Apostolo 3
3
A Matasia i Beu
1-2Na parava vakaroro a bakovi tara i beu ni kaloho sike na roho na Vure, na poridala na tanga tara ni gale a “Poridala Mata Kamumu”. I made vonga, i nonongi a moni ne huriki ri valai vonga. A bakovi iea i beu na tahuna ni poda vona. Na parava tara, e Petrus e Ioanes ru laho sike na roho na Vure na kilala i tolu na malunga, a kilala ne huriki ri vasileki vona. 3Na tahuna i matai e Petrus e Ioanes ta ru gu dili, i nongi rua na moni. 4#Apo 14:9Ru matanonoa, lakea e Petrus i takia, i ta maea, “O mata valai ne maria!” 5Lakea a bakovi i matanono rua, i luhoi ta ru gu habi a moni vona.
6 #
Apo 4:10; 16:18 Pali e Petrus i takia, i ta maea, “Iau a uka silva, a uka gol, pali ngane ga habia vomu a maki a tahoka. Na rane Isu Kristo o Nasaret o pesi rike, o laho.” 7Lakea i nugua na limana kanena, i tuli pesia. I malaviriri kunana i vaga a vahana. 8A bakovi i beu i page rike, i vakatubu ni laho. I dili turane rua na roho na Vure, i laho, i page page, i kavurikea a Vure. 9Na tahuna e huriki ri masia i laho i kavurikea a Vure, 10ri matakilalea, a bakovi iea kunana i nongi bala a maki na poridala na roho na Vure ni gale a “Poridala Mata Kamumu.” Lakea ri ngapa, ri turutu vona a maki i bele vona.
E Petrus i Taki e Huriki
11Na tahuna a matasia iea i roe na limane Petrus e Ioanes, e huriki lobo ri turutu, ri nunu mai tou na talele tara na tabeke na roho na Vure, ni gale a “Talele ne Solomon.” 12Na tahuna e Petrus i matai ria, i ta maea, “Mua o huriki a bakovi o Israel, i navai mu turutu? I navai mu matanono maria? Naha ni luhoi miri koria na nitora ne maria, o na hini maria a bakovi kamumu. 13#Nim 3:6,15; Luk 23:13-25; Apo 2:23A Vure ne Abraham, ne Isak, ne Iakop, ne huriki a gare ne hita i vakabagetua a Vora vona, e Isu, a viri mu habia ne huriki a bakovi hale. E Pilato i ngaru ni vakaha ia, pali mua mu koi. 14E Isu i longo mai lobo a ningaru na Vure, ia a bakovi malamala hateka. Pali mua mu marikoi vona, mu takia e Pilato ge vakapagetalea a bakovi ni rabalaki a viri. 15E Isu ia a vuhuna nimahuri, pali mua mu rabalakia. Pali a Vure i vakamahuri mulea na matenga. Mia lobo mi masia. 16Mu lohoka vona a bakovi iea. Ngane mu masia i tavaga. A rane Isu i koria. Maria miri luhoi torea e Isu, lakea a bakovi iea i tavaga liu na matane mua lobo.
17 #
Luk 23:34; 1Tim 1:13 “Ngane mua e huriki a turagu, a lohoka vona a narone mua turane huriki a matakari ne mua mu rata, a vuhuna i uka ma mu lohoka. 18Pali na limane mua a Vure i ratea i bele muholi a ngava i habi polo hosi ne huriki a propet, re Kristo ge bole a nimadihi, ge mate. 19#Apo 2:38I mavonga, mu pulo a vilone mua, mu lakea mai a Vure, lakea bara i ravunu vuroki a naro hale ne mua. Mu rata mavonga, e Bakovi Dagi bara i habi a nimalo ne mua, 20bara i rudu valai tabua e Kristo, a Viri i vulakia ge korimule mua, re Isu. 21Ngane i made na hunu, i davea a parava a Vure i vulakia ge rata karaba tabu a maki lobo. I ta polo ne huriki a propet hosi, i ta muholi ge rata mavonga. 22#Vin 18:15,18-19Hosi e Moses i ta maea, ‘E Bakovi Dagi, a Vure ne mua, muri ma ge rudu vilia ne mua a propet, ge manga iau. A propet iea, a Vure bara i vulaki talea ne mua. Mu longo mai a ngava lobo i taki mua vona. 23E rei a viri i uka ma i longo mai a ngavana, bara ni rabalaki.’
24“I muholi hateka, e huriki a propet, i vakatubu ne Samuel i valai, ria lobo ri taki mugea a ngava na maki i bele na tahuna mona. 25#Vuh 22:18Ra mua, mua a hamone huriki a propet. A Vure i rata a ngava dagi turane Abraham, e huriki a gare hosi ne mua, i ta maea, ‘Na hamomu kunana, ga gamai e huriki lobo na malala.’
26 #
Apo 13:46
“A Vure i vulakia a vora vona, i rudua ge valai taro ne mua, ge rata kamumu mua na tahuna i rata mua lobo mu pulo a vilone mua, mu ha taro a vilo hale.”
اکنون انتخاب شده:
Apostolo 3: bnp
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011 Wycliffe Bible Translators, Inc. All rights reserved.