Maajɨ Bɛtɔ Twamagɨɨ 24
24
Ja Ka Kɛl Bulusi
1Kumɔ nʊ a shui, nǝngɔ dalɨ nǝkǝlagɔ, Hananiya, a bɛ dakini jǝbɔ kaam nǝb dʊʊm jǝbɔ kaa nǝ nyǝmtǝm borang, dunɔ nǝn Tartulus, sǝ ja ka kɛl Bulusi a daagɔ gwamnaɨ. 2Ja jo Bulus a dɔɨ, nǝngɔ Tartulus a tǝl katǝm kɛl Bulusi a kǝga gwamnaɨ, Filikus, gɔ, “Nǝ dʊʊ, n gola nyǝmtǝm mʊn bǝ yɨ yɨm lǝma fɔ jǝbɔ mʊɨ. Mʊ kuwo kuwo jʊ nɨ bɛ lɛ a kǝgaɨ, ń maa kanjǝlɔ a lada wʊnɨ bɛ lɛ nǝn jatǝm kǝga a bǝlǝntǝmɔ gǝmɨ. 3Filikus Nǝ tǝmɔ, a daatɨnɔ gǝm gwam jǝbɔ golantɨnɔ gwam, nǝn jǝla nǝn nyɔ jǝbɔ buutǝm kang. 4Kage n tǝg ń, mǝ kela ń nɛ a mʊgɔ nya mʊnɔ gǝm nyʊwa jʊ nɨ nǝn sʊwa lɛɨ nǝn dǝm nyɔ.
5“Nǝn nya balɨ nɨ n nǝ kutʌm, bɛ lɛ nǝn kutʌmɔ a lada a kʊm Yahudawagɨɨ a yooligɔ gǝm gwam. Nǝn gɔ dʊʊ nǝb nɨ bwangtǝn balɨ nɨ lɛ a jel a Nazaratɨ. 6Swɨ lɛ a kal Kan Kwaamanɔ. Nǝngɔ nǝn ta gǝnɨ. [N swɨtǝm nǝn nǝ maa gǝm borang kanga diilɔ a sʊwaɨ. 7Nǝngɔ dalɨ dʊʊ sʊwajaam nɨ, Lisiyas, ba yo gǝn nǝn kwaan a kang nǝnɨ. 8A nǝ diil gɔ nǝb katǝm kɛl gǝnɔ a bɛ a kǝga mʊn.]#24:8 Kaam bɛl mʊlalɨ galɨgɔ mɨ nǝn bɛ gola nɨ. Na ń fɨɨ balɨ nɨ nǝn kang mʊnɨ, mʊ nya nya katǝmɔ gwam nǝn maa gǝm lɛɨ.” 9Yahudawagɔ a bwa gǝm guu gɔ jʊ a sʊwaɨ gǝ na nyɔ.
Jǝgtǝm Dul Bulusi A Kǝga Filikusi
10Gwamnagɔ a nǝ Bulus gola gɔ a sʊwa kɛlɨ, nǝngɔ Bulus a jǝla gɔ, “Mǝ jǝg dul mɨ lɛ nǝn fulotǝm nǝl. N nyǝm ń maa joltɨnɔ a lada mʊ maa borang nǝb nɨ lɛ. 11Na ń fɨɨ, mʊ nyǝm nyǝm a shu bɔ kumɔ kʊb jeli yo mǝ gwi mǝ shu a Urushalima sǝ n maa bǝlátǝmɨ. 12Nǝb nɨ a bɛ nǝn kɛl mɨɨ, ja nya ɨ bɔ nǝn bǝngka lɛ nǝbɔ kaa nǝl. Ja nya ɨ bɔ tag mǝ gung nǝl nǝbɨɨ lɛ a Kan Kwaaman jǝbɔ kantɨn mɛlalɨ jǝbɔ mʊgɔ tuulɔ. 13Kanjǝl nɨ jǝ sʊwa lɛ a dul mɨɨ, mɨ ji nǝn jʊ nɨ nʊng ń nɛ gɔ katǝm nɨ jǝ maa lɛɨ, n dǝngdǝngɨ.
14“Jʊ win mǝ jǝla nǝnɨ, nǝn gɔ mǝ bwangtǝn Kwaama tʊgalam nǝnɨ lɛ a gola Kiristii wʊnɨ nǝb nɨ sʊwa lɛ gɔ ke bɔ bɨlǝngkɛlɨ. N nǝ bɨlǝngkɛl a gwam jʊ nɨ ja mʊla a diilɔ gǝmɨ jǝbɔ langǝn bwangǝn nǝbkuwotǝmkǝgagɨɨ. 15Mǝ ya nǝl lɛ a daa Kwaama woi kanga nǝb nɨ ja yam tʌji gɔ guntǝm wo a nǝb nɨ a bʊlala bʊlalaɨ, nǝb dǝngdǝngɔ jǝbɔ nǝb bwɨlamɔ. 16N jʊ a bwɨ kwangkwang mǝ sʊ kwaan nɛ, mɨ mǝ nǝn kaa komtǝm wo a nǝl mɨ a kǝga Kwaamaɨ jǝbɔ nǝbɔ.
17“Mǝ maa joltɨnɔ a gǝlalaɨ, nǝngɔ mǝ yǝla mǝ bɛ a Urushalima sǝ ba n maa tɨkalɨ nǝn kemʌn a daa nǝbam nǝnɔ nɨ nǝn komtǝmɨ, sǝ n tǝla Kwaama gǝm twama. 18Mǝ a mʊgɔ maatǝm nyɔ, nǝngɔ ba ja nya ɨ a mʊgɔ Kan Kwaamanɨ. N kwɛl n saalǝm saalǝmɨ dul mɨ, mɨ mǝ a mʊrkalɨ nǝbɨɨ, mǝ gung bɔ nǝl nǝbɨɨ. 19Kaam Yahudawa nɨ ja jel a tǝm Asiyaɨ na jǝ fǝɨ, nǝji na jǝ bɛ lɛ a kǝga mʊn nǝn katǝm kɛl mǝndɨ, na ji nǝn komtǝm a dul mɨɨ. 20Na ke bɔ jii, nǝb nɨ fǝɨ ja sʊwa bwɨlangkɛlɔ ja nya ɨ nǝnɨ, nǝn kang ji, nǝn kwama mǝ tɨm a kǝga nǝb dʊʊm koteregɨɨ. 21Na jǝ tuwo i tuwo i a dul jʊ win mǝ sʊwa nǝn kwama mǝ tɨm a kǝga jini mǝ gung diilɔ mǝʊ, ‘N kɛl dul guntǝm a bwaa jǝ maa mɨ borang lɛ a kǝga jen dwiyeni.’ ”
Ja Kubʌl Bulus A Kaisar
22Filikus gwamnagɔ a nyǝm kanjǝlɔ a gǝlala a gola Yesui, nǝngɔ a tɨ nǝn ji gɔ, “Bǝ yam Lisiyas dalɨ dʊʊ sʊwajaamɔ a bɛ dɨn sǝ n biyo jem borangɔ.” 23Filikus a nǝ dʊʊ sʊwajaamɔ diil gɔ tɔɔ Bulus, ka ga sɨna gǝm lɛ maatǝm kanjǝl, ka ga kaa lɛ fatǝlam gǝnɔ bɛtǝm a daa gǝ woi, sǝ ja tɨka gǝn.
24A gul kaam kumtɨn nɨ a shui, nǝngɔ Filikus jǝbɔ nwala gɔ Durusila kaa bwɛn Yahudaɨ, ja bɛɨ. Nǝngɔ a twam gɔ ja bɛ nǝn Bulusi, nǝngɔ ja nyʊwa kɛl nǝtǝm bɨlǝngkɛl a dul Kiristi Yesui. 25Nǝngɔ la Bulus a tǝl sʊwa ji kɛlɔ lɛ a dul yɨm dǝngdǝngɨ, jǝbɔ tatǝm dul, jǝbɔ kumɔ borang nɨ bɛm lɛɨ. Nyʊwatǝmɔ nyɨɨ, taalɔ a ta Filikus. Nǝngɔ a sʊwa Bulus gɔ, “Yǝla kǝngkɔ. Na n nya golaɨ, mǝ jo ń jo ń.” 26Ya nǝl lɛ gɔ kɛna Bulus nǝ gǝn kemʌn. Nǝn gɔ jʊ a bwɨ a tɨtǝn jotǝm gǝnɨ, sǝ gǝ kiyo kɛl jǝbɔ gɨɨ.
27Filikus swɨ lɛ a maa Yahudawagɔ gǝm jǝ nya. Nǝngɔ a bǝla Bulus a lɔsomii. Jolɔ yo a shui, nǝngɔ Borkiyas Festas a yǝlam gwamna a fʌto Filikusi.
اکنون انتخاب شده:
Maajɨ Bɛtɔ Twamagɨɨ 24: DBD
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation