ातग दंङ गेह मनेकी यवातग कि कानून रूठे तोह। 17दंङ झांह ठ्रोह हालातरिंङ मदम लहज़ा गेह माह शुगाह, पर पाप शुह अंऊ गिऊ अंदेरग बसेगी तोह। 18छना कुचे गेह ञेंच़ातग, कि गिऊ पाप रूपी मीहतु स्वाभावा रिंङ छल्ले रूठे चीज़ वास माह लहज़ा। रूठे कम लहज़िमी हिटी ता गिह्बी तोह, पर दोतिंङ गेह लेह माहरच़ातग। 19छना कुचे अंऊ रूठे कमो गेह हिटी लहज़ातग, दू ता माह लहज़ातग, पर अंऊ बुराईऊ हिटी माह लहज़ातग, दू ए लहज़ातग। 20पर अगर गेह दू ए लहज़ातग अतु हिटी माह लहज़ातग, दंङ दोऊ लहज़ार गेह माह केहषोग, पर पाप ए तोह, अंऊ गिऊ अंदरेग बसेगी तोह।
21झांह लेह, गिऊ तज़ुर्बा दि तोह कि अपेहल गेह रूठे लहज़िमी हिटी लहज़ातग, दंङ बुराई ए शुहचे यवात। 22छना कुचे गेह घेंङौ सेहमे ता परमेश्वरो कानूनो दोरच़ी महस खुश बंङज़ातग। 23पर गिह्बी घेंङौ फुको अंङ रिंङ ऊई पाहठी नियम तंङफातोर, अंऊ गिऊ बुद्धि ऊ नियम रंङ साते झगड़ा लहज़ातोर, दंङ दोच़ी गिह्बी दू पापो गुलाम लेह चरच़ातोर अंऊ एंतेग ला गिऊ अंदरेग तोह। 24गेह छि ठ्रोह बदकिस्मत मीह शुगाह! दि मौतो अधीन बंङज़ा फुको दोरच़ी गिह्बी अच़ि मुक्त लोहतो? 25गेह बाह परमेश्वरो धन्यवाद लहज़ातग अच़ि यीशु मसीहू दोरच़ी गिह्बी बचाके च़रति। झांह लेह गेह घेंङौ सेहमे ता परमेश्वरो कानूनो भाषे लहज़ातग, पर फुके पापो कानूनो भाषे लहज़ातग।
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.