खबरदुत 6
6
सेवाको लागि सात जना मान्तालमकाय छ्युह्ङो
1ओउतोक बेलाहाङ प्रभुको चेलालम सङ्ख्याहाङ नाःधय आलाकाय। तर ग्रिक भासा नोःओ केहि यहुदिलमइ हिब्रु भासा नोःओ यहुदिलमको बिरोतहाङ नोःसा फाःङाकानि। “हिब्रु भासा नोःओ यहुदिलमइ दिनमले वेःतिबयो जेःगाहाङ निको राङ्गि मोम्चोलमकाय छति बयाकानि” त दाह्य्ति ग्रिक भासा नोःओ यहुदिलमइ गाल बयो खेइतो। 2ओउतझ्यान्ते बाह्र जना मुख्य चेलालमइ जुदा बिस्वासिलमकाय ब्रक्त गोत्ति तोआकानि, “परमेस्वरको आखर प्रचार जाह्ङ्सा फेति जेःगा-तुङ्गा वेःतिबयो काम जाह्ङ्साकाय निको लागि पेतो स्याउल। 3ओउतझ्यान्ते होयालम, निङ मध्येसय जुदाइ मान-सम्मान जाह्ङो र पबित्र ग्वालामकसय दोःओ बुद्दिइ भरपुर स्यावो सात जना गोय्चो मान्तालमकाय छ्युह्ङ्नु। निइ ओउमयकाय इ कामको लागि जिम्मेवारि बइनाङ्सु। 4अनि निखे जुदा समय प्राथना र परमेस्वरको आखर प्रचार जाह्ङो कामहाङ लागनाङ्सु।”
5मुख्य चेलालमको इ कुराकाय जुदाले झाकाकाय, र ओउमयइ परमेस्वरकाय जोक्तो बिस्वास जाह्ङो र पबित्र ग्वालामइ भरपुर स्यावो स्तिफनस, फिलिप, प्रखरस, निकनोर, तिमोन, पर्मिनास, र लोन्हे यहुदि धर्म मानओ एन्तिओखियाको निकोलस त तोओ मान्ताकाय छ्युह्ङाकानि। 6ओउमयइ ओउ सात जनाकाय मुख्य चेलालमको ङ्हा वानाकानि, र मुख्य चेलालमइ ओउमयकाय प्राथना जाह्ङाकानि र ओउमयको तालाङहाङ क्रुत झाम्ति सेवा जाह्ङ्सा अधिकार बयाकानि।
7ओहाङसयको परमेस्वरको आखर नाःतो थाउहाङ प्रचार स्यावा। यरुसलेमहाङ बिस्वासिलमको सङ्ख्यामा नाःतो स्याउधय आला, र नाःतो यहुदि पुजारिलमइ इ बिस्वासकाय सुइकार जाह्ङाकानि।
स्तिफनसकाय पक्रओ
8परमेस्वरइ स्तिफनसकाय मान्तालमको माझहाङ ग्याह्ङ्सिओ काम र चिनोलम जाह्ङ्साको लागि जिःङ बइसास्यावा। 9तर यात दिन नोकरिसय छुत्कारा दोःओ मान्तालमको यहुदि सभाकिमको केहि मान्तालमइ स्तिफनसकुस बहस जाह्ङ्सा फाःङाकानि। ओउमयखे कुरेनि र अलेक्जेन्द्रिया सहर, र किलिकिया र एसिया इलाकासय वाङो मान्तालम खेइतो। 10तर स्तिफनस पबित्र ग्वालामइ बयो बुद्दि अनुसार नोःओझ्यान्ते ओउमयइ स्तिफनसकुस बहस जाह्ङ्साले खाइनिलि। 11ओउतझ्यान्ते ओउमयइ केहि मान्तालमकाय सुतुक्त घुस बइति “इ मान्ताइ मोसा र परमेस्वरको बिरोतहाङ नोःओ निइ सायालाङ्सु” त दाह्य्ति नोःताकाकानि।
12एतहाइति ओउमयइ मान्तालमको हुल र ओउमयको अगुवालम, धर्मगुरुलमकायमा स्तिफनसको बिरोतहाङ उन्चो लावाकानि। र ओउमयइ स्तिफनसकाय पक्रति ताह्ङो सभाको ङ्हा वानाकानि। 13अनि ओउमयइ केहि मान्तालमकाय स्तिफनसको बिरोतहाङ एतदाह्य्ति स्याताहा नोःताकाकानि, “इ मान्ताइ इ पबित्र मन्दिर र परमेस्वरइ मोसा दुवारा बइसास्यावो नेम-कानुनको बिरोतहाङ गलमा नोःसा फेउलु। 14धइतिदाह्य्सा नासरतको येसुइ इ मन्दिरकाय म्हेत्ताक्नउ र मोसाइ निकाय पालन जाह्ङ्सा बयो रितिथितिमा फेरना त दाह्य्ति नोःओ निइ सायालाङ्सु।” 15अनि ताह्ङो सभाको जुदा सदस्यलमइ स्तिफनसकाय ताङ्ति योआकानि र ओउमयइ ओउको रुप लाङकादुतको लेखा प्लिह्ङ्तिमुओ च्यवाकानि।
اکنون انتخاب شده:
खबरदुत 6: CHEP
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.