Mateus 28
28
Yesus kon baka na libi
Mrk 16:1-10; Luk 24:1-12; Yoh 20:1-10
1Fruku mamanten, baka a sabatdei, Maria fu Magdala nanga a tra Maria go luku a grebi fu Yesus. A ben de a fosi dei fu a wiki. 2Ma wantron so, a gron bigin seki hebi fu di wan engel fu Masra saka kmoto na heimel. A engel go na a grebi, a lolo a bigi ston puru, dan a go sidon na en tapu. 3A fesi fu a engel ben gersi a faya di e koti na loktu, èn den krosi fu en ben weti leki katun. 4Den srudati di ben e hori wakti skreki sote taki den tan didon leki dedesma. 5Dan a engel taigi den uma taki: “No frede! Mi sabi taki un e suku Yesus di den ben spikri na a kroisi. 6A no dya, bika A kon baka na libi soleki fa A ben taki. Kon, luku a presi pe A ben didon. 7Dan un go es'esi go taigi den man di ben teki leri fu En taki: ‘A kon na libi baka. Arki, A sa go na un fesi na Galilea. Drape un sa si En.’ Na disi mi kon fu taigi unu.”
8Den uma gwe wantron fu a grebi. A skreki ben de ini den skin ete, ma den ben breiti srefsrefi. Den lon go es'esi fu go ferteri den man di ben teki leri fu Yesus san a engel ben taki. 9Di den ben de na pasi, ne Yesus waka miti den èn A taki den odi. Den uma waka go na En, den grabu den futu fu En èn den anbegi En. 10Dan Yesus taigi den taki: “No frede. Un go taigi den man fu Mi fu den go na Galilea. Drape den o si Mi.”
Den srudati ferteri san psa
11A srefi pisten di den uma ben e go na den man di ben e teki leri fu Yesus, wantu fu den srudati ben go na a foto dan den ferteri den prenspari priester ala den sani di psa. 12Den disi hori wan konmakandra nanga den fesiman fu a folku fu taki a tori. Dan den teki a besroiti fu gi den srudati furu moni, 13èn den taigi den taki: “Un mus ferteri den sma taki: ‘Neti yuru den man di ben e teki leri fu En kon fufuru a dedeskin di un ben e sribi.’ 14Efu Pilatus yere a tori, wi sa taki nanga en fu sorgu taki a no strafu unu.” 15So den srudati teki a moni, dan den du san den man taigi den fu du. Den Dyusma e taki a tori disi te leki a dei fu tide.
A wroko di Yesus libi gi bribisma
Mrk 16:14-18; Luk 24:36-49; Yoh 20:19-23; Bosk 1:6-8
16Den erfu man di ben e teki leri fu Yesus go na Galilea na a bergi pe Yesus ben taigi den fu go. #Mat 26:32; Mrk 14:28 17Di den si En, den anbegi En, ma sonwan fu den no ben e bribi ete efu na Yesus trutru. 18Ne Yesus kon moro krosbei, dan A taigi den taki: “Gado gi Mi ala makti na ini heimel nanga grontapu. 19Un go na ala folku fu grontapu. Un mus meki den kon tron sma di e teki leri fu Mi. Dopu den ini a nen fu a P'pa, a Manpikin nanga a Santa Yeye. #Bosk 1:8 20Leri den fu du ala sani di Mi ben taigi unu. Arki, Mi de nanga unu ala dei te na a kba fu grontapu.”
اکنون انتخاب شده:
Mateus 28: SB16
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Tekst © Surinaams Bijbelgenootschap 2016