Rom 9
9
E Paulus i Dodo e Huriki a Iuda
1-2Iau a dodo hateka e huriki a turagu, re huriki a Israel. A dodo hateka ria, a loho lege lae. I uka ma a tatami, a ta muholi a vuhuna iau a rihi e Kristo. A hategu i vakasiri a ta muholi, a vuhuna a Hanuna Vure i matakaria a hategu. 3#Nim 32:32A ngaru hateka ni kori e huriki a turagu a Iuda, re huriki a kabu nau. I mavonga kunana e Kristo ge ngaru ni muri mai a ningaru nau, ga vasileki vona, ge tono tala iau na kabu vona, ri gi bole a murigu e huriki a Israel. 4#Nim 4:22; Vin 7:6; 14:1-2; Rom 3:2; 8:15Re huriki a Israel, e huriki a tuna Vure. A Vure i vakasiri ne ria a bagetuanga vona. I rata turane ria a ngava dagi. I habi ne ria a vinara vona. I vakasiri ne ria ri gi lotu navai vona. I ta muholi ne ria na ngava i kupo. 5A Vure i vulaki e huriki a gare ne ria hosi, ge ria a vuhuna a kabu ne Israel. E Kristo i bele manga a bakovi na kabu ne ria, re Kristo ia a Vure, i matakari a maki lobo, ge bole a bagetuanga na parava vakaroro. I muholi.
6I uka ma a taki a Vure ge tatami, i uka ma ge ramai a ngavana, a vuhuna e huriki a hamone Israel ranga i uka ma ria a hamona muholi. 7#Vuh 21:12E Abraham, tara. Ranga ne huriki a hamona i uka ma ni gi gale ria a hamone Abraham, a vuhuna a Vure i takia e Abraham, i ta maea, “E huriki e tune Isak kunana bara ni gale e huriki a hamomu.” 8#Gal 4:23A pelegona i maea: E huriki a hamone Abraham ri bele a vuhuna a Vure i ta muholi ne Abraham ri gi bele, ria a hamona muholi. Pali e huriki a hamona ranga, re Abraham i vakabele na ningaru vona, i uka ma ria a hamona muholi. 9#Vuh 18:10,14I mavonga, a vuhuna a Vure i ta muholi ne Abraham, i ta maea, “Iau ga hamule valai tabu na tahuna maea na pida muri, e Sara bara i tahoka pali e tuna a bakovi.” Muri e Isak ni poda.
10E Rebeka tara, i poda e huriki e tune Isak, ra vuhune mia. 11-12#Vuh 25:23A boge ne Rebeka, i uka ma ni poda rua ma. I uka ma ru rata ma a naro kamumu, o a naro hale. Lakea a Vure i takia e Rebeka, i ta maea, “A tabua bara ia a vora ne tarina.” I ratea a ngava iea, ge vakasiri hita vona, i uka ma i matai a rabuna bakovi, lakea i vulakia. I vulaki a viri na ningaru vona. 13#Mal 1:2-3I ramai a ngava ni here puru na Hinere, i ta maea, “A ngarua e Iakop, pali a marikoi vona e Esau.”
14Pali si gi ta navai? A Vure i rata a naro hale? I uka! 15#Nim 33:19A Vure i takia e Moses, i ta maea, “A dodo e huriki a ngaru ni dodo ria, na ningaru nau.” 16#Epe 2:8Lakea a Vure i vulaki e huriki, i uka ma i ramai a ningaru na bakovi, i uka ma i ramai a nirura na bakovi. I vulaki e huriki na ningaru vona, a vuhuna ia a mari ni dodo. 17#Nim 9:16A Vure i takia e Parao hosi, ni here puru na Hinere, i maea, “A ru ioe ge ioe a hariki, a vuhuna a ngaru ni vakasiri e huriki na nitora nau, e huriki lobo na malala ri gi longo a maki ga rata.” 18I mavonga, a Vure i dodo e huriki i ngaru ni dodo ria, i vakaputungingi e huriki i ngaru ni vakaputungingi ria, i manga i ratea ne Parao.
19Pali a viri tara, ma ge ta maea, “Ra Vure, hita lobo si ramai kunanea a ningaru vona. Si keri ni longotaro a ningaru na Vure. Ra i mavonga, i navai ge pelekado hita?”
20 #
Ais 29:16; 45:9 Pali iau bara koli, ioe e rei ke, go gegea a Vure? A Vure i ratarike ioe. A maki ni pipi i uka ma ge takia a viri i ratea, ‘I navai o rata mavonga iau?’ 21#Jer 18:6A mari ni pipi a ulo i pipi na ningaru vona a ulo. Bara i bole a taka, i pipi na ningaru vona a ulo i rua. A ulo tara ni tahoni a maki kamumu vona. A ulo tara ni tahoni a maki katoki vona.
22A Vure i ngaru ni vakasiri kavakava a rongova vona, a nitora vona, pali i hatenono. I uka ma i ratapile malaviriri e huriki a bakovi hale, re huriki i vulaki puru ria hosi, ge ratapile ria. 23I rata mavonga, ge vakasiri a nidodo dagi vona ne huriki i vulaki puru ria hosi, ri gi made turana na bagetua dagi na hunu, 24re hita e huriki a Vure i gale hita, si gi ramaia. I gale tala hita ne huriki a Iuda, ne huriki i uka ma ria a Iuda. Si valai na kabu lobo. 25#Hos 2:23Hosi e Hosea i here maea,
“E huriki i uka ma ria a ngate nau, ngane ga gale ria e huriki a ngate nau.
A viri muga a marikoi vona, ngane ga galea a hategu.”
26 #
Hos 1:10
“Na tanga a taki muga ria, ‘I uka ma mua a ngate nau,’
Ngane ga taki ria, ria e huriki a tuna Vure Mahuri.”
27 #
Ais 10:22-23
E Isaia hosi, i taki virihi e Israel, i ta maea,
“I muholi e huriki a Israel ri ala kupo hateka, i manga a hire na lavu. Pali ga korimule e huriki ala popote kunana,
28a vuhuna e Bakovi Dagi ge habi a nimadihi ne huriki lobo na malala. Ge ratea malaviriri.”
29 #
Ais 1:9
A maki nga i bele manga a ngava e Isaia i ta propet vona hosi, i ta maea,
“E Bakovi Dagi i matakari a maki lobo. I uka ma ge habi ne hita a hamone hita,
bara si vurua manga e huriki o Sodoma.
Bara si marakavelu manga e huriki o Gomora.”
E Huriki a Israel i Uka Ma Ri Luhoi Tora
30Ngane e huriki i uka ma ria a Iuda, i uka ma ri toni ni laho malamala na matana Vure. Pali a Vure i rata ria ri malamala, a vuhuna ri luhoi tora ia. 31-32#Ais 8:14Pali a Vure i uka ma i rata e huriki a Israel ri malamala, a vuhuna i uka ma ri luhoi tora ia. Ri toni ni ramai a vinara, ri gi rata ria ri gi malamala, lakea ri sibo vona a kedo i rata ria ri boru. 33#Ais 28:16; 1Pe 2:6A ngava ni here puru na Hinere i ta maea,
“Ga rua o Sion a kedo ge sibo vona e huriki,
a kedo dagi ge rata ria ri gi boru.
E huriki ri luhoi tora ia i uka ma ri gi maruhu.”
اکنون انتخاب شده:
Rom 9: bnp
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011 Wycliffe Bible Translators, Inc. All rights reserved.