रोमियो 1
1
नमस्ते
1गेह पोलुस दि डाक च़ेहसी लेहकी तोतोग, अंऊ यीशु मसीहू परगर शुगाह, परमेश्वरे गेह प्रेरित शुहबिमी थल्जी अंङषी शुगाह, दंङ परमेश्वरो तरफे दुह रूठे खबरो प्रचार लहज़िमी थल्जी शत्ह लेह च़रति। 2परमेश्वरे तुहई बेहच़ी एनोह भविष्यवक्ताओ दोरच़ी पवित्रशास्त्रारिंङ दुह रूठे खबरो वाईदा लाहते, 3दि रूठे खबर दोतु योह, हेंदु प्रभु यीशु मसीहू पाहठी तोह। दोऊ जन्म इच्च़ा मीहू रूपारिंङ रज्ज़ा दाऊदो खानदाना रिंङ शुई। 4दंङ पवित्र आत्माओ शाक्ति रंङ साते दुह सिमी दोरच़ी श्रींङे इबिमी सामर्थ रंङ साते परमेश्वरो योह साबित शुहचे इलि। दुह यीशु मसीह हेंदु प्रभु शुह। 5मसीहू दोरच़ी गिह्बी मोह्ड़े दाह ए प्रेरिताई ओ सेवकाई परमेश्वरो दोरच़ी रांहषी तोह, ताकि दोऊ मिन्दु बजाहज़ि भत्ते जातिऊ मीहरे मसीहू टोहकठे विशवास लोहर दंङ दोऊ हुकुम मनेक्पोर, 6केरे अंऊ रोम शहरारिंङ बंङज़ातंई, केरे ला दितु हिस्सा शुंई अतिंङ यीशु मसीहू शुहबिमी थल्जी बुलासी शुंई।
7गेह दि डाक रोम शहरो दुह भत्ते मीहतु थल्जी च़ेहसी लेहकी तोतोग, अंऊ परमेश्वरो प्यारे तोतोर, दंङ अतिंङ परमेश्वरे एनोह मीहरे शुहबिमी थल्जी अंङषी ततो; हेंदु बाह परमेश्वर ए प्रभु यीशु मसीहू दोरच़ी केतिंङ मोह्ड़े दाह ए शांति खोकसा लोहतो।
धन्यवादो प्रार्थना
8भत्ते बे तुहई गेह केहतु भत्ते तु थल्जी यीशु मसीहू दोरच़ी घेंङौ बाह परमेश्वरो धन्यवाद लहज़ातग, छना कुचे यीशु मसीहू टोहकठे केहतु विशवासो पाहठी महस ठाहरीरिंङ मीहच़ी गप्पा लहज़ी लेहकी तोतोर। 9परमेश्वर अतु सेवा गेह घेंङौ सेहमे दोऊ योह ओ पाहठी रूठे खबर मीहतिंङ सुनाके लहज़ातग, दुह ए गिऊ गवाह शोतो, कि गेह केतिंङ लगातार घेंङौ प्रार्थना रिंङ हिद लोहवा लहज़ातग, 10दंङ हर ध्याड़ारिंङ घेंङौ प्रार्थनारिंङ बिनती लहज़ातग, कि अगर शुहचे तरपो ता परमेश्वरो हिटी ओ हिसाबे गेह केतंङ साते दोई अपोग। 11छना कुचे गेह केतंङ साते दोईमी हिटी लहज़ातग, ताकि गेह केतिंङ छा आत्मिक आशीष रमोग, अंऊ दोरच़ी केरे विशवासरिंङ ढकह शुहचे योंई; 12गिऊ कुट्रिमी दि मतलब तोह कि अपेहल गेह केहतु कछंङ अपोग, दंङ गेह ए कांह हेंदु बिचंङ इदि-अई दिऊ विशवासो दोरच़ी उत्साहित शुहचे योंई। 13दंङ हे गिऊ प्यारे साथी विशवासी रे, गेह मा जुंज़ातग कि केहच़ी ञेंई च़रतेंई कि गेह घड़ी-घड़ी केहतु कछंङ अपिमी जुन्ज़ातेग, कि गेह छना ऊईजाति तु बिचंङ लहज़ातेग, ध्वांए केहतु बिचंङ ला लोहग, पर एंतेग तचेक दिरिंङ रूकावट ए अपाते। 14गिऊ ज़िमेवारी भत्ते मीहतिंङ रूठे खबर सुनाच़ी तोह, चाहे दोरे यूनानी भाषा ञेंहच़ा शोरे या माह ञेंहच़ा शोर चाहे दोरे बुद्धिमान या निर्बुद्धि शोर। 15झांह लेह गेह केतिंङ रोम शहरारिंङ बंङज़ा तिंङ रूठे खबर सुनाएच़िमी थल्जी तेयार तोतोग।
रूठे खबरो सामर्थ
16छना कुचे गेह यीशु मसीहू रूठे खबरो टोहकठे पूरा विशवास लहज़ातग, एनोह सामर्थो दोरच़ी परमेश्वर दू भत्ते तु उद्धार लहज़ा, अंऊ दि रूठे खबरो टोईच़ी विशवास लहज़ातोर, भत्ते बे मुन्डा यहुदी मीहतु दंङ दोतु अंऊ यहुदी मीह माह तोहर। 17छना कुचे रूठे खबरा रिंङ परमेश्वरे दि प्रगट लाह कि दुह मीहतङ भत्ते रिति रंङ धर्मी घोषित लहज़िमी जोगे तोह, अंऊ दू शुरूआत बेहच़ी थल मुखंङ तचेक विशवासा रिंङ टिकेकी तोह छना पवित्र शारत्ररिंङ च़ेहसी तोह, “विशवासो दोरच़ी धर्मी मीह श्रींङे बंङज़ोतो।”
मीह जातिऊ पाप
18परमेश्वरो रोहष ता स्वर्गो दोरच़ी दुह मीहतु भत्ते पाहठी मदम ए अधर्मो कमो टोहकठे प्रगट शवाह, अंऊ एनोह मदम कमो दोरच़ी मीहतिंङ परमेश्वरो पाहठी सच्चाई ञेंहच़ी रंङ रोकेक्च़ातोर। 19झांह लेह दोरे योह्च़े तरीका रंङ साते परमेश्वरो पाहठी रूठे रंङ ञेंहच़ा तोरे छना कुचे परमेश्वरे एनेह ए दोतु टोईच़ी प्रगट लहरी। 20परमेश्वरो अनंत सामर्थ ए गुण तंङी मारछी। पर दि गप्पारे परमेश्वरे धरती ऊ उत्पत्ति बे तुहई, एनोह रचना लहसी भत्ते चीज़ो दोरच़ी कंङे चरच़तो। झांह लेह दुह मीहतु कछंङ दि कुट्रीमी छल्ले बहाना माह कि दोरे परमेश्वरा बि माह ञेंहच़ातोर। 21दि बहजाज़ि कि परमेश्वर ञेंए थल ला दोच़ी परमेश्वरो रूपा रिंङ दोबि आदर माह रेंईरे, दंङ माह ए दोऊ धन्यवाद लहरिर, पर दोरे दि भत्ते मुर्खता सोचेक्च़ातोर, देर तचेक कि दोतु मुर्ख विचार भत्ते गलत शुह। 22दोरे एनाबि बुद्धिमान ञेंहच़ा मुर्ख बणेंके इलिर, 23दोच़ी हमेशा श्रींङे बंङज़ा परमेश्वरो महिमा छोड़ेके, नाशवान मीहतु ए, प्यारे तु, दंङ चोपायो ए, घुष्टि जीवा तु ए मुर्ति तु अराधना लहज़ातोर।
24झांह लेह परमेश्वरे दोतिंङ दोतु सेहमो हिटी हिसाबे, मदम कमो थल्जी केहच़ी च़रति, कि दोरे एनातु बिचंङ एनातु फुको अनादर लोहर। 25छना कुचे परमेश्वरो पाहठी सच्चाई टोहकठे विशवास लहज़िमी रंङ इंकार लहज़ातोर, दंङ दोबि ग्रहण लहज़ातोर अंऊ हप्सी तोह। दंङ संसारो अराधना ए सेवा लहरी, रचना लहरी, न कि दुह सृष्टि लह्जाड़ो अंऊ सदा धन्य शोतो! अमीन। 26झांह लेह परमेश्वरे दोतिंङ दोतु नीच कामनाओं वश रिंङ छोड़ेके केहरी; देर तचेक कि दोतु मेच़िमी लाह रूठे रंङ साते अंऊ स्वभावो खिलाप तोद बदलेके कहरी। 27दंङ ध्वांए ए गंङमीहरे लाह मेच़मीतङ साते स्वाभाविक व्यवहार केट्रा एनातु बिचंङ शुहचे जेगदनसि लेहतिरे, दंङ गंङमी ज़ि, गंङमीतिंङ साते कुकम लेह एनातु भ्रमो ठीक फल खोकसिरी।
28दंङ दोच़ी परमेश्वरा बि ञेंच़िमी कोशिश मलाहरिरे दंङ परमेश्वरे ला दोतिंङ दोतु निकम्मे सेहमो टोईच़ी छोड़ेके केहरी दोच़ी अनुचित कम लोहर। 29झांह लेह दुह भत्ते अधर्म, दुष्टता, लोभ, वैरभाव रंङ पिंङी इलिरे; दंङ जेगद्न्सी, हत्या, झगड़ा, छल, डाह रंङ साते भरपूर शुहचे इलिरे, दंङ चुगलखोर, 30बदनाम लहज़ा, परमेश्वरो साते घृणा लहज़ा दोरे, ऊईतु अनादर लहज़ा दोरे, घमंड लहज़ा, मोह्ड़े-मोह्ड़े गप्पा कुट्रा, मदम-मदम गप्पा लहज़ा, याह बाहऊ गप्पा मा मनेक्च़ातोर, 31निर्बुद्धि, विशवासघाती, मायामेह ए दया मेह शुहचे इलजी तोतोर। 32दंङ दोरे ता परमेश्वरो दि विधि ञेंच़ातोर कि झांह, झांह कम लहज़ा दुरे सिमी सज़ा जोगे शुहरे, तांला ऐनाह ए झांह ठ्रोह कम मा लहज़ा पर दि ठ्रोह कम लहज़ा दोतंङ साते ला खुश शुहवा।
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.