Gāluega 5
5
Ko Anania ma Hafila
1Kae nae iei he tamāloa nae igoa kia Anania ma tana āvaga ko Hafila, na fakatau atu e kilāua he vāega o tō lā fenua. 2Kae i te māliliega i te vā o ia ma tana āvaga, na ia tāofia ai mo ia he vāega o te tupe na maua, kae fōki te tupe na totoe ki te kau apohitolo. 3Oi na lea atu ai ia Petelu ki ei, “Anania, heā te kua fakataga ai e koe ia Hatani ke pule kia te koe ma kua pepelo ai koe ki te Agaga Paia, i te kua kē tāofia o he vāega o te tupe na maua mai i tō fenua? 4Ka ko hēki fakatau atua e koe te fenua, nae e o koe lava; ma ina kua uma te fakatau atu e koe, ko te tupe nae a koe. Heā la te na fai ai e koe he mea vēnā? Ko koe e hēki pepelo ki tagata—ko koe kua pepelo ki te Atua!” 5Na lagona atu lava e Anania te fakakupuga tēnei, oi na pakū loa lava ki lalo kua mate; ko nā tino uma na fakalogo ki te mea tēnei na mātataku lahi lele. 6Ma na ōmamai ai nā tāulelea talavou kua āfīfī tona tino, ma na hiki ai ki fafo ma tanu.
7Na tai tolu itūlā talu te tupu o te mea tēnei, oi na hau ai tana āvaga ma ko hēki ia iloa te mea kua tupu. 8Kua fehili atu ki ei ia Petelu, “Lea mai ake, ko te tupe kātoa tēnei na maua e koulua ma tau tāne mo te fenua o koulua?”
Na tali atu te fafine, “Io, ko te tupe kātoa tēnā.”
9Oi na lea atu ai ia Petelu ki te fafine, “Heā te na mālilie ai koulua ma tau tāne ke koulua tofotofoa te Agaga o te Aliki? Kikila, ko nā tāulelea na kilātou tanua tau tāne, iēnā kua i te faitotoka i te taimi nei, ma ka kilātou hikia foki koe ki fafo!” 10Ko te taimi lava tēnā na pakū ai te fafine ki lalo ki tafa o nā vae o Petelu, kua mate. Oi na ōmamai ai nā tāulelea talavou oi hiki ki fafo te tino o te fafine ma tanu i tafa o tana āvaga. 11Ko te Ekalehia kātoa ma nā tino uma lele na fakalogo ki te mea tēnei, na mātataku lahi lele.
Ko nā Vāvega ma nā Fakailoga
12E lahi nā vāvega ma nā fakailoga na fai e te kau apohitolo i te mea nae iei ia tagata. Ko nā tino uma lele kua talitonu kia Iehu kua fakapotopoto fakatahi i te Poletito o Holomona. 13E hēai lele he tino ko hēki talitonu na loto toa ke iei fakatahi i te mea kua māopōpo ki ei nā tino kua talitonu, e ui lava ko nā tino kua talitonu nae fakaaloalogia lele e tagata. 14Kae na haga fakaopōpo pea lava te tokalahi o nā tino kua talitonu ki te Aliki—ni kaifenua o fafine ma tāulelea. 15Ona ko nā mea a te kau apohitolo nae fai, na tahiki ai nā tauale ki luga o nā auala ma tuku ki luga o nā hofa ma nā epaepa, kae ke tau lava ko te atāta o Petelu ke pa ki luga o he vāega o kilātou, kāfai e haele ake i te auala. 16Na lolofi mai nā kaifenua mai nā tamā kakai nae pili ki Ieluhalema ma kaumai nā tino tauale ma nā tino nae ulufia e nā agaga kino; ma na fakamālōlō uma kilātou.
Kua Maua te kau Apohitolo i Fakahāuāga
17Oi na lagona ai te loto kino lahi e te Ulu Ohitāulaga ma ona hoa uma, ni tino o te kau Hatukaio, ki te kau apohitolo; 18ma na puke ai e kilātou te kau apohitolo ma tuku ki te falepuipui. 19Kae i te pō, na hau ai he āgelu a te Aliki oi tatala nā faitotoka o te falepuipui ma takitaki te kau apohitolo ki fafo, ma na lea vē atu ai te āgelu kia te kilātou, 20“Olo oi tutū i loto o te Mālumalu ma taku atu ki nā tino nā mea uma lele e uiga ki te ola fōu tēnei.” 21Na uhitaki ki ei te kau apohitolo, ma na olo ai i te tāeaopō ki loto o te Mālumalu ma kāmata oi akoako atu ki tagata.
Oi na fakamāopōpo ai e te Ulu Ohitāulaga ma ona hoa, te kau toeaina uma o Ihalaelu, mo he fono a te Taupulega kātoa, ma na kave ai te lātou fakatonuga ki te falepuipui ke kaumai te kau apohitolo ki mua o kilātou. 22Kae i te papā atuga o nā leoleo ki te falepuipui, e hēai he tino nae iei, ma na toe liliu ai ki te Taupulega ma lea vē atu ki ei, 23“E pa atu kimātou ki te falepuipui e loka mau te fale kātoa, ma ko nā faitotoka nae kikila lelei e nā leoleo; kae tatala atu e kimātou nā faitotoka kua hē i loto te kau apohitolo!” 24I te lagona atuga e te takitaki o nā leoleo o te Mālumalu vēnā ma nā ohitāulaga pule o te mea tēnei, oi na taumafai ai ke kilātou iloa pe ko heā te na tupu ki te kau apohitolo. 25Ma na hau ai he tino oi lea vē mai kia te kilātou “Kikila! Ko nā tāulelea na koutou tukua ki te falepuipui e i te Mālumalu nei; e fai a lātou akoakoga ki tagata!” 26Na olo ai loa te takitaki o nā leoleo ma tana vāega oi toe kaumai te kau apohitolo. Kae nae hē honafaia e kilātou te kau apohitolo ona nae mātataku nā kilātou e fetogia e tagata.
27Na kaumai ai e kilātou te kau apohitolo ki loto o te fono ma fakatutū i mua o te Taupulega, ma na lea vē atu ai kia te kilātou te Ulu Ohitāulaga, 28“Na fakatonu lelei atu lava koutou e kimātou ke nahe toe faia autou akoakoga i te igoa o te tino tēnei. Kae kikila atu ki te mea kua pa ki ei! Kua fakahalalau e koutou autou akoakoga ki Ieluhalema kātoa, ma taumafai koutou ke tukuaki mai kia te kimātou tona mate!” #Mat 27.25
29Oi na tali vē atu ai ia Petelu ma nā apohitolo ki ei, “Ko kimātou e tatau ke uhitaki ki te Atua kae hē ki tagata. 30Ko te Atua o nā tupuna o kitātou te na ia fakatūa ia Iehu mai te oti, i te tāmatega e koutou i luga o te hātaulo. 31Kua fakaeketia ia e te Atua ki tona itū taumatau ke fai ma Takitaki ma ke fai foki ma Fakaola, kae ke maua ai e te nuku o Ihalaelu te avanoa ke halamō ai, ma fakamāgalo ai mai a lātou agahala. 32Ko kimātou ni molimau ki nā mea iēnei—kimātou ma te Agaga Paia, tē kua fōki e te Atua mo kilātou e uhitaki kia te ia.”
33I te lagona atuga e te Taupulega o te mea tēnei, oi na fēkakai lahi lele ai ma fofou lele ke kilātou tāmatea te kau apohitolo. 34Kae na tū ake ki luga hētahi o kilātou, he Falehaio nae igoa kia Kamalielu, ma ko he faiākoga o te Tūlāfono nae amanakia lahi lele e tagata uma. Kua fakatonu e ia ke kave ki fafo te kau apohitolo mo hina taimi, 35oi na lea vē atu ai ki te Taupulega, “Oku uho Ihalaelu, kikila totoka ki tautou mea ka fai ki nā tāulelea iēnei. 36Auā e manatua e koutou te hauga o Teutaha i he taimi kua mamao mālie atu, na lea ko ia he tino e lauiloa, ma na maua te toka fa helau o tagata na mulimuli kia te ia. Kae i te taimi na tāmate ai, ko nā tino uma nae mulimuli ki ei na takape, ma na uma atu ai foki lava ma tana fakalapotopotoga. 37E uma atu te mea tēnā, kae hula mai ia Iuta te tino Kalilaia i te taimi o te tuhigā igoa; na mulimuli foki ki ei he kaifenua, kae na tāmate foki ma na takape ai ma nā tino nae mulimuli kia te ia. 38Ko te tūlaga la e iei te mea tēnei, ko au e lea atu kia te koutou, nahe faia hautou mea ki nā tāulelea. Tuku vēia. Kāfai a lātou fuafuaga ma nā gāluega kua fai e hau mai tagata, oi e fano lava e teka; 39kae kāfai e hau mai te Atua, e hē koutou mafaia lele oi fakatōkilalo kilātou. E i nā ka fakahagatau koutou ki te Atua!”
Na talia e te Taupulega te fautuaga a Kamalielu. 40Oi na fakatonu ai e kilātou ke kaumai te kau apohitolo ki te fono ma ke kini, ma na fakatonu ai ke nahe kilātou toe tautatala lele i te igoa o Iehu; ma na tuku ai ke olo. 41I te olo kehega o te kau apohitolo mai te fono, na fiafia lele kilātou auā kua kikila te Atua, ko kilātou e tāua ke fakamātagā mo te lelei o te igoa o Iehu. 42Ma i aho uma, i loto o te Mālumalu pe i nā fale o nā tino, na fakaauau pea lava a lātou akoakoga ma te tālakiga o te Tala Lelei e uiga kia Iehu te Mehia.
Bible Society New Zealand Charitable Trust