प्रेरित 3
3
लट्टे भिखारी बि ठीक लहज़ी
1पतरस ए यूहन्ना नीरा कि तीन बजे प्रार्थना ओ मुक्कारिंङ यहुदी मंदिरंङ इबि लेह्की तोईरे। 2दोर्तिंङ मीहरे इच्च़ा मीहबी हपि लेहकी तोईरे अरी जेह्कपिमी बेहच़ी लट्टे तोहई, अतिंङ दोरे हर ध्याड़ा यहुदी मंदिरो ल्वाड़ी ओ दुह पेतंङ ओ कछंङ केहच़ी च़रतिर अतिंङ “सलटे” पेतंङ ला कुट्री दुह यहुदी मन्दिरो#3:2 यहुदी मंदिरो पिला हासी महसे बेह्ले ल्वाड़ी शवाते। अंऊ सलटे पेतंङ तोहई दुह मन्दिरो 100 मीटर ऊईतार तोहई। ल्वाड़ी अंजा इलज़ा दोतु दोरच़ी भीख पेट्रोतो। 3अपेहल दुह लट्टे मीहच़ी पतरस ए यूहन्ना बि यहुदी मंदिरो ल्वाड़ी इबि तंङतो, दंङ दोई दोतु दोरच़ी ढबाह पेट्री लेहती। 4पतरस ए यूहन्ना ज़ि दोऊ हखा ध्याना रंङ साते खांई ते दोरंङ साते कुहतो, “ञेंहतु हखा खंणु!” 5दोतु दोरच़ी छा छि खोकसिमी उम्मीद, दुह दोतु हखा खंड्री लेहती।
6दंङ पतरस ए कुंई, “गिऊ कछंङ ढबाह माह; पर छि गेह तातग, दुह गेह कनिंङ रमोग; यीशु मसीह अंऊ नासरत नगरो शुह दोई कनिंङ ठीक लेह चरच़तो। हेंतेग अच़ु दंङ जोह।” 7दंङ पतरस ए दोऊ सुचंङ गुहड़ च़ुमने ते दुह खड़े लहरी, दंङ दोथरे दोऊ कोंज़ा ए पुष्टू रिंङ ताकत अच़ा अति। 8दंङ दुह त्रुसेकी खड़े शुहचे इलि, दंङ देखा-नोखा जोज़ी लेहती। दोहपल दुह दोतंङ साते पेतंङो दोरच़ी यहुदी मंदिरो ल्वाड़िंङ अच़ा इलि। दंङ जोज़ा ए छ्वाह रंड्रा ते परमेश्वरो स्तुति लहज़ी लेहती। 9भत्ते मीहच़ी दोबि जोज़ी ए परमेश्वरो स्तुति लेह खंड्राते। 10दोच़ी दुह सेहषी च़रतिर, कि दिह दुह ए लट्टे भिखारी शुह अंऊ हर ध्याड़ा यहुदी मंदिरो ल्वाड़ी धकते “सलटे” पेतंङ टोईच़ी बंङज़ा ते; भीख पेट्रा तोहई, दंङ दुह घटना अंऊ दोरंङ साते शुहचाते; दोरे महस ठट् ए वेवा इलिर।
यहुदी मन्दिरो ल्वाडिंङ पतरसो उपदेश
11अपेहल दुह पतरस ए यूहन्ना बि चुमज़ा तोहई ता भत्ते मीहरे महसे हेरान शुहचे ते, ज़रका रें दोर्तिंङ अतिर अतिंङ सुलेमानो ल्वाड़ी कुट्री। 12दिह खांई पतरसे मीहतंङ साते कुंई, हे इस्राएल देशो मीहरे केहरे दिह मीहू टोईच़ी छिल्ले हेरानी लहज़ातंई दंङ केहरे ञेंहतु हखा छिल्ले झांह ठ्रोह खंड्री लेहकी तोतोंई कि ञेंहच़ी ए हेनातु सामर्थ ए भक्ति रंङ साते दिह देखा नोखा जोज़िमी जोगे लहतन। 13दि मीहबी अईन लहज़िमी दोरच़ी अब्राहम, इसहाक ए याकूबो परमेश्वर ञेंहतु बाह-मेमेतु परमेश्वरे एनोह सेवक यीशु ऊ महिमा लहरी। पर केहच़ी दुह सच़िमी थल्जी रोमी राज्यपालो हवाले लेह च़रतिन, अपेहल पिलातुसे दोबि रिहा लहज़िमी फेंसला लहरी, दंङ केहच़ी दोऊ तुईज़ी यीशु ऊ इन्कार लहरिन। 14केहच़ी दुह ग्रहण माह लहरिन अरि पवित्र ए धर्मी तोहई दंङ केहरे जुंज़ातंई कि इच्च़ा हत्यारा बि केहतु थल्जी रिहा लोहनी। 15दंङ केहच़ी दुह सच़ी च़रतिन, अरि मीहतिंङ हमेशा ओ जीवन रंड्रा, पर परमेश्वरे दोबि सिए दोतु बिचंङ ज़ि श्रींङमी लहरी; दंङ दिह गप्पातु ञेंहरे गवाह तोतोंई। 16मसीहू मिंदंङ बिशवास लहज़िमी दोरच़ी दिह मीह बि अतिंङ केहच़ी खंड्रातंई ए ञेंहच़ातंई ताकत रांहषी ततो। दिह मीह यीशु ऊ मिंदंङ ए यीशु ऊ टोहकठे बिशवास लहज़िमी रंङ साते बिल्कुल अईन शुहचे इलि।
17“दंङ हेंज़रे, गिह्बी पता तोह कि केहच़ी ए ञेंहतु यहुदी सेंहणा ज़ि यीशु बि बिना सोचेके समझेके सच़ी च़रतिन छना कुचे केतिंङ पता माह तोहई कि दुह मसीह शुह। 18पर अंऊ गप्पातु पाहठी परमेश्वरे भत्ते भविष्यवक्तातु दोरच़ी कंड्राते, कि दोऊ मसीह दुख उठापोतो दंङ सचे च़रपोर; दोतिंङ दोई दू हेले लहज़ी कंड्रातो। 19झांह लेह केनातु मदम कमो दोरच़ी सेहम किर्तुंई दंङ परमेश्वरो हखा यह्च़ा अतंई कि केतिंङ केनातु पापो दोरच़ी माफी खोकसोतो। 20अगर केहच़ी पश्चाताप लोहनि दोहपल झांह ठ्रोह टेम अपतो अपेहल केरे खुश शोनि, दि ञेंई कि प्रभु परमेश्वर केतंङ साते तोह। दंङ दोई यीशु बि च़रपोतो, अंऊ दुह मसीह शुह, अतिंङ दोई केहतु थल्जी तुईबे अंङषी ततो। 21यीशु ऊ स्वर्गंङ बंङज़ी दोहपल तचेक ज़रूरी तोह अपेहल तचेक कि परमेश्वर भत्ते धिर खरकोई बणाके च़रपोतो। महस तुहई ए परमेश्वरे मीहतिंङ दिह कंड्रिमी थल्जी पवित्र भविष्यवक्तातु दोरच़ी झांह लहज़िमी वाईदा लहरी। 22छना कि मूसा ए कुंई, ‘प्रभु परमेश्वर केहतु केनातु न्वातु बिचंङ केहतु थल्जी गिऊ ठ्रोह इच्च़ा भविष्यवक्ता च़रपोतो, छिला धिर दोई केतंङ साते कोहतो, दोऊ रेड्रुंई।’ 23दोहपल मूसा ज़ि कुई अरिला दुह भविष्यवक्ता बि माह रेड्रतो दोबि पूरा तरीका रंङ परमेश्वरो मीहतु बिचंङ च़ि हुंच़े च़रपोर। 24दंङ शमूएल भविष्यवक्ता बेहच़ी शुरू शुचे हर इच्च़ा भविष्यवक्तातु ज़ि दि गप्पातु पाहठी कुई अंऊ तोग शुहबी लेहकी तोह दोरच़ी ला दिह ए ध्याड़ातु पाहठी रूठे खबर रांहषी तातोर 25केहरे भत्तेर भविष्यवक्तातु कटुरे ए दुह वाईदा हिस्सादार शुई, अंऊ परमेश्वरे केहतु बाह-मेमेतंङ साते लहते, अपेहल दोई ञेंहतु सेंहणा अब्राहम रंङ साते कुंई, ‘कांह खानदानो दोरच़ी धरतीऊ भत्ते खानदान आशीष खोक्पोर।’ 26अपेहल परमेश्वरे एनोह सेवक यीशु बि सिए दोरच़ी श्रींङे लेह दोई दोबि भत्ते बे तुहई केरे इस्राएलो मीहतु कछंङ च़रति। कि केहतु बिचंङ च़ि हर इच्च़ा पापो जीवनो दोरच़ी परमेश्वरो हखा अपिमी मदत लोहतो।”
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.