रोमियो 5
5
परमेश्वरारंङ साते मेल
1झांह लेह हेनर विशवासो दोरच़ी धर्मी ठहरेक्सा इलिन, दोहपल प्रभु यीशु मसीहू दोरच़ी परमेश्वरा रंङ साते हेंदु मेल-मिलाप शुचि इलजी तोह। 2हेंदु विशवासो दोरच़ी, मसीह ज़ि हेंदिंङ दि मोह्ड़े दाह तचेक रैंज़ा हति अंऊर हेनर हेंतेग पिचे तोतोंई, ञेंरे दि गप्पारिंङ खुश शवातंई कि हेंदिंङ परमेश्वरो महिमा रि सहभागी शुहबिमी उम्मीद तोह। 3सिर्फ दि माह, पर हेनरे दुखारि ला खुशी मनेक्पोंई, दि ञेंए कि दुखा रिंङ ए धीरज़, 4दंङ धीरजो दोरच़ी रूठे चाल-चलन, दंङ रूठे चाल-चलनो दोरच़ी उम्मीद पैदा शुहबी। 5दंङ उम्मीदारंङ शार्मिन्दगी माह शुहबी, छना कुचे पवित्र आत्मा अंऊ हेंदिंङ परमेश्वरे रांहषी ततो दोऊ दोरच़ी परमेश्वरे एनोह दाह रंङ साते हेंदु सेहम पिंङे केहतो।
6छना कुचे अपेहल हेनर कमज़ोर ए तोहनी, दंङ परमेश्वरो ठहरासी टेमा रिंङ मसीह हेनर मदम मीहतु थल्जी सिए इलि। 7शायद ए अरिया धर्मी मीह थल्जी एनोह जहान रमतो, दि ता खरे तोह, तांला शुहबी तरपोतो कि रूठे मीहू थल्जी अरिया सिमी थल्जी तेयार शुहचे योतो। 8पर परमेश्वरे हेंदु टोईच़ी एनोह दाह ओ भलाई दि रीति रंङ प्रगट लहज़ा, कि अपेहल हेनर पापी ए तोहनि दोहथर मसीह हेंदु थल्जी सिए इलि। 9झांह लेह अपेहल हेनर परमेश्वरे रंङ साते धर्मी घोषित शुहचे इलांई, छना कुचे मसीह हेंदु थल्जी सिए इलि दंङ हेंदु पापो थल्जी एनोह शुहई बहाएक्ति। दंङ मसीह हेंदिंङ पक्का ए परमेश्वरो रोहषो दोरच़ी बचाएपोतो। 10छना कुईनता बेरी शुहबी दशारिंङ दोऊ मीह सिऊ दोरच़ी हेंदु मेल परमेश्वरो साते शुई, ता यच़ाह मेल शुहचे इबिरंङ साते दोऊ जीवन कारणे हेंज़ी उद्धार छना मा खोकपोंई? 11सिर्फ दि मशत, पर हेंतेग ता हेंदु प्रभु यीशु मसीहू दोरच़ी परमेश्वरारंङ साते हेंदु मेल-मिलाप शुहचे इलज़ा; झांह लेह ञेंरे परमेश्वरा रिंङ खुश तोतोंई।
आदमो दोरच़ी सि, मसीहू दोरच़ी जीवन
12झांह लेह छना कि इच्च़ा मीहू दोरच़ी पाप संसारारिंङ अति, आदम ए दू मुण्डो मीह शुह अतिंङ परमेश्वरे बणाएषी शुह दंङ आदम ए पाप लहरी, दंङ सिए इलि। झांह लेह मौत भत्ते मीहतिंङ फेलेके इलि, छना कुचे भत्तेर पापी तोतोर। 13परमेश्वरो दोरच़ी मुसाओ कानून रंड्रीमी तुहई पाप संसारारिंङ तोहई। पर दिबी पापो हिसाबे मिक्च़ातेर माह छना कुचे हेंतेग तचेक उलंघन लहज़िमी थल्जी छल्ले कानून माह तोहई। 14तांला आदम ए मूसा तचेक भत्ते मीहच़ी पाप लहसी तातोर दंङ दोरे भत्तेर सिए इलोर। अच़ि आदमो ठ्रोह अंऊआ कानूनो उल्लंघन दोरच़ी पाप माह लाहते। आदम दू मीहू (मसीहू) चिन्ह तोहई अंऊ अपिमी तोह।
15पर आदमो पाप दू वरदानो ठ्रोह माह अंऊ परमेश्वर हेंदिंङ एनोह मोह्ड़े दाह ओ दोरच़ी रंड्रा। छना कुचे इच्च़ा मीहू पाप महसे मीहतु थल्जी मौत रैंज़ा हति। पर परमेश्वरो मोह्ड़े दाह ए धर्मिकता ओ वरदान अंऊ दोई हेंदिंङ रांहषी ततो, दोऊ कीमत महस मीहतु थल्जी दोबि ला महस तोह। दंङ यीशु मसीह ज़ि इच्च़ा मीहू रूपा रिंङ एनोह मोह्ड़े दाह रंङ साते लहरी, दोई दि संभव लहरी। 16परमेश्वरे अंऊ मोह्ड़े दाह हेंदिंङ रांहषी ततो दू आदमो पापो ठ्रोह माह। छना इच्च़ा मीहू पाप सज़ा रेंज़ा हति। पर अगर हेंज़ी महस पाप लहसी शोंई, तांला परमेश्वरे हेंदिंङ इच्च़ा झांह ठ्रोह वरदान रांहषी ततो अच़ि हेंदिंङ दोऊ नज़रारिंङ धर्मी बणाके चरच़तो। 17छना कुचे अपेहल इच्च़ा मीहू अपराधो वहज़ा ज़ि भत्ते मीहतु टोहकठे मौत अच़ा अति, दंङ अंऊ मीहरे मोह्ड़े दाह ए धर्मिकता ओ वरदान महसे खोकपोर, दू इच्च़ा मीहू दोरच़ी, मतलब यीशु मसीह रंङ साते हेले ए अनंत जीवन खोकपोर दंङ यीशु मसीह रंङ साते राज लोहर छना कुचे दोच़ी दोऊ टोहकठे विशवास लहज़ातोर।
18झांह लेह छना इच्च़ा मीहू अपराधो दोरच़ी भत्ते मीहतिंङ सज़ा खोकसिरी, ध्वांए इच्च़ा धर्मिकता ओ कम ला भत्ते मीहतु थल्जी धर्मी शुहबी वहज़ा शुई अच़ि जीवन रंड्रा। 19छना कुचे इच्च़ा मीहू हुकुम माह मनेक्च़िमी रंङ साते महसे मीहरे पापी शुईरे, ध्वांए इच्च़ा मीहू हुकुम मनेक्च़िमी रंङ साते महसे मीहरे धर्मी बणेक्पोर। 20थले मुसाओ कानून दिऊ थल्जी रेंईर ताकि भत्ते मीहरे खंड्री तरपोर कि दोरे अंयों पापी तोईरे। दंङ अपेहल मीहच़ी महसे बे महसे पाप लहज़ी लेहतिर, दंङ परमेश्वरे अंऊ मोह्ड़े दाह कंङाते दुह ला महसे बे महसे बणेंके इलि, 21कि छना भत्ते मीहच़ी पाप लाहतेर दंङ दोरे भत्ते सिए इलिर, ध्वांए ए हेंदु प्रभु यीशु मसीहू दोरच़ी मोह्ड़े दाह ला धर्मी बणाएपोतो दंङ दोतिंङ अनंत जीवन रमतो।
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.